InfoHub Logo

ەسىكتىڭ الدىندا ويناپ جۇرگەن ءالي قولىنداعى ويىنشىق زىمىرانىن لاقتىرىپ جىبەرىپ ەدى، ونىسى تاسقا سوعىلىپ، ءبىر بولشەگى سىنىپ ءتۇستى. وعان ءمان بەرمەستەن قولىنا روبوتىنالىپ، ونى قۇمعا كومىپ وينادى. روبوتتىڭ ىشىنە قۇم كىرىپ، قۋاتى تاۋسىلعاندا ونى دا جايىنا قالدىرىپ، پويىزدىڭ ۆاگوندارىمەن ويناۋدى باستادى. ودان دا تەز جالىقتى. قولىنداعىسىن تاستاي سالىپ كورشى ماعجاننىڭ ۇشاعىنا جارماستى. ءالي ۇشاقپەن ويناپ تا جەتىستىرمەدى، لاقتىرا سالىپ، ەندى اتكەنشەككە قاراي ۇمتىلدى. اتكەنشەكتە وتىرعان كىشكەنە اقبوتانى ءتۇسىرىپ جىبەرىپ، ورنىنا ءوزى وتىرىپ الدى.

ەندى از ۋاقىتتان سوڭ فۋتبول ويناپ جۇرگەن بالالارعا قوسىلىپ كەتتى. اليگە سالسا بارلىق گولدى ءوزى سالىپ، جالعىز ءوزى چەمپيون بولعىسى كەلەدى. بىرەۋدىڭ اياعىن باستى، بىرەۋدى شالىپ قۇلاتتى. ادىلەتسىزدىگىنە قارسى بولعان بالالار ونى ويىننان قۋىپ جىبەردى. ءالي نە ىستەرىن بىلمەي ەندى اكەسى قىستا تەبەسىڭ دەگەن شاناسىمەن شاڭعىسىن الىپ شىقتى. شاناسىن اسفالتقا سۇيرەدى، شاڭعىسىن توپىراقپەن، تاسپەن ىستى. ءبىر ۋاقتا ءبارىن دالادا قالدىرىپ، ۇيگە كىرىپ، قولىن جۋماستان كومپيۋتەرگە وتىرىپ، پەرنەتاقتانى ساۋساقتارىمەن قاتتى باسىپ ويىن وينادى. بىرنەشە مينۋتتان سوڭ ورنىنان تۇرىپ، قايتا دالاعا شىعىپ بارا جاتقان ءاليدى اناسى توقتاتتى.

— بالام، التىنىم، باعانادان بەرى بايقاپ ءجۇرمىن، ارنارسەنىڭ باسىن شالىپ، مىنا ويىنشىعىڭدى سىندىرىپ، انا ويىنشىعىڭدى لاقتىرىپ، باسقا بالالارمەن ويناعاندا دا وكتەمدىك كورسەتىپ، جانىڭدى قويارعا جەر تاپپاي ءجۇرسىڭ. سەن وسكەندە باتىر، ازامات، جىگىت بولاسىڭ. اكەڭدى قاراشى، قانداي سالماقتى، سابىرلى. اكەڭدەي ەر ازامات بولۋ ءۇشىن ءوزىڭدى قازىردەن باستاپ تاربيەلەۋىڭ كەرەك. ويىنشىقتارىڭدى كۇتىپ ۇستاپ، ءتارتىپتى بولساڭ، بولاشاقتا سەن دە ۇلكەن جىگىت، ەلگە پايدالى تۇلعا بولاسىڭ، ءاليىم، — دەدى ۇلىنا.

ءالي بولسا ءوز ىسىنە ۇيالىپ، اناسىنان كەشىرىم سۇرادى.

---