كەشكى دايىندىق كۋرسى
كەشكى دايىندىق كۋرسىنىڭ ساباعى ىمىرت ۇيىرىلە باستالىپ، تۇندە اياقتالاتىن. ەگەر ءسىز سىرتقى جارىعى جارقىراپ جانىپ تۇرعان وقۋ عيماراتىنىڭ ىشىنە كىرسەڭىز، وندا قورشاۋدىڭ ارعى جاعىنداعى قاتار-قاتار تۇرعان كيىمىلگىشتەردى بايقار ەدىڭىز. بۇل كيىمىلگىشتەردە مانا عانا كۇندىزگى ءبولىم ستۋدەنتتەرىنىڭ سىرت كيىمدەرى ءىلۋلى تۇرعان. ەندى عيمارات ىشىندە كۇندىزگى ابىر-سابىر تىرشىلىك جوق، تىنىشتىق. ەگەر ءسىز جارىعى سەبەزگىلەپ جانىپ تۇرعان ۇزىنشا ءدالىزدى بويلاي جۇرە بەرسەڭىز، وندا الدىڭىزدان قاتار-قاتار تۇرعان وقۋ ءدارىسحانالارىن كورەر ەدىڭىز. بۇل ءدارىسحانالاردا مانا عانا كۇندىزگى ءبولىمنىڭ ستۋدەنتتەرى ساباق وقىعان. ەندى ول ءدارىسحانالار ەسىگى جابۋلى، شامى ءسوندىرۋلى كۇيىندە مۇلگىپ تۇر. كەشكى دايىندىق كۋرسىنىڭ تىڭداۋشىلارى ءۇشىن كۇندىزگى ءبولىمنىڭ ستۋدەنتى اتانۋ – ۇلكەن ارمان. ويتكەنى ولار كۇندىزگى دايىندىق كۋرسىنىڭ تىڭداۋشىلارى دا ەمەس قوي. ەگەر وسى قالپىڭىزبەن عيماراتتىڭ جوعارى قاباتىنا كوتەرىلسەڭىز، مۇندا دا مۇلگىگەن تىنىشتىق. تەك تۇكپىردەگى جارىعى جانىپ تۇرعان ءبىر ءدارىسحانادا كەشكى دايىندىق كۋرسىنىڭ تىڭداۋشىلارى ساباق وقىپ جاتىر. ولارعا مەكتەپ ءمۇعالىمى ساباق بەرەدى. وسى ءبىر قالالىق مەكتەپتىڭ تاجىريبەلى ەر ءمۇعالىمى كەشكى دايىندىق كۋرسىنىڭ تىڭداۋشىلارىن الدا بولاتىن كۇندىزگى ءبولىمنىڭ ءتۇسۋ ەمتيحاندارىنا قازاق ءتىلى جانە قازاق ادەبيەتى پاندەرىنەن ازىرلەۋدە. ءمۇعالىمدى تاعى ءبىر ءوقىتۋشى-مۇعالىم الماستىرادى. ول كەشكى دايىندىق كۋرسىنىڭ تىڭداۋشىلارىن الداعى ءتۇسۋ ەمتيحاندارىنا تاريح پەن قوعامتانۋ پاندەرىنەن ازىرلەۋدە. سەبەبى بولاشاق قازاق ءتىلى مەن ادەبيەتى ءپانىنىڭ ءمۇعالىمى بولامىن دەگەن تالاپكەر قازاق ءتىلى مەن ادەبيەتىنەن جازباشا، قازاق ءتىلى مەن ادەبيەتىنەن اۋىزشا ءتۇسۋ ەمتيحاندارىن تاپسىرىپ بولعاننان كەيىن، مىندەتتى تۇردە وسى ەكى ءپاننىڭ بىرىنەن ەمتيحان-سىناق تاپسىرادى. ءبىراق تىڭداۋشى وسى ەكى ءپاننىڭ قايسىسىنان ەمتيحان-سىناق تاپسىراتىندىعىن ءال-ازىر بىلمەيدى. ونى وقىتۋشى دا بىلمەيدى. ول كەيىنىرەك بەلگىلى بولادى. سوندىقتان تىڭداۋشى وسى ەكى ءپاننىڭ ەكەۋىنە دە كۇنىبۇرىن ازىرلەنە بەرۋگە ءماجبۇر. سول جولعى سىناق قوعامتانۋ پانىنەن تۇسكەن ەدى. بۇل ەمتيحان-سىناقتىڭ وزىندىك اۋىرلىعى بولدى. ونىڭ ءۇش ءتۇرلى سەبەبى بار. بىرىنشىدەن، قوعامتانۋدىڭ وزىنە ءتان كوتەرەر جۇگى بار ءپان؛ ەكىنشىدەن، بۇل ەمتيحان-سىناقتىڭ كوميسسيا مۇشەلەرى سانىنىڭ الدىڭعى ەمتيحانعا قاراعاندا كوپتىگى؛ ال، ۇشىنشىدەن، ءدارىسحاناعا كامەرانىڭ قويىلعاندىعى ەدى. كامەرا ءدارىسحانانىڭ ءىشىن ءتۇسىرىپ تۇر، ول اۋلاداعى حالىققا تىكە تەلەديدار ارقىلى كورسەتىلۋدە. وندا ابيتۋريەنتتىڭ اتا-اناسى نەمەسە جاقىندارى تۇرۋى مۇمكىن عوي. وزگە دە ابيتۋريەنتتەر تۇرادى. بۇل ەمتيحاننىڭ جاريالىلىعى ءۇشىن ىستەلگەن. ياعني ءدارىسحاناداعى ابيتۋريەنت العان بيلەتىنە جاۋاپ بەرىپ جاتىر ما، جوق پا، سويلەپ جاتىر ما، جوق پا، وسىنى سىرتتاعى ادامدار تەلەديدار ارقىلى كورىپ تۇرسىن دەگەن. اۋىزشا ەمتيحان تاپسىرۋدىڭ وزىندىك ەرەكشەلىگى بار ەكەندىگى بەلگىلى. بىردە وبلىس ورتالىعىنداعى ورىس ءتىلدى مەكتەپتى التىن مەدالمەن ءبىتىرىپ شىققان ۇلتى كارىس قىز ەمتيحان تاپسىرادى. ەگەر ول وسى ەمتيحانىن «5»-كە تاپسىرىپ شىقسا، جالعىز ەمتيحاننىڭ ناتيجەسىمەن-اق وقۋعا بىردەن ءتۇسىپ كەتەتىن بولسا كەرەك. ەمتيحان تاريحتان، ال بيلەتتەگى سۇراق «ۇلى وكتيابر سوسياليستىك ريەۆوليۋسياسىنىڭ ماڭىزى» دەگەن سۇراق بولىپتى. تالاپكەر، ارينە، بارىن سالادى. ول سارتىلداپ تۇرىپ جاۋاپ بەرەدى. ال ناتيجەسىندە كوميسسيا وعان «4» قويادى. كارىس قىز اشۋلانادى. «سىزدەر نە دەگەن ادىلەتسىز ەدىڭىزدەر، – دەيدى ول كوميسسيا مۇشەلەرىنە. – مەن ءبارىن ايتىپ بەردىم عوي». «ءيا، سەنىڭ ءبارىن ايتىپ بەرگەنىڭ راس، – دەيدى وعان كوميسسيا مۇشەلەرى. – ءبىراق سەن بيلەتتىڭ سۇراعىنا جاۋاپ بەرگەن جوقسىڭ. سەنىڭ بيلەتىڭنىڭ سۇراعى «ۇلى وكتيابر سوسياليستىك ريەۆوليۋسياسىنىڭ ماڭىزى» بولاتىن. سەن ۇلى وكتيابر سوسياليستىك ريەۆوليۋسياسى تۋرالى ءبارىن ايتىپ بەردىڭ، ءبىراق ماڭىزى تۋرالى ەشتەڭە دە ايتقان جوقسىڭ»، – دەپتى. كوميسسيادا بولعان مامان كۇلەتىن: «ءوزى بيلەتىنىڭ سۇراعىنا جاۋاپ بەرە الماي تۇرىپ، بىزبەن داۋلاسقىسى كەلەدى تاعى»، – دەيدى. ول – ءوز سالاسىنىڭ بىلىكتى مامانى. ال تەست ادىسىمەن ەمتيحان تاپسىرۋدىڭ بۇدان بولەكشەلىگى بار ەكەندىگى دە بەلگىلى.
كۋرستا ستاروستا جىگىت بار. ول تۋمىسىنان وبلىس ورتالىعىنداعى وسى قالادا تۋىپ-وسكەن. بىلىكتى، ساۋاتتى، ەكى جىلدىق اسكەر قاتارىنان كەلگەن، ءوزى كومسومول مۇشەسى وسى ءبىر جىگىتتىڭ ناماز وقيتىندىعى كەڭەستىك مەكتەپتەن شىققان ونىڭ كۋرستاستارىن تاڭعالدىراتىن. مەكەمەلەردىڭ توبەسىندە وراق پەن بالعانىڭ سۋرەتى سالىنعان جالاۋ جەلبىرەيدى. ستاروستا جىگىتكە ناماز وقۋدى اجە ۇيرەتكەن. ستاروستا جىگىتتىڭ ۇيىندە وزىمەن بىرگە تۇراتىن اجەسى نەمەرەسىنە: «ءدۇنياۋي وقۋىڭدى وقىساڭ وقى، اسكەرىڭە بارساڭ بار، كومسومول مۇشەسى بولساڭ بول، ءبىراق تۇبىندە وسى ناماز سۇرالادى»، – دەپتى. سوندىقتان ستاروستا جىگىت يمان كەلتىرگەن.
ساباق اياقتالا بەرە جىگىتتەر قىزداردى ايالدامالارىنا دەيىن شىعارىپ سالادى. الىستا تۇراتىن قىزداردى اۆتوبۋستارىنا وتىرعىزىپ جىبەرەدى، ورتالىقتا تۇراتىن قىزداردى ۇيلەرىنە دەيىن جەتكىزىپ سالادى. ءبىراق ستاروستا جىگىت بۇل توپقا قوسىلمايتىن. ونىڭ ءۇيى وقۋ عيماراتىنان تىم الىس ەمەس. ساباقتان شىققان سوڭ قىز-جىگىتتەرمەن از-كەم اڭگىمەلەسىپ تۇرادى دا، سىپايى قوشتاسىپ، ۇيىنە بەتتەيدى. ءبىر كۇنى ول ساباققا كەلمەي قالدى. ول سول كۇيى كۋرستىڭ ساباعىنا قاتىسپاي كەتكەن ەدى.
ەندى ستاروستا بولىپ وسى توپتاعى اۋداننىڭ ورتالىعىنان كەلىپ وقىپ جاتقان اق سارى قىز سايلاندى. اق سارى قىزدىڭ وسى كۋرستا تۋمىسىنان وسى قالادا ءوسىپ كەلە جاتقان قارا قىز قۇربىسى بار ەدى. ولار كۋرسقا كەلگەندە تانىسقان. كۋرستاعى قىزدار وسى ەكى قىزدىڭ ماڭايىنا ۇيىرىلەدى. قارا قىز كۋرستاستارىمەن دوستىققا ادال، اقجارقىن مىنەزدى. ونىڭ قۇربىسى اق سارى قىز دا سونداي.
ءبىر كۇنى وسى قارا قىز دا ساباققا كەلمەي قالدى. ونى وسى كەزدە كۋرستاستارى الاڭداپ ىزدەي باستادى. سويتسە، قارا قىزدى بىرەۋلەر پىشاقتاپ كەتكەن ەكەن.
قارا قىز وبلىستىق اۋرۋحانانىڭ الدىندا ءوزىنىڭ كۋرستاستارىنا باسىنان وتكەن جاعدايدى بايانداپ وتىر:
– ءبىزدىڭ ءۇيىمىز دە قالانىڭ تىم قيىر شەتىندە عوي، ءوزى. ول جاققا اۆتوبۋس تا سيرەك قاتىنايدى. كوز بايلانا باستاعان شاق قوي. ساباققا شىقتىم. ءوزىم ايالدامادا قورقىپ تۇرعانمىن. ءبىراق ايالدامادا مەنەن باسقا تاعى دا ەكى ادام تۇردى. ونىڭ ءبىرى ايەل ادام بولعان سوڭ، سونى ارقا تۇتىپ تۇرعان ەدىم. مەن ولاردى قاراپايىم ەرلى-زايىپتى جاندار ەكەن دەپ ويلاسام... سويتسەم، ولار بۇرىن ءىستى بولعان جاندار ەكەن عوي. ولاردى ميليسيونەرلەر ۇستاپتى.
مەن ايالدامانىڭ مىنا شەتىندە تۇردىم. ال ولار بولسا ايالدامانىڭ انا شەتىندە تۇردى. وسى قۇلاعىمداعى التىن سىرعانىڭ دا كىناسى بولدى-اۋ دەيمىن. سۆەتتىڭ جارىعىنا شاعىلىسىپ، الگىلەردى وزىمە شاقىرىپ تۇردىم با ەكەن؟ قاس قىلعانداي، اۆتوبۋس تا كەلە قويمادى. الدىندا الگى ەكەۋى كۇبىرلەسىپ، سويلەسىپ تۇرعان ەدى. سويتسەم، جوسپارلارىن قۇرىپ تۇر ەكەن عوي. ەندى ەكەۋى ماعان قاراي كەلە جاتقان كەزدە، مەن ويىما ەش كۇدىك العان جوقپىن. ولار كەلە سالىپ، مەنى ۇرىپ-سوعا باستادى. ءسويتتى دە، ايالدامانىڭ ارتىنا قاراي سۇيرەلەي جونەلدى. ايالداما بيىكتىڭ ۇستىنە سالىنعان عوي. ال ايالدامانىڭ ارتىندا، تومەندە سۋ جينالىپ قالعان كولشىك شۇڭقىر بار ەدى. ولار مەنى سول كولشىككە قاراي سۇيرەلەدى. دەنەمە پىشاقتىڭ كىرىپ جاتقانىن وسى كەزدە سەزدىم. ولار مەنى كولشىككە اكەلدى دە، سۋعا لاقتىرىپ جىبەردى. مەن سۋعا تۇنشىعىپ بارا جاتتىم...
– ستاروستا جىگىت دۇرىس ايتىپ ءجۇر، – دەدى وسى كەزدە قارا قىز بۇرىنعى ستاروستا جىگىت تۋرالى. – ول – دۇرىس جولدا جۇرگەن جىگىت. جاراتقان يەمىزدىڭ بار ەكەندىگى انىق. ايتەۋىر بىزدەن باسقا ءبىر تىلسىم كۇش بار. سۋعا تۇنشىعىپ بارا جاتقان كەزىمدە قۇلاعىما ءبىر داۋىس كەلدى. اپ-انىق ەستىدىم. «شىدا، شىدا، ءقازىر انالار كەتەدى، سونان سوڭ سۋدان شىق»، – دەدى الگى داۋىس. سۋدان ەڭبەكتەپ شىققانىمدى عانا بىلەم. كوزىمە ءبىر جارقىراعان جارىق كورىندى. كەيىن بىلسەم، تاياۋ ماڭدا تۇرعان ءۇيدىڭ اۋلاسىندا جانىپ تۇرعان جارىق ەكەن عوي. تەك سول جارىقتان ايىرىلىپ قالمايىن دەپ ەڭبەكتەي بەرىپپىن. سوندا قانىم سورعالاعان كۇيى ەڭبەكتەپ كەلە جاتقان ەكەنمىن عوي. الگى ءۇيدىڭ اۋلاسىنا كىرە بەرە ەسىمنەن ايىرىلىپ قالىپپىن. وسى كەزدە الگى ءۇيدىڭ ەر-ازاماتى تەمەكى شەگۋگە تىسقا شىعادى. اۋلادا بىرەۋدىڭ جاتقانىن كورەدى. دەرەۋ كەلىنشەگىن كومەككە شاقىرادى. ەكەۋلەپ ءجۇرىپ جەدەل جاردەم شاقىرىپ، سالىپ جىبەرگەن ەكەن.
– مەنىڭ شاشىمدى دارىگەرلەر تىقىرلاپ الىپ تاستادى، – دەدى قارا قىز. ول باسىنا ورامال تارتىپ العان ەدى. – ويتكەنى پىشاق باسىما دا تيگەن.
– قورقامىز، – دەدى قىزدار. – ساباعىمىز تۇندە اياقتالادى.
– ساباقتارىڭنان قالماڭدار، – دەدى قارا قىز. – مەن ەندى ساباققا قاتىسا المايتىن شىعارمىن. سەندەر وقىڭدار. وسى كۋرستى ءبىتىرىپ قالايدا جوعارى وقۋ ورىندارىنا تۇسۋلەرىڭە تىلەكشىمىن!
كۋرستىڭ ساباعى جالعاسىپ جاتتى. ءبىر كۇنى ستاروستا قىز:
– جىگىتتەر، مەنى ۇيگە دەيىن شىعارىپ سالىڭدارشى. مەن قورقىپ ءجۇرمىن، – دەدى.
– نەدەن قورقاسىڭ؟ – دەدى جىگىتتەر. – جىگىتىڭ بار ەمەس پە؟
اق سارى قىزدىڭ زاۋىتتا جۇمىسشى بولىپ ىستەيتىن، مىعىم دەنەلى كەلگەن جىگىتى بار ەدى. ول بۇرىن اق سارى قىزدى شىعارىپ سالۋعا كەپ تۇراتىن. سونداي كەزدىڭ بىرىندە اق سارى قىز جىگىتىن جىگىتتەرمەن تانىستىرعان. جىگىتتەرگە اق سارى قىزدىڭ جىگىتى سوزىنە مىعىم، ءوزىن جىگىتتەرگە سىيلاتا الاتىنداي جىگىت كورىنگەن. اق سارى قىز دا جىگىتى وزىنەن بىر-ەكى جاس قانا ۇلكەن بولسا دا، «ءسىز» دەپ سويلەيدى. «اۋەلدە تانىسقاندا ەكەۋمىز دە بىر-بىرىمىزگە «ءسىز» دەپ سويلەيتىنبىز، – دەيدى اق سارى قىز. – سونان سوڭ ومىرگە بىرگە قادام باسۋعا ۋاعدالاسقان ساتتەن باستاپ، جىگىتىم ماعان سەن دەپ سويلەيتىن بولدى. مەن وعان «ءسىز» دەپ سويلەيمىن. بۇل – جىگىتىمدى سىيلاعانىم. ونىڭ الدىندا تىم قاتتى ەركەلەپ، شولجاڭداپ كەتكىم كەلمەيدى. وسىلاي سويلەگەنىم ءوزىمدى جىگىتىمنىڭ الدىندا ورنىمەن ۇستاۋىما كومەكتەسەدى»، – دەيدى اق سارى قىز. اق سارى قىزعا جاقىن جۇرەتىن قىزدار دا ولاردىڭ ماحابباتىنا قىزىعاتىن: «ماحاببات بولعان سوڭ وسىلاي بولۋ كەرەك قوي! ەكەۋى ءبىر-بىرىن كەرەمەت سىيلايدى»، – دەيدى.
«نەدەن قورقاسىڭ؟ جىگىتىڭ بار ەمەس پە؟» دەگەن جىگىتتەردىڭ سۇراعىنا اق سارى قىز: «جىگىتىم بۇگىن تۇنگى اۋىسىمعا تۇسەتىن ەدى. مەن ءبىر جىگىتتەن قورقىپ ءجۇرمىن. ول ىزىمنەن قالماي ءجۇر. جىگىتىم بار دەسەم، تۇسىنبەيدى. سول جىگىت الىپ قاشىپ كەتە مە دەپ قورقامىن»، – دەدى
سول كۇنى جىگىتتەر اق سارى قىزدى ۇيىنە دەيىن شىعارىپ سالدى. اق سارى قىز مولتەكاۋداندا تۇراتىن. ءبىراق ونى جىگىتتەر ۇنەمى ۇيىنە دەيىن شىعارىپ سالىپ جۇرە المايتىن ەدى. ءبىر كۇنى اق سارى قىز دا ساباققا كەلمەي قالدى. سويتسە، ول تۇرمىسقا شىعىپ كەتكەن ەكەن. ەندىگى اڭگىمەنى اق سارى قىزدىڭ ءوزى ايتسىن:
– «اڭدىعان جاۋ الماي قويمايدى» دەگەن بار عوي. الگى جىگىت اقىرى الىپ قاشتى. الدىم بولسا ءتۇن. قارسىلاسقاننان پايدا جوعىن ءتۇسىندىم. قارسىلاسا بەرسەم، ودان دا زور جاماندىق كەلتىرىپ جۇرەر دەپ ويلادىم. ايلاعا كوشتىم. «ءبارىبىر جەتى تۇندە كەشىرىمگە ادام جىبەرە المايسىزدار عوي. كەشىرىمگە تاڭەرتەڭ جىبەرەسىزدەر. ءبىراق مەنى ءۇيىم قايدا كەتتى دەپ ىزدەيدى عوي. سوندىقتان سىڭلىمە قوڭىراۋ شالىپ، وعان تۇرمىسقا شىعىپ كەتكەنىمدى ەسكەرتىپ قويايىن»، – دەدىم. وسىلاي تەلەفون سوعۋعا مۇرسات سۇراپ الدىم. سىڭلىمە قوڭىراۋ شالىپ: «دەرەۋ شىنتاسقا حابار بەر»، – دەدىم. الدىندا سىڭلىمە ەسكەرتىپ قويىپ جۇرگەنمىن عوي، ەگەر سونداي جاعداي بولىپ جاتسا، ساعان حابارلاسا الىپ جاتسام، «سەن دەرەۋ شىنتاسقا حابار بەر، ونداي جاعدايدا مەنى تەك شىنتاس قانا قۇتقارىپ الادى» دەيتىنمىن. جىگىتىمە دە ەسكەرتىپ قويعان ەدىم. الگى جىگىتتىڭ تۇراتىن ءۇيىن، كوشەسىن سۇراپ العانمىن. جىگىتىم دەرەۋ جىگىتتەرىن ەرتىپ جەتىپ كەلدى. الىپ شىقتى. سوسىن جىگىتىمە ايتتىم: «شىنتاس، قازاقتا قىز بالانىڭ بوساعا اتتاپ شىعۋى دەگەن جاقسى ىرىم ەمەس قوي. ەندى مەن كەيىن قايتپاي-اق قويايىن. ۇيلەنۋ كۇنىن كەيىنگە بەلگىلەپ ءجۇر ەدىك. وسى كۇنگە بۇيرىق تۇسكەن شىعار. ەندى مەنى ءوزىڭنىڭ بوساعاڭنان كەلىن ەتىپ اتتاتىپ جىبەر»، – دەدىم. جىگىتىم ەكى سوزگە كەلگەن جوق. ءوزىنىڭ شاڭىراعىنا اپارىپ، كەلىن ەتىپ ءتۇسىردى.
– باقىتتىمىن، – دەدى اق سارى قىز. – مۇمكىن، قىز بالاعا وقۋ دا كەرەك شىعار، ءبىلىم دە كەرەك شىعار. ءبىراق ءوزىڭنىڭ سۇيگەن جىگىتىڭە قوسىلىپ، سونىڭ جانىندا بولعانعا نە جەتسىن؟! – مەن ەندى ساباققا قاتىسا المايتىن شىعارمىن، – دەدى ول. – مەن ەندى ءبىر ءۇيدىڭ كەلىنىمىن عوي. ءبىز، جىگىتىمىز ەكەۋمىز، ويلاسىپ، وقۋدى كەيىن سىرتتان وقيمىز دەپ شەشتىك. جىگىتىم دە زاۋىتتاعى جۇمىسىنان قول ۇزبەي ءجۇرىپ، ءبىلىم العىسى كەلەدى. – ءبىراق سەندەر وقىڭدار، – دەدى اق سارى قىز. ساباقتارىڭنان قالماڭدار. وسى كۋرستى ءبىتىرىپ قالايدا جوعارى وقۋ ورنىنا تۇسۋلەرىڭە تىلەكشىمىن!
مامىردا تىڭداۋشىلارعا كۋرستى بىتىرگەندىگى تۋرالى قۇجاتتارى بەرىلدى. قۇجاتتى تاپسىرىپ تۇرعان لاۋازىم يەسى: «ەگەر ءتۇسۋ ەمتيحاندارىڭدى تاپسىرىپ شىعا الىپ جاتساڭدار، وسى قاعازدىڭ كونكۋرستا ءبىر پايداسى ءتيۋى ءتيىس. ول سەندەرگە كونكۋرستا ءبىر باسىمدىق بەرەدى. ءبىراق بۇل قاعازدىڭ كۇشى وزگە وبلىس ورتالىعىنداعى وقۋ ورىندارىنا جۇرمەيدى»، – دەدى. بۇل جولعى تالاپكەرلەردى ەمتيحانداردان سوڭ قيىن كونكۋرس كۇتىپ تۇر ەدى. سەبەبى كوكشەتاۋدان 25 تالاپكەر، قاراقالپاق اسسر-ىنەن 4 تالاپكەر وسىندا كەلىپ وقۋى ءتيىس بولاتىن. ويتكەنى بۇل ايماق تىلدىك ورتانىڭ ساقتالعان ايماعى دەپ ەسەپتەلەتىن. ولار ءتۇسۋ ەمتيحاندارىن سول جاقتا تاپسىرعان. وسى سەبەپتى ايماقتىڭ ءوز تالاپكەرلەرىنىڭ اراسىندا 21 ورىنعا تالاستى كونكۋرس ءوتتى.
قۇجاتتىڭ بەتىندە تىڭداۋشىنىڭ كەشكى دايىندىق كۋرسىن بىتىرگەندىگى تۋرالى جازىلعان جالعىز سويلەم بار ەدى. ونىڭ استىندا دوڭگەلەك ءمور باسىلىپ، ءتيىستى لاۋازىم يەسىنىڭ قولى قويىلعان.
You Might Also Like
-
تاراز قالاسى، ەرەكشە دارىندى بالالارعا ارنالعان «دارىن» مەكتەپ-ينتەرناتى ساعىندىق قاراقات باۋىرجان قىزى جەتەكشىسى: سەيتجانوۆا گۋلافرەز باحيتوۆنا
-
بۇگىنگى كۇنى ەڭ ۇلكەن ىندەتكە اينالعان، اسىرەسە جاستارعا ءتونىپ تۇرعان ءقاۋىپتىڭ باسىندا ءسپيرتتى ىشىمدىك جانە ەسىرتكى تۇر. اراق-شاراپتان ادامعا كەلەتىن زياندى ەسەپتەپ شىعارۋدىڭ ءوزى قيىن. دەگەنم...
