InfoHub Logo

جاپونيانىڭ ينجەنەر-ارحيتەكتورلارى سەيسميكالىق ايماقتاردا ءۇي سالۋدىڭ جاڭا مودەلدەرىنە كوشتى. مۇنداي ۇلى ينجەنەرلىك-ارحيتەكتۋرالىق شەشىم جاپوندىق مامانداردىڭ ويىنا فۋكۋسيما اەس-ى جارىلعاننان كەيىن كەلگەن.

وسىدان ءبىراز ۋاقىت بۇرىن جاپونيانىڭ حونسيۋ ارالىندا فۋكۋسيما اەس-ى جارىلىپ، مىڭداعان ادام قىرىلىپ، 130 ملرد دوللار شىعىنعا باتقان بولاتىن. مىنە، سول تاريحي اپاتتان كەيىن جاپون عالىمدارى وسىنداي ۇلى يدەيالاردى ىسكە اسىرىپ وتىر. ەلدەگى «Air Danshin» كومپانياسىنىڭ عالىمدارى مەن ماماندارى جەر قوزعالعاندا اسپانعا كوتەرىلىپ كەتەتىن ءۇيدىڭ كونسترۋكسياسىن جاساپ شىقتى. ءۇيدىڭ تومەنگى فۋندامەنتىنە سەنسورلىق قۇرىلعىلار قويىلعان. بۇل تومەن ورنالاسقان قۇرىلعىلار جەر قوزعالعان ۋاقىتتا تولقىنداردىڭ جيىلىگىن فيكساسيالاپ، جوعارى جۇيەلەرگە سيگنالدار جىبەرىپ، جەردىڭ قوزعالىپ جاتقانىنان حابار بەرەدى. ءدال وسى ساتتە سيگنالداردىڭ جيىلىگىن قابىلداعان قۋاتتى كومپرەسسورلار عيمارات پەن فۋندامەنت اراسىنداعى جايماعا (پودۋشكا) ۇلكەن كۇشپەن اۋانى جىبەرەدى. بۇل پروسەسس نەبارى 5-7 سەكۋند ىشىندە عانا ىسكە اسادى. سەبەبى، عيمارات قيراپ قالماۋ ءۇشىن پروسەسستىڭ ورىندالۋىن ماماندار وسىلاي تەز جەتىلدىرىپ، قامتاماسىز ەتكەن.

قۋاتتى كومپرەسسورمەن ۇرلەنگەن پودۋشكا نەمەسە جايما 5-7 سەكۋند ىشىندە 4-5 سم بيىكتىككە عيماراتتى جوعارى كوتەرىپ جىبەرەدى.  وسىنىڭ ءوزى عيماراتتى قيراۋدان، ادامداردىڭ ءومىرىن ساقتاپ قالۋعا تولىق جەتكىلىكتى بولادى. پودۋشكا اۋانى جەتكىلىكتى كولەمدە قابىلداپ، كومپەنساسيالاپ، عيماراتتى جەر سىلكىنىسى توقتاعانشا اۋادا كوتەرىپ تۇرادى. پودۋشكامەن بىرگە عيماراتتىڭ ءوزى دە جەردىڭ تەربەلىس امپليتۋداسىمەن بىرگە اۋادا قوزعالىپ تۇرا بەرەدى. بۇل عىلىمي ونەرتابىس عيماراتتى 7-9 باللدىق جەر سىلكىنىسىنەن دە قورعاپ قالا الادى.

ءدال ءقازىر جاپونيادا 9000 ۇيگە وسى قۇرىلعىلار قابىلدانىپ، جەر سىلكىنگەندە قاۋىپسىزدىك شارالارى ىسكە اسىپ جاتىر. بۇل تەحنولوگيا قىمبات بولعانىمەن، جەر سىلكىنىسى وتە ءجيى قايتالاناتىن جاپونيا ءۇشىن تاپتىرماس ينجەنەرلىك شەشىم بولدى دەپ سانايدى جاپوندىقتار.

---