InfoHub Logo

باعانالى ساندىبايدىڭ ەردەنىنىڭ بالاسى قايتىس بولعاندا ىقىلاس ءوزىنىڭ «ەردەن» دەپ اتالىپ كەتكەن جۇباتۋ كۇيىن تارتقان. سول جولى ىقىلاستىڭ ارقالى ونەرىنە ءتانتى بولعان ەردەن تامالاردىڭ بارىمتالانعان جىلقىسىنىڭ قايتارىلۋىنا سەبەپشى بولعان عوي. وعان قوسا ىقىلاستىڭ العاش رەت الىس-جاقىنداعى باس كوتەرەر بىلىكتى ادامدارعا تانىمال بولاتىنى دا وسى كەز. تاما رۋىنىڭ يگى جاقسىلارىنا ولجا سالىپ، ءوز اعايىندارىنىڭ اراسىندا دا زور بەدەلگە جەتكەن.

وسى ساپار ىقىلاستىڭ قاناتتى ونەرىنە ءتانتى بولعان ەردەن سىي-قۇرمەت كورسەتىپ، استىنا ات مىنگىزەدى، يىعىنا شاپان جابادى.

سودان ۇلىتاۋداعى ەردەن اۋىلىنان كوڭىلدەرى كوتەرىڭكى اتتانعان تاما ەلىنىڭ ادامدارى سارىسۋ بويىنداعى قونىسىنا ەرتەرەك جەتۋگە اسىعىپ، سۋىتتاۋ جۇرسە كەرەك. سول سۋىت جۇرىسكە شىداماي، ىقىلاستىڭ ەردەن اۋىلىنان سىيعا مىنگەن اتى اقساپ، قولداۋى سوگىلىپ قالادى. بۇل توپتىڭ ىشىندەگى ەڭ جاسى ىقىلاس بولعان سوڭ ۇلكەندەر جاعى ازىلدەپ: «ءاي، ىقىلاس، وسى سەنىڭ قوبىزىڭنىڭ داۋاسى كۇشتى بولىپ تۇر. جالعىزىنان ايىرىلىپ، جەر باۋىرلاپ جاتقان ەردەننىڭ قايعىسىن سەيىلتىپ، باسىن جەردەن كوتەرتتىڭ. ول از دەگەندەي، ەردەننىڭ كونتاقىم ۇرىلارى الدەقاشان ءسىڭىرىپ كەتكەن مالىمىزدى قايتارتتىڭ. ەندى مىنا ەردەننەن مىنگەن پىراعىڭنىڭ جانىن قيناماي، سول قوبىزىڭنىڭ ونەرىن تاعى كورسەتىپ، ءبىر شيپا كەلتىرمەيسىڭ بە»، — دەيدى. ۇزىن جولدا ەرىگىپ كەلە جاتقاندارعا ەرمەك كەرەك، باسقالارى دا الگى ءسوزدى قولداپ، كەۋ-كەۋلەپ كەتەدى.

سوندا ىقىلاس جاسى ۇلكەن اعالارىنىڭ ءسوزىن ءازىل دە بولسا جەرگە تاستاماي، ات ۇستىندە كەلە جاتىپ قوبىز تارتادى. سارىنى دا، ىرعاعى دا بولەك سونى ساز الگىندە عانا ازىلدەپ كەلە جاتقان ۇزەڭگىلەستەرىن ەلەڭ ەتكىزەدى. كۇي ەركەلەي تولقىپ، سىرعي سوزىلىپ بارىپ اياقتالعاندا تىڭداۋشىلارى: «ءوي، مىناۋىڭ تىڭ سارىن بولدى عوي!» — دەپ تاڭدانىس بىلدىرەدى.

سوندا ىقىلاس باعاناعى ءازىل سوزگە ازىلمەن جاۋاپ قايىرىپ: «ەندى قايتەيىن، يەن دالادا ەرىمدى ارقالاپ جاياۋ قالار جايىم جوق. مىنا اقساق اتىما شيپا بولسىن دەپ تارتقان كۇيىم عوي!» دەگەن ەكەن.

كەيىن بۇل كۇيى ەل ىشىنە «جالعىز اياق» دەگەن اتپەن تاراپ ەدى دەيدى.

---