InfoHub Logo

تاۋىق پەن قاز دوس بولىپتى. قاز ۇنەمى ماقتانا بەرەدى ەكەن. كۇندەگى ادەتىنشە تاۋىقپەن كەزدەسە سالا تاعى دا ماقتانا جونەلدى:

— مەن ادامعا وتە پايدالىمىن. ەتىم ولارعا ازىق بولسا، ءجۇنىمدى كورپە، جاستىققا پايدالانادى. باسقا ءۇي قۇستارى مەن جانۋارلاردان مەن ارتىقپىن، — دەدى قوقيلانعان قاز.

تاۋىق ۇندەمەستەن ويلانىپ تۇردى دا، دوسىنا:

— قاز دوسىم، مەنىمەن بىرگە ەرىپ ءجۇرشى، — دەپ الدىعا ءتۇستى. قاز بالپاڭداپ تاۋىقتىڭ سوڭىنان ەردى.

ەكەۋى الدىمەن ەشكىنىڭ الدىنا كەلدى. تاۋىق ەشكىنى كورسەتىپ:

— مىنا ەشكى ادامعا بىزدەن دە پايدالى. ءسۇتى — ەم، ءجۇنى مەن تەرىسى — كيىم، ەتى — ازىق. جانە دە ەشكى ونى ايتىپ ەشقاشان ماقتانعان ەمەس، — دەدى.

ەندى ەكەۋى جىلقىنىڭ جانىنا كەلدى. يەسى ونىڭ جالىن تاراپ تۇر ەدى. تاۋىق قازعا جىلقىنى كورسەتىپ:

— جىلقىنى ادامدار بىزدەن دە قاتتى جاقسى كورەدى. كوردىڭ بە، جالىن تارايدى، ءۇستىن جۋادى. ادامدارعا جىلقى مىنسە — كولىك، جەسە — ازىق، ءسۇتى — ساۋمال مەن قىمىز، ياعني، سۋسىن، — دەدى.

تاۋىق قازدى سيىرعا الىپ باردى.

— مىنا تۇرعان سيىرعا دا سۇيسىنەمىن. سۇتىنەن ادامدار ايران، قايماق، ماي، ىرىمشىك جاساپ جەي   ءدى. ەتى مەن تەرىسىن دە يگىلىككە پايدالانادى. سيىر دەگەن ءۇيدىڭ قۇتى عوي، — دەدى تاۋىق.

قاز بولسا باعاناعى ماقتانشاق مىنەزىنە ۇيالىپ قالدى. تاۋىق:

— قاز دوسىم، مەن كورسەتكەن ەشكى دە، جىلقى مەن سيىر دا وسىنداي بولا تۇرا ەشبىر ماقتانعان ەمەس. وزدەرىنىڭ مىندەتتەرىن ءبىلىپ، قاراپايىم ءومىر ءسۇرىپ جاتىر. «ەڭبەك ءومىردى ۇزارتادى، ماقتانشاقتىق بەتتى قىزارتادى» دەگەن وسى، — دەدى.

سودان باستاپ قاز ماقتانۋىن قويعان ەكەن.

---