InfoHub Logo

ون ءبىر جىلدىق بىلىمدەرىن ارقالاپ، مەكتەپ تۇلەكتەرى اتانۋعا تاياپ قالعان شاقتا بولاشاق تالاپكەرلەردىڭ شارق ۇرىپ ىزدەيتىنى ۇلكەن ومىرگە جەتەلەيتىن جوعارعى وقۋ ورنى، ال كۇندىز-تۇنى ويلايتىنى سول ءبىر ءۇش ءارىپتىڭ باسىن قۇراپ تۇرعان “ۇبت” اتتى شەشۋشى ەمتيحان. بۇدان بولەك كەز-كەلگەن جەتكىنشەكتىڭ بەيمازا ويلارىنىڭ سەبەپشىسىنە اينالعان ماڭىزدى جايتتاردىڭ ءبىرى ماماندىق تاڭداۋ ماسەلەسى ەمەي نەمەنە؟ ومىردەن ءوز ورنىمدى قالاي تابامىن؟ قانداي ماماندىق يەسى بولۋعا لايىقپىن؟ كەلەشەكتە وسى جولدى تاڭداعانىما وكىنىپ قالمايمىن با؟ سەكىلدى سان ساۋال كىمدى دە بولسىن ويلاندىرارى ءسوزسىز. بۇگىنگى كۇنى جاس جەتكىنشەكتىڭ كوڭىلىن كىربىڭ شالىپ، بويىن ۇرەي مەن ۋايىم ارالاس وقىس سەزىم بيلەۋدە. اركىمنىڭ اڭسارى ەلىمىزدىڭ الدىڭعى قاتارلى جوعارعى وقۋ ورنىنا اۋعانىمەن، بۇل مۇمكىندىككە باعى جانىپ، ءبىلىمى سىننان سۇرىنبەي وتكەن تۇلەكتەردىڭ عانا قول جەتكىزەتىندىگىنە داۋ جوق. ال شەكتىك باللدىڭ ىرگەسىننەن اتتاپ وتە الماعان جاسوسپىرىمدەردىڭ ەندىگى جايى نە بولماق؟ باس ساۋعالاپ كوللەدجدەر مەن كاسىپتىك تەحنيكۋمداردىڭ بوساعاسىن جاعالاماق پا؟

الماتى وبلىسى تالعار اۋدانىنداعى ساكەن سەيفۋللين اتىنداعى №2 ورتا مەكتەپتىڭ ون ءبىرىنشى سىنىپ وقۋشىسىنىڭ اتا-اناسى كۋليپبايەۆا رايحان اتالعان وقۋ وشاعىن بىتىرگەلى جاتقان جاس تۇلەكتەردىڭ ماماندىق تاڭداۋعا كەلگەندە “ەش نارسەنى نازاردان تىس قالدىرماۋى كەرەك” دەپ جەتكىزەدى.

-ەڭ باستىسى جۇرەگى قالاپ، كوڭىلى ۇناتقان ماماندىق يەسى بولۋ دەگەن ويدامىن. ءاربىر “جەتكىنشەكتىڭ ومىرىندەگى جاۋاپكەرشىلىككە تولى ماڭىزدى كەزەڭدەردىڭ ءبىرى “مەن كىممىن؟ ”ءوز الدىما قانداي تۇلعامىن؟ ”قاي سالا مامانى بولۋ ارقىلى ەلىمنىڭ ەكونوميكالىق تۇرعىدان دامۋىنا وزىندىك ۇلەسىمدى قوسا الامىن؟ ”ىسپەتتەس سۇراقتاردىڭ تۋىنداۋىننان باستالماق. ارينە بۇل قورقىنىش پەن قوبالجۋدى ەمەس، الدا بولار وزگەرىستەرگە قاتىستى نىق سەنىم مەن بەرىك ۇستام قالىپتاستىرۋ كەرەك. ولاي بولماعان جاعدايدا ءجاسوسپىرىمنىڭ ەموسيونالدى كۇيزەلىسكە ۇشىراۋى عاجاپ ەمەس. اتا-انا رەتىندە بالاما قانداي باستاما بولماسىن بارىنشا قولداۋ كورسەتىپ، جاڭا بەلەستەردى باعىندىرۋ جولىندا ءوز تاراپىمنان اقىل-كەڭەس بەرىپ تۇرامىن. جەتكىنشەكتى قاناتتاندىرۋ، ونىڭ بويىن ءۇمىت ساۋلەسى مەن جارقىن بولاشاققا قاتىستى ءپوزيتيۆتى ويلارعا تولتىرۋ ءبىزدىڭ قولىمىزدا. ەگەر جاس تۇلەكتىڭ تاڭداۋى جوعارعى وقۋ ورنىندا ءار جىل سايىن بولىنەتىن گرانتقا ەمەس، اڭساعان ارمانىنا تىكەلەي بايلانىستى بولسا بۇل بىردەن-بىر دۇرىس شەشىم بولماق”، دەيدى اتا-انا.

ۇلتتىق ءبىرىڭعاي تەستىلەۋدىڭ ۇپايى مەكتەپ بىتىرۋشىلەردىڭ جوو-عا تۇسۋدەگى كورسەتكىشتەرىنە اسەر ەتەرىنە ەشكىمنىڭ تالاسى جوق. جان قينالماي جۇمىس بىتپەس، تالاپ قىلماي مۇراتقا جەتپەس دەمەكشى حالقىمىزدان قالعان وسيەت بار. ءبىلىم سىناعىنا بار بىلىكتىلىگى مەن جىل بويى جۇمساعان كۇش-جىگەرىنىڭ ناتيجەلى جەمىسىن الىپ شىققان تۇلەكتەردىڭ اراسىنان ەڭ جوعارى ۇپايدى ەنشىلەگەن ءجاسوسپىرىم دە بار. مىسالى:”ۇلتتىق ءبىرىڭعاي تەستىلەۋدىڭ العاشقى كۇنى رەسپۋبليكا بويىنشا 39 تالاپكەر 130 باللدان جوعارى جيناعان. ءبىراق ولاردىڭ ىشىنەن وق بويى وزىق شىققان ءبىر اۋىلدىڭ بالاسى بار. وعان ماكسيمالدى بالعا ەكى-اق ۇپاي جەتپەي قالدى. تۇركىستان وبلىسىنداعى تەسپە اۋىلىنىڭ مەكتەپ تۇلەگى ابزال ءابدىماناپ ۇبت-دان 138 بالل جيناپ شىقتى”، دەپ حابارلايدى Sputnik قازاقستان.

نە دەگەنمەن ەڭ اقىرعى شەشىم جاس مەكتەپ بىتىرۋشىلەردىڭ جۇرەكتەگى ۇنىمەن، وي تارازىسىنان شامالاعان تاڭداۋىمەن ايقىندالارى انىق. سوندا دا كەلەشەگىنە ەركىن جوسپار جاساعان ءاربىر تۇلەك استە ءبىر نارسەنى ەستەن شىعارماعانى ءجون. ول تەمىرقازىقتاي جۇلدىزدى ءتۇنى وڭ باعىتقا جەتەلەيتىن اسقاق ارمان، ءارى ونى جۇزەگە اسىرۋعا مۇمكىندىك بەرەتىن باتىل ارەكەت.

الماتى وبلىسى، تالعار اۋدانى، ساكەن سەيفۋللين اتىنداعى №2 ورتا مەكتەپتىڭ 11 سىنىپ وقۋشىسى اعىبايەۆا ارۋجان وراز قىزى

---