كورىسۋ كۇنى
كورىسۋ كۇنىن امال مەرەكەسى دەپ تە اتايدى. قىستان امالداپ، امان شىققان حالىق كوكتەمگە جەتىپ، قۋانا كورىسەدى. بۇرىن ءار جەرگە قونعان اۋىلداردىڭ اراسى شالعاي، قىستىڭ كوزى قىراۋدا قاتىناۋ قيىن بولعان. قىستاي كورىسپەگەن جۇرت جەر جىبىگەندە بىر-بىرىنە قوناققا بارعان. باتىس ءوڭىرىنىڭ تۋماسى، مادەنيەتتانۋشى داۋلەتكەرەي قۇسايىنوۆتىڭ ايتۋىنشا، بۇل — اعايىننىڭ اراسىن جاقىنداتاتىن، ءمانى زور مەيرام. ارازداسقاندار ءبىر-بىرىن كەشىرىپ، باۋىرىنا تارتاتىن بولعان.
كەڭەس ۇكىمەتى ورناعاننان كەيىن، ايلاردىڭ اتاۋى وزگەرىپ، كوپتەگەن مەيرامعا ءدىني، ۇلتشىل دەگەن ايدار تاعىلىپ، جابىلىپ جاتقان كەزدە، جابىلماي قالعان، ۇرپاقتان ۇرپاققا وتكەن مەيرام بولسا، ول — كورىسۋ. جالپى «كورىسۋ» دەگەن نە ءوزى، «كورىسۋ» دەپ نەنى ايتادى؟ ادامدار ساپارلاپ كەتكەن كەزدە قايتا ورالسا، بولماسا بۇرىن سوڭدى كورمەگەن ادامى كەلسە، سونىمەن كەزدەسۋدى «كورىسۋ» دەيدى.
14 ناۋرىز تاڭ اتقالى اۋىلداعى ءار ۇيدە ۇلكەن دايىندىق باستالادى. انالارىمىز باۋىرساق ءپىسىرىپ، مەرەكەلىك داستارحان جايىلىپ، ءۇيدىڭ كىشىلەرى ۇلكەندەرىنە قول بەرىسىپ امانداسامىز. سوسىن كورشىلەرگە بارامىز، اۋىلداعى ۇلكەن كىسىلەردىڭ بارىنە كىرىپ شىعامىز. بۇل مەرەكەنىڭ تاربيەلىك ءمانى زور دەپ ويلايمىن. سەبەبى مەرەكە كەزىندە بىر-بىرىمەن وكپە-رەنىشى بار ادامدار ۇمىتىپ، سونىڭ بارلىعى جۋىپ-شايىلىپ، قول الىسىپ، يىق قاعىسىپ، امانداسىپ كورىسەدى. بۇگىنگى كۇنى مۇنداي مەيرامداردى ۇلىقتاۋدىڭ ءبىر سەبەبى — ۇلتتىق يمۋنيتەتتى نىعايتۋ. ءسالت-داستۇرىمىز بەن ادەت-عۇرىپتى ۇمىتپاۋ. اسىرەسە، جاس ۇرپاقتىڭ ساناسىنا ءسىڭىرۋ ماڭىزدى. كورىسۋ، نەمەسە قاۋىشۋ، امال دەپ اتاساق تا، مەيرام باۋىرمالدىق پەن اۋىزبىرلىككە شاقىرادى. ايەلدەر قۇشاقتاسىپ، ەرلەر ءتوس قاعىستىرىپ، ۇلكەندەر باتاسىن بەرىپ، بالالار سونى كورىپ، ساناعا تۇيەتىن كۇن — بۇل.
اقساۋلە بايمەنشينا، عاني الشىنبايەۆ
You Might Also Like
-
اتا-اناعا جاقسىلىق جاساۋ، ولاردى زيان مەن قيىندىقتاردان قورعاۋ — پارىز. ادام اكە-شەشەسىنە جىلى جۇزبەن، مەيىرىممەن قاراسا، اللاھۋ تا’الا وعان راقىمدىلىق كوزىمەن قارايدى. اتا-اناسىنىڭ ريز...
