InfoHub Logo

ءبىر ءۇيدىڭ مىسىعى بەيقام ءومىر ءسۇرىپتى. قارنى توق بولعان سوڭ، قيمىلداۋعا ەرىنىپتى. جالقاۋلانعانى سونشا - ءتىپتى تۇمسىعىنىڭ استىنان جورعالاپ ءوتىپ بارا جاتقان تىشقاندى ۇستاۋعا دا قۇلقى سوقپاپتى.

اقىرى تىشقان:

– ءبىزدىڭ ماۋباس، – دەپ، مازاقتايتىن بولىپتى.

ءبىر كۇنى قوجاسى ەكى-ۇش قاپ بيدايدى ۇيىنە كىرگىزىپ قويىپ، ءوزى سىرتقا شىعىپ كەتەدى. سول كەزدە قاپ تولى استىققا تىشقاندار تۇس-تۇستان لاپ قويىپتى. كوزدى اشىپ-جۇمعانشا قاپتىڭ تاس-تالقانىن شىعارىپتى.

جىلى جەردە پىرىلداپ ۇيىقتاپ جاتقان مىسىق تىنىمسىز سىتىرلاعان مازاسىز تىقىردان ويانىپ كەتەدى. سوندا قاپتىڭ ءجىبىن بىتىرلاتا قىرقىپ، ءداندى كۇتىرلەتە كۇيسەپ جۇرگەن تىشقانداردى كورەدى دە وجىرايا قاراپ قويىپ، جاتا بەرەدى.

– ءا، تاماق جەپ جۇرسىڭدەر مە؟ – دەيدى دە قوزعالمايدى. ورنىنان تۇرىپ، تىشقانداردى قۋىپ جىبەرۋگە ەرىنەدى. – ءاي، قويشى، جەي بەرسىن!..

ءبىر كەزدە ۇيگە كىرىپ كەلگەن قوجاسى تەسىلگەن قاپتى، شاشىلىپ جاتقان ءداندى كورەدى دە ماناۋراپ جاتقان مىسىققا جەتىپ بارادى.

– مەن ۇيدە سەن بار عوي دەپ سەنىپ جۇرسەم، ءتىپتى ۇيگە كىرگەن ۇرى تىشقانداردى دا ۇستاي المايدى ەكەنسىڭ عوي. سەنى نەسىنە باعامىن. ودان دا توعايعا اپارىپ تاستاپ قۇتىلايىن، – دەپ، ساقىلداعان سارى ايازدا توعايعا اپارىپ تاستاپتى.

اق قارعا ورانعان توعاي ىشىندە ءبۇرىسىپ تۇرعان مىسىقتى كورگەن ساۋىسقان:

– جىلى ۇيدە جاتىپ، دايىن اسقا سەمىردىڭ. تىشقان اۋلاۋعا دا ەرىندىڭ. ەندى قايتەر ەكەنسىڭ؟ قانە، مىناۋ قار باسقان توعايدان تاماق تاۋىپ جەي قويشى! – دەپ، سىقىلىقتاي كۇلىپتى.

---