InfoHub Logo

بۇل جاتتىعۋلار شارشاعاندى باسىپ، كوز قىراعىلىعىن جاقسارتىپ، ادامنىڭ راحاتتانۋىنا اكەلەدى. ءسىز ولاردى ۇيدە دە، جۇمىستا دا ىستەي الاسىز: نەبارى بىرنەشە مينۋت ۋاقىت ءبولىپ، تىنىش ءبىر بولمە تاپساڭىز جەتەرلىك. ەڭ باستىسى، بۇل جاتتىعۋلاردى كۇن سايىن جاساۋ قاجەتتىلىگىن ۇمىتپاڭىز.

بارلىق جاتتىعۋلاردى ارقاڭىزدى ءتۇزۋ ۇستاپ وتىرىپ ىستەۋ قاجەت. ءاربىر جاتتىعۋدى بىتىرگەننەن كەيىن، كوزىڭىزدى جاۋىپ، بىرنەشە سەكۋند دەم الۋ قاجەت.

1-جاتتىعۋ

كوزىڭىزدى جابىڭىز دا، دەنەڭىزدى بوس ۇستاي الۋ ماقساتىندا بىرنەشە رەت تەرەڭ تىنىس الىڭىز. ەندى ەكى الاقانىڭىزدى ۋقالاپ، كوزدەرىڭىزگە باسىڭىز. قولدارىڭىز ءوز جىلۋىن تولىعىمەن بەرمەيىنشە، وسى قالىپتا قالۋعا تىرىسىڭىز. ەندى كوزدەرىڭىزدى اشپاي، الاقاندارىڭىزدى تاعى ءبىر مارتە ۋقالاپ، قايتا كوزدەرىڭىزگە باسىڭىز. جاتتىعۋدى ءۇش رەت قايتالاڭىز.

2-جاتتىعۋ

كوزىڭىزدى اشىڭىز دا تەز-تەز 10 رەت كوزىڭىزدى اشىپ جابىڭىز. ەندى كوزدەرىڭىزدى جاۋىپ، دەنەڭىزدى بوس ۇستاپ، تىنىسىڭىزدى تىڭداڭىز. جاتتىعۋدى 5 رەت قايتالاڭىز.

3-جاتتىعۋ

جۇدىرىقتارىڭىزدى ءتۇيىپ، باس بارماقتارىڭىزدى جوعارى كوتەرىڭىز. قولدارىڭىزدى كوزدەرىڭىزدىڭ دەڭگەيىنە دەيىن كوتەرىڭىز. ەكى قاسىڭىزدىڭ اراسىنداعى كەڭىستىككە قاراپ، نازارىڭىزدى سول قولىڭىزدىڭ باس بارماعىنا اۋدارىڭىز. تاعى دا ەكى قاسىڭىزدىڭ اراسىنداعى كەڭىستىككە قاراپ، نازارىڭىزدى وڭ قولىڭىزدىڭ باس بارماعىنا اۋدارىڭىز.
ەكى قاس اراسىنا قاراعان كەزدە، تىنىس الىپ، ساۋساقتارىڭىزعا قاراعان ساتتە دەمىڭىزدى شىعارىڭىز. جاتتىعۋدى 10-20 رەت قايتالاۋ قاجەت.

4-جاتتىعۋ

قولدارىڭىزدى تىزەلەرىڭىزگە قويىپ، باسىڭىزدى ءتۇزۋ ۇستاڭىز. الدىڭىزداعى ءبىر نۇكتەگە قاراڭىز. دەمىڭىزدى شىعارا وتىرىپ، سول قولىڭىزدىڭ باس بارماعىنا نازار اۋدارىڭىز. تىنىس العان كەزدە تاعى دا الدىڭىزداعى نۇكتەگە قاراڭىز. تۋرا وسى جاتتىعۋدى وڭ قولىڭىزدىڭ باس بارماعىمەن جاساڭىز.

5-جاتتىعۋ

سول قولىڭىزدى بوس قالپىندا تىزەڭىزدە ۇستاڭىز. جۇدىرىققا تۇيىلگەن جانە باس بارماعى جوعارى كوتەرىلگەن وڭ قولىڭىزدى العا قاراي سوزىڭىز. ساعات تىلشەسى بويىمەن جانە ساعات تىلشەسىنە قاراما-قارسى باعىتتا قولىڭىزدى بەس رەت سەرمەڭىز. كوزىڭىزبەن باس بارماعىڭىزعا قاراپ وتىرۋ قاجەت. قولىڭىزدى جوعارى قاراي كوتەرگەندە، دەم الىپ، تومەن تۇسىرگەن كەزدە، دەمىڭىزدى شىعارىڭىز. جاتتىعۋدى سول قولىڭىزبەن قايتالاڭىز.

6-جاتتىعۋ

قولدارىڭىزدى تىزەلەرىڭىزگە قويىڭىز (جۇدىرىقتارىڭىزدى ءتۇيىپ، باس بارماقتارىڭىزدى جوعارى كوتەرىڭىز). دەم الا وتىرىپ، وڭ قولىڭىزدى بىرتىندەپ كوتەرۋ قاجەت. كوزىڭىزدى باس بارماعىڭىزدان ايىرمايسىز. قولىڭىزدى بۇكپەيسىز، باسىڭىزدى قوزعالتپايسىز. ساۋساعىڭىز كورىنىس اياسىنىڭ ەڭ جوعارعى نۇكتەسىنە كەلىپ جەتكەندە، بىرتىندەپ دەمىڭىزدى شىعارىپ، كوزىڭىزدى باس بارماعىڭىزدان ايىرماستان، قولىڭىزدى تۇسىرە باستايسىز. بۇل جاتتىعۋدى ءار قولىڭىز ءۇشىن 5 رەتتەن جاساعان ابزال.

7-جاتتىعۋ

وڭ قولىڭىزدى العا قاراي سوزىپ، جۇدىرىعىڭىزدى ءتۇيىپ، باس بارماعىڭىزدى جوعارى كوتەرىڭىز. ساۋساعىڭىزدىڭ ۇشىنان نازارىڭىزدى المايسىز. دەم الا وتىرىپ، قولىڭىزدى بىرتىندەپ مۇرنىڭىزعا جاقىنداتا ءتۇسىڭىز.

ساۋساعىڭىزدى مۇرنىڭىزدىڭ ۇشىنا تيگىزىپ، دەم الماي، بىرنەشە سەكۋند وتىرۋ قاجەت. ەندى دەمىڭىزدى شىعارىپ، قولىڭىزدى باستاپقى پوزيسياعا قايتاراسىز. جاتتىعۋ بارىسىندا نازارىڭىزدى ساۋساعىڭىزدىڭ ۇشىنان المايسىز. جاتتىعۋدى 5 رەت قايتالاۋ قاجەت.

8-جاتتىعۋ.

الىستاعى ءبىر نۇكتەنى تاڭداپ الىڭىز نە بولماسا تەرەزەنىڭ الدىنا وتىرىپ، كوكجيەككە كوز تىگىڭىز. ەندى نازارىڭىزدى مۇرنىڭىزدىڭ ۇشىنا اۋدارىپ، 5-10 سەكۋند بويى وسى كۇيدە وتىرۋ قاجەت. جاقىن نۇكتەگە قاراپ، دەم الاسىز، الىس نۇكتەگە قاراپ، دەمىڭىزدى شىعاراسىز. جاتتىعۋدى 10-20 رەت قايتالاپ شىعىڭىز.

ەگەر بۇل جاتتىعۋدى ۇيدە ورىنداساڭىز، اياعىڭىزدى سوزىپ، بىرنەشە مينۋت بويى جاتا تۇرىڭىز.

ەگەر ءسىز كۇن سايىن كومپيۋتەر الدىندا ۇزاق وتىرساڭىز، وندا كوزگە ارنالعان گيمناستيكانى كۇن سايىن ىستەۋىڭىز قاجەت. كوزگە ارنالعان جاتتىعۋلار كومپلەكسىن جاساۋدى ۇمىتپاۋ ءۇشىن Eyexercise سەرۆيسىن قولدانۋدى ۇسىنامىز. ول ءار ساعات باسىندا شاعىن ءۇزىلىس جاساپ، كوزگە ارنالعان بىرنەشە جاتتىعۋ ىستەۋ قاجەتتىلىگىن ەسىڭىزگە سالىپ تۇرادى. Google Chrome-نىڭ «وتدىح دليا گلاز» اتتى باعدارلاماسى دا وسى سيپاتتا جۇمىس ىستەيدى. ول جۇمىس بارىسىنداعى ۇزىلىستەر ۇزاقتىعى مەن ولاردىڭ اراسىنداعى ينتەرۆالدى الدىن الا جوسپارلاۋ مۇمكىندىگىن بەرەدى.

بۇل جاتتىعۋلاردى ورىنداۋدا تەك ءبىر عانا نيۋانس بار ەكەنىن ايتا كەتەيىك: ەگەر كوزىڭىزبەن بايلانىستى پروبلەمالارىڭىز (گلاۋكوما، كاتاراكتا، كوزدىڭ ىشكى تور قابىعىمەن بايلانىستى اۋرۋلار) بولسا، كوزگە ارنالعان كەز كەلگەن جاتتىعۋدى ورىنداماس بۇرىن، دارىگەرمەن كەڭەسۋ قاجەت.

---