InfoHub Logo

قاسيەتتى رامازان ايىنا دا امان-ساۋ جەتتىك. رامازان ايى شۇكىرشىلىك ايى،سابىر ايى جانە تاقۋالىق  ايى. ۇلىق ايعا امان-ەسەندىكپەن جەتكەننىڭ ءوزى ۇلكەن نىعمەت. جاراتقان يەمىز بارشامىزعا وسى ايداعى جاۋاپكەرشىلىكتى لايىقتى تۇردە اتقارۋعا مەدەت بەرىپ، جاردەم ەتكەي.

بۇرىنعى مۇسىلماندار وسىناۋ مۇباراك ايمەن قيماي قوشتاسىپ، ال كەلەسى جىلى قۇددى قىرىق جىل كورمەگەن قوناعىن كۇتكەندەي قۇشاق جايا قارسى الادى ەكەن. ويتكەنى بۇل اي ءاربىر جانعا مەيىرىمنىڭ ءبىر سىنىعىن سىيلايتىن ساۋابى مول ماۋسىم. ەندەشە سول ۇمبەتتىڭ جالعاسى بولىپ تابىلاتىن كەيىنگى ۇرپاق ءبىز دە ۇلى راحماننان ۇلىق رامازان ايىنىڭ بەرەكەسىن تىلەيمىز. مەيىرىم ماۋسىمىنىڭ ءيسى مۇسىلمانعا يگىلىكتى بولۋى ادام بالاسىنا بەرىلگەن ۇلكەن سىيدىڭ ءبىرى. ورازا-اللا مەن ادامنىڭ اراسىنداعى رياسىز قۇلشىلىق،تەك راببىمىزدىڭ رازىلىعىن كوزدەيتىن ۇلىق عيبادات. رامازان-رۋحاني جاڭارۋ ايى. اللانىڭ ادام بالاسىنا بەرىلگەن شەكسىز نىعمەتى،تەڭدەسسىز سىيى سانالعان ورازا-كۇناعا بەتپە-بەت كەلۋدەن ساقتايتىن،مىنەز قۇلقىمىزدى،رۋحاني دۇنيەمىزدى جاقسىلىققا تاربيەلەيتىن،رۋحاني تۇلەپ،تازاراتىن اي. يمان جولى سابىرلىق پەن تاقۋالىقتى تالاپ ەتەدى. ال،ورازا ناعىز،شىنايى تاقۋالىق پەن سابىرلىققا جەتەلەيدى. ءدال وسى ساۋابى مول ايدا ءدىنتانۋ جانە مادەنيەتتانۋ كافەدراسى مەن “نۇر” كلۋبى بىرلەسە وتىرىپ ستۋدەنتتەر مەن مۇمكىندىلىگى شەكتەۋلى جاندارعا اۋىز اشار ۇيىمداستىرىلدى. اۋىز اشار بارىسىندا ستۋدەنتتەر اراسىندا،ءدىني باعىتتاعى كوپتەگەن ساۋالدار قويىلىپ،جاۋابىن تاپقان قوناقتارعا ءدىني باعالى زاتتار بەرىلدى. ساۋالدار بارىسىندا يسلامنىڭ شارتتارى مەن ارداقتى پايعامبارىمىز مۇحاممەد (س. ا. س) ءومىربايانىنان ساۋالدار قويىلدى. اۋىز اشاردان كەيىن ستۋدەنتتەر «رۋحوردا» ءدىني مادەني مەدرەسەسىمەن جانە مۇراجايمەن تانىستى. مۇراجايدا مىڭجىلدىق تاريحى بار كىتاپتار مەن قۇندى زاتتاردى تاماشالاپ قايتتى. وسىنداي ساۋابى مول كەشتى ۇيىمداستىرعان كافەدرا مەڭگەرۋشىلەرى مەن ۇستازدارىمىزعا جانە اۋىز اشارعا ۇيىتقى بولا بىلگەن،مۇراجايدىڭ جەتەكشىسى، اعا وقىتۋشى جۇزەي مىرزاحمەت ۇستازىمىزعا ەرەكشە العىسىمىزدى بىلدىرەمىز.

ءال-فارابي اتىنداعى قازاق ۇلتتىق ۋنيۆەرسيتەتى 

ءدىنتانۋ جانە مادەنيەتتانۋ كافەدراسىنىڭ 3-كۋرس ستۋدەنتى ولجاحان شۇعىلا

جەتەكشى:اعا وقىتۋشى،phD دوكتور مۇقان نۇرزات.

---