جانىڭىزدا ەشكىم جوق كەزدە قاقالىپ قالساڭىز نە ىستەۋ كەرەك
بۇل قاراپايىم ارەكەتتەر ءبىر كۇندەرى ءسىزدىڭ ءومىرىڭىزدى قۇتقارىپ قالۋى مۇمكىن.
اركىمنىڭ قاقالىپ قالۋى مۇمكىن. ول كەزدە جاقىن ماڭدا ەشكىم بولماي قالسا، مۇنىڭ ارتى قايعىلى اياقتالۋى عاجاپ ەمەس. سوندىقتان مۇنداي كەزدە وزىڭىزگە قالاي كومەكتەسۋ كەرەگىن ءبىلىپ جۇرگەنىڭىز ابزال.
ەڭ باستىسى — قاتتى ۇرەيلەنبەي، نە ىستەۋ كەرەگىن ناقتى ءتۇسىنۋ كەرەك.
جوعارعى تىنىس الۋ جولدارىنىڭ بوگدە زاتپەن بىتەلىپ قالۋى جارتىلاي نەمەسە تولىق بولۋى مۇمكىن.
جارتىلاي بىتەلگەن كەزدە ادام قيىن بولسا دا تىنىس الىپ، جوتەلىپ، سويلەي الادى. ال تولىق بىتەلگەندە ول مۇمكىن ەمەس. مۇنداي جاعدايدا ادام تاماعىن قىسىپ ۇستاپ، قولدارى قالتىراي باستايدى.
شاشالىپ قالساڭىز، نە ىستەۋىڭىز كەرەك
ەڭ اۋەلى، تىنىشتالۋعا تىرىسىڭىز. ۇرەي وزىڭىزگە كومەكتەسۋ ءۇشىن ويىڭىزدى جيناقتاۋعا مۇمكىندىك بەرمەيدى، تەك جاعدايدى ۋشىقتىرىپ جىبەرەدى.
بارىنشا قاتتى جوتەلۋگە تىرىسىڭىز: بۇل ءبىزدىڭ نەگىزگى تابيعي قورعانىسىمىز. جوتەلدى كۇشەيتۋ ءۇشىن بۇگىلۋگە بولادى. مۇنداي كەزدە قۇرساق بۇلشىقەتى كومەكتەسەدى.
قانداي جاعداي بولماسىن، جوتەلدى باسۋعا تىرىسپاڭىز. بۇل جاعدايدى قيىنداتىپ جىبەرەدى.
ەگەر جانىڭىزدا اينا بولسا، سونى قولدانىڭىز: اۋزىڭىزدى اشىپ، ءتىلىڭىزدى جاعىڭىزعا قاراي قولىڭىزبەن تومەن باسىڭىز دا، ونى جوعارى كوتەرىپ جانە ازداپ العا تارتىڭىز. بۇل كورۋدى جاقسارتادى. ەگەر بوگدە زاتتى كورسەڭىز، ونى ساۋساعىڭىزدى ارلى-بەرلى قوزعالتۋ ارقىلى ورنىنان قوزعالتۋعا تىرىسىپ، الىپ تاستاڭىز.
تاماققا تۇرىپ قالعان زاتتى ەكى ساۋساقپەن ۇستاپ الۋعا تىرىسپاڭىز. ولاي ىستەسەڭىز ءسىز ونى ءارى قاراي يتەرىپ، جاعدايدى قيىنداتىپ جىبەرۋىڭىز مۇمكىن.
تۇنشىعىپ بارا جاتساڭىز نە ىستەۋ كەرەك
مۇنداي جاعدايدى ادامنىڭ وزىنە كومەكتەسۋىنە ءبىر جارىم مينۋتتاي عانا ۋاقىتى بار. سودان كەيىن ادامداردىڭ كوپشىلىگى ەسىنەن تانىپ، امان قالۋ مۇمكىندىگىنەن ايىرىلىپ قالادى.
1. قاتتى ەنسىز زاتتى قولدانىڭىز
بۇل ورىندىقتىڭ ارقالىعى (دوڭگەلەكتى ورىندىق ەمەس)، ۆانناننىڭ جاقتاۋى سياقتى زاتتار بولۋى مۇمكىن. ەڭ باستىسى اسىلىپ تۇرا الاتىنداي بولۋىڭىز كەرەك.
ءىشىڭىزدىڭ جوعارعى جاعى تاڭداپ العان زاتىڭىزدىڭ قاتتى جاقتاۋىنا تىرەلىپ تۇراتىنداي ەڭكەيىڭىز. اياعىڭىزدى بوس ۇستاپ، الگى زاتقا تەز اسىلا كەتىڭىز. ىشكە تۇسكەن قىسىم ديافراگما ارقىلى وكپەگە بەرىلەدى. بۇل بوگدە زاتتى سىرتقا يتەرىپ شىعارۋعا مۇمكىندىك بەرەدى. بۇل ءادىس قۇتقارۋشىلار تاجىريبەسىندە ەڭ ناتيجەلى بولىپ ەسەپتەلەدى.
2. گەيمليح ءادىسىن قولدانىڭىز
ءبىر قولىڭىزدىڭ جۇدىرىعىن ءتۇيىڭىز. جۇدىرىعىڭىزدىڭ باس بارماعىن كىندىگىڭىزدەن 2-3 سانتيمەتر جوعارى ىشىڭىزگە تىرەپ تۇرىڭىز. جۇدىرىقتى ەكىنشى قولىڭىزبەن قىسىپ ۇستاپ، بارماعىڭىزبەن ءىشىڭىزدى جانە جوعارى باعىتتاپ بەس رەت قاتتى-قاتتى قىسىپ جىبەرىڭىز.
كۇشتىڭ ءتۇسۋ نۇكتەسىنىڭ جايسىزدىعىنان جانە قاقالعان ادامنىڭ اۋا جەتپەگەندىكتەن السىرەپ قالۋىنان بۇل ءادىستى وتە سەنىمدى دەپ ەسەپتەمەيدى. گەيمليح ءادىسىن جانىنداعى ادامنىڭ جاساعانى جاقسى ناتيجە بەرەدى.
3. ەدەنگە قۇلاپ ءتۇسىڭىز
تىزەرلەپ تۇرىپ، قولىڭىزدى بۇكپەي ەدەنگە سۇيەنىڭىز. قولىڭىزدى ەكى جاققا تەز جايىپ جىبەرىڭىز دە، كەۋدەڭىزبەن ەدەنگە قۇلاپ ءتۇسىڭىز. سوققى وكپەدەگى قىسىمدى ارتتىرىپ، بوگدە زات تىنىس الۋ جولدارىنان سىرتقا ۇشىپ شىعۋى مۇمكىن.
نەگىزى بۇل ءادىس تەك تەوريا جۇزىندە ايتىلادى. ونى بايقاپ كورۋگە بولا ما، جوق پا – بەلگىسىز.
شاشالىپ قالماۋ ءۇشىن قالاي تاماقتانۋ كەرەك
— استى ازدان تىستەپ، ابدەن شايناڭىز. مۇنداي جاعدايدا شاشالىپ قالۋ ءقاۋپى ايتارلىقتاي تومەندەيدى.
— جانىڭىزدا تاماقتان سوڭ ءىشۋ ءۇشىن شىرىن، ءسۇت، سالقىن شاي سياقتى سۋسىندار بولسىن.
— ەڭ باستىسى — اسىقپاڭىز. ءجۇرىپ بارا جاتىپ تاماقتانباڭىز: بۇل باسقا نارسەگە نازارىڭىزدى اۋدارتىپ، تاماقتىڭ كىشكەنتاي كەسەگىنىڭ وزىنە قاقالىپ قالۋىڭىز مۇمكىن. ال ەگەر وتىرۋعا ۋاقىتىڭىز بولماسا، وندا تەرەڭ تىنىس الىپ، تاماقتى اسىقپاي جەۋگە تىرىسىڭىز.
ءدامدى تاعامدى اسىقپاي ءدامىن الىپ جەۋ — ءوزىڭىزدى جايسىز جاعدايدان قورعاۋدىڭ جاقسى ءادىسى.
You Might Also Like
-
ءتۇرلى ستيلدەگى سۋرەت ۇلگىلەرى. سۋرەت سالۋعا قىزىعۋشىلار ءۇشىن ءتۇرلى ستيلدەگى سۋرەتتەر جيىنتىعى
