كوللەدج ستۋدەنتتەرى ءوز قولىمەن دايىنداعان ءونىمىن ساتىپ، تابىس تابا الادى
ءبىلىم جانە عىلىم ءمينيسترى اسحات ايماعامبەتوۆ ءبىلىم بەرۋ ماسەلەلەرى بويىنشا زاڭناما تەحنيكالىق جانە كاسىپتىك ءبىلىم بەرۋ دەڭگەيىن قالاي قامتىعانىن ايتىپ بەردى.
مينيستر Facebook پاراقشاسىندا زاڭعا ەنگىزىلگەن وزگەرىستەرگە ساي، تەحنيكالىق جانە كاسىپتىك ءبىلىم بەرۋ جۇيەسىنە مىناداي ءتارتىپ ەنگىزىلگەنىن جازدى.
1. ەندى ستۋدەنتتەردىڭ دۋالدى جۇيەسى ارقىلى ءبىلىم العان مەرزىمى ەڭبەك ءوتىلى رەتىندە ەسەپتەلەدى. بۇل كوللەدج تۇلەكتەرىنىڭ جۇمىسقا ايتارلىقتاي تاجىريبەمەن ورنالاسۋ مۇمكىندىگىن ارتتىرادى.
2. بەكىتىلگەن زاڭناماعا سايكەس ۋاكىلەتتى ورگاننىڭ كوللەدجدەردە وقۋ مەرزىمدەرىن بەلگىلەۋى تۋرالى نورما الىنىپ تاستالدى. بۇعان دەيىن ءبىز ءار بىلىكتىلىكتەر بويىنشا ءبىلىم الۋ مەرزىمدەرىن قاتاڭ بەكىتەتىنبىز. ورتاشا ەسەپپەن العاندا، وقۋ مەرزىمى 2 جىلدان 3 جىل 10 ايعا دەيىن جالعاساتىن. ەندى وقۋ ۇزاقتىعى ناقتى ءبىلىم بەرۋ باعدارلاماسىنا جانە قاجەتتى وقۋ ناتيجەلەرىنە بايلانىستى بولادى. جاڭا وزگەرىستەرگە سايكەس كوللەدجدەر جۇمىس بەرۋشىلەرمەن كەلىسە وتىرىپ، كاسىپتىك ستاندارتتار نەمەسە نارىق تالاپتارى نەگىزىندە ءبىلىم بەرۋ باعدارلامالارىن ازىرلەيدى. كەيىن ونى ق ر بعم باعدارلامالارىنىڭ تىزىلىمىنە قوسىپ، سوعان بايلانىستى كادرلار دايىندايدى.
3. كوللەدج وكىلدەرى كوتەرگەن تاعى ءبىر ماسەلە شەشىمىن تاپتى. ەندى كوللەدجدەر اقىلى نەگىزدە قىزمەت كورسەتىپ، وقۋ-وندىرىستىك شەبەرحانالاردا، شارۋاشىلىقتاردا، وقۋ پوليگوندارىندا دايىنداعان تاۋارلارىن ساتا الادى. ماسەلەن، «دانەكەرلەۋ ءىسى» ماماندىعى بويىنشا وقيتىن ستۋدەنتتەر پراكتيكا كەزىندە تەمىردەن ساپالى كونسترۋكسيالار جاسايدى، جاس كونديتەرلەر كەرەمەت ونىمدەر پىسىرەدى، قولونەر باعىتىنداعى ماماندىقتارى بويىنشا وقيتىن ستۋدەنتتەر كيىزدەن، كەراميكادان، اعاشتان، بىلعارىدان، زەرگەرلىك بۇيىمداردان اۆتورلىق بۇيىمدار دايىندايدى. ءبىراق ونىڭ ءبارىن ساتا المايتىن.
4. قازىرگى ۋاقىتتا جوعارى وقۋ ورىندارىنا قاراستى ءبىراز كوللەدجدەر جۇمىس ىستەيدى، ءبىراق قولدانىستاعى زاڭناماعا سايكەس ول وقۋ ورىندارى بيۋدجەت ەسەبىنەن كادرلاردى دايارلاۋ ءۇشىن مەملەكەتتىك تاپسىرىس الا المايدى. جاڭا تۇزەتۋلەرگە سايكەس بۇل ماسەلە وڭ شەشىمىن تاپتى.
5. مەملەكەتتىك تاپسىرىستى الۋ ءۇشىن كوللەدجدەردىڭ اككرەديتتەۋدەن وتۋىنە قاتىستى تالاپتار الىنىپ تاستالدى.
«تەحنيكالىق جانە كاسىپتىك ءبىلىم بەرۋ (تجكب) جۇيەسى بولاشاق مامانداردى نەعۇرلىم يكەمدى، بەيىمدەلگىش، ءتيىمدى ەتىپ جانە جۇمىس ورىندارىندا تالاپ ەتىلەتىن قۇزىرەتتەردى بارىنشا ۇيرەتۋگە داعدىلانۋى ءتيىس»، — دەيدى اسحات ايماعامبەتوۆ.
You Might Also Like
-
ونىڭ ءۇيى قالانىڭ ەڭ شەتىندە ورنالاسقان ەدى. ەكى بولمەلى، شاعىن عانا جەر ءۇي. كىشكەنتاي اۋلاسى بار. بۇل ءۇي ەلەۋسىزدەۋ بولعاندىقتان اۋلادان ەشكىم باسىن سۇعىپ قاراعان ەمەس. كورشىلەرى دە بۇل ۇيگە الدەبى...
