كەمپىر مەن ارۋاق
باياعىدا ءبىر قۋ جىگىت بولىپتى. ول ۇنەمى ەل ارالاپ قوجا-مولدانى كۇلكى ەتىپ، جارلى-جاقىبايدى جادىراتىپ جۇرەدى ەكەن. ءبىر كۇنى ەل ارالاپ كەلە جاتقان الگى قۋ جىگىت ءبىر ناۋقاس كەمپىردىڭ ۇيىنە تاپ بولعان ەكەن دەيدى.
اۋرۋىنان قورىققان كەمپىر موللا جانە بالگەر شاقىرتىپ، كۇندە بال اشتىرىپ، قۇمالاق سالدىرىپ وتىرادى ەكەن. ال موللاكەڭ اڭقاۋ كەمپىردى الداپ، اللا اتىنان اقى الىپ وتىرادى. مۇنى بىلگەن قۋ جىگىت موللانى ءبىر قاتىرۋدى ويلايدى دا كەمپىردىڭ بالاسىنا شەشەسىنىڭ ءبىر كەزەك كيىمىن ۇرلاتىپ الدىرادى.
جىگىت، موللاعا تۇندە كەلىپ كەمپىردىڭ بالاسى بولىپ:
— اپام قايتىس بولدى. تاڭەرتەڭ جانازاسىنا كەلىڭىز، – دەپ كەتىپ قالادى. موللا ەرتەمەن كەلە جاتسا تۇندە «ءولدى» دەگەن كەمپىر وتىر. ول موللاعا تاپ بەرىپ باقىرا جونەلەدى. زارەسى ۇشقان موللا يمانىن ايتىپ تۇرا قاشادى. كەمپىر تارسىلداتىپ قۋا بەرەدى. ونىڭ قۋ جىگىت ەكەنىن موللا بىلمەيدى. ەسى كىرەسىلى-شىعاسىلى بولىپ ابدەن ۇرەيى ۇشقان موللا ازەر دەپ كەمپىردىڭ اۋىلىنا جەتەدى.
ارتىنا قاراسا تۇك جوق. بوساپ كەتكەن كىسەسى سالبىراپ تۇر. ارۋاق قۋدى دەپ كۇنى بويى قاشقانى كىسەنىڭ جانىن سوعىپ تارسىلداعانى ەكەن. موللا ەنتىگىن باسىپ ۇيگە كىرسە الگى كەمپىر الدىندا وتىر. شوشىنعاننان موللانىڭ ءتىلى كۇرمەلىپ قالادى. بالاسى ەكەۋى جابىلىپ ءجۇرىپ ەسىن ازەر جيعىزادى. تىلگە كەلگەن موللا اسىپ-ساسىپ كەمپىرگە ءوزىڭدى جولدا كوردىم، تۇندە ولگەنىڭ قايدا، ارۋاعىڭ اناۋ جولدا جۇرگەن، ءوزىڭ مىناۋ ءتىرى وتىرعان، – دەيدى.
كەمپىر مەنى ءولتىرىپ دۇنيەمدى العالى ءجۇرسىڭ دەپ ويباي ساپ، ەلدى جيىپ، موللانى اۋىلدان قۋىپ جىبەرىپتى. ەشنارسەنىڭ بايىبىنا بارماي ابدەن شوشىعان دۇمشە اۋىلىنا بارار جولداعى ارۋاقتان شوشىپ باسقا جولمەن كەتىپ ءالى كۇنگە دەيىن اداسىپ جۇرسە كەرەك.
You Might Also Like
-
جامبىل ساۋلەبەك ۇلى اقىلبايەۆ – ۇلاعاتتى ۇستاز، عاجاپ عالىم، ارداقتى ازامات دەسەك ارتىق ايتقاندىق ەمەس. ول كىسىنىڭ ءومىر جولىن سارالاپ وتىرساڭىز، ول – عالىم-فيزيك، تەحنيكا عىلىمدارىنىڭ دوك...
-
قىرىققانباس پەن نازار اعايىندى ەكەۋى دە باتىر ەكەن. قىرىققانباس باتىردىڭ ەر كەۋدە ەرلىگىمەن دە، قايىسپاس كايسارلىعىمەن دە، شالدىرماس شەشەندىگىمەن دە اتى التى الاشقا كەڭ جايىلىپتى. سول باتىر ەرەگەسپ...
