مەكتەپتە اقشا جيناعاندارعا قاتاڭ شارا قولدانىلادى - الماتىنىڭ ءبىلىم باسقارماسى
الماتىدا مەكتەپتە اقشا جيناۋعا قاتاڭ تىيىم سالىنعان. ەگەر ونداي فاكتى انىقتالعان بولسا، جاۋاپتى تۇلعاعا قاتىستى جۇمىستان شىعارۋعا دەيىنگى قاتاڭ شارا قولدانىلادى. بۇل تۋرالى بۇگىن الماتى قالاسى ءبىلىم باسقارماسىنىڭ ورىنباسارى ءلاززات جىلقىبايەۆا «نۇر وتان» پارتياسىنىڭ قالالىق فيليالىندا وتكەن «مەكتەپ قابىرعاسىندا اقشا جيناۋ» ماسەلەسىنە ارنالعان بريفينگتە ايتتى.
ءلاززات جىلقىبايەۆانىڭ ايتۋىنشا، كەيدە مەكتەپتە اقشا جيناۋعا قاتىستى شاعىمدار ءتۇسىپ تۇرادى، الايدا تەكسەرە كەلگەندە وعان اتا-انالاردىڭ ءوزى مۇرىندىق بولعانى انىقتالىپ جاتادى.
«مەكتەپكە وقۋلىق، كەڭسە تاۋارلارىنا، داپتەرگە، تاعى باسقا دا قۇرالدارعا اقشا جيناۋعا قاتاڭ تىيىم سالىنعان. كەي جاعدايلاردا اقشا جيناۋ فاكتىلەرى كەلىپ تۇسەدى. ءبىلىم ءبولىمى قىزمەتكەرلەرى بارىپ تەكسەرگەندە، كوبىنە ولارعا اتا-انالار مۇرىندىق بولعانى انىقتالىپ جاتادى. مەكتەپ قابىرعاسىندا قارجى جيناۋعا قاتاڭ تىيىم سالىنعان. ەگەر دە ويىن-ساۋىق ورتالىقتارىنا جاعدايى جەتەتىن اتا-انالار مەكتەپتەن تىس ۋاقىتتا جينالسا، قارسىلىعىمىز جوق، ال سىنىپتاعى 25 بالادان ماجبۇرلەپ اقشا جيناپ، ونداي شارالاردى ۇيىمداستىرۋعا رۇقسات جوق»، - دەدى ءلاززات جىلقىبايەۆا.
ونىڭ ايتۋىنشا، الماتى قالاسى اكىمىنىڭ تاپسىرماسىمەن ەكى جىلدان بەرى توقسان سايىن مەكتەپ ديرەكتورلارى مۇعالىمدەر مەن اتا-انالار الدىندا ەسەپ بەرىپ تۇرادى. جىل سايىن بارلىق ءبىلىم مەكەمەلەرىنە اتا-انالاردان اقشا جيناۋعا تىيىم سالىنعانى تۋرالى ەسكەرتىلگەن حات جىبەرىلەدى.
«ءبىلىم باسقارماسىنىڭ سايتى انا-الارمەن بايلانىس ورناتقان. ەگەر اتا-انالاردان اقشا جيناۋ تۋرالى شاعىم تۇسسە قاتاڭ شارا قولدانامىز. سونىمەن قاتار، قازىرگى ۋاقىتتا ءبىلىم باسقارماسى تاراپىنان اتا-انالار كوميتەتى قىزمەتىنىڭ تيىمدىلىگىن قاراستىرۋ باسقارمانىڭ كۇن تارتىبىندە تۇر. سەبەبى، اتا-انالار كوميتەتى تىكەلەي قىزمەتىن ۇمىتىپ، مۇعالىمگە اقشا جيناۋ ماسەلەسىمەن اينالىسىپ كەتەدى»، - دەدى ول.
ايتا كەتەيىك، الماتى قالاسىندا بۇگىنگى تاڭدا 998 ءبىلىم بەرۋ ۇيىمى قىزمەت اتقارادى، ونىڭ 443ء-ى مەملەكەتتىك، 555ء-ى جەكە مەنشىك. ولاردا 375 مىڭ بالا ءبىلىم الۋدا. الماتى قالاسىندا 2016 جىلى ءبىلىم سالاسىنا - 60 ملرد تەڭگەدەن استام، 2017 جىلى 63،3 ملرد تەڭگە ءبولىندى.
You Might Also Like
-
پاۆلودار قالاسىنىڭ 32 مەكتەبىندە حيميا، فيزيكا، بيولوگيا جانە ينفورماتيكا پاندەرى ساباقتارىندا پيلوتتىق رەجىمدە اعىلشىن ءتىلى ەنگىزىلۋدە.
-
دۇنيە جۇزىندە ەڭ ۇزاق ءومىر سۇرگەن ادامداردىڭ قاتارىنان ورىن الىپ، 114 جىل ءومىر سۇرگەن (1901 ج.) اقش-تىق جازۋشى بەرناندو لاپاللو تەلەارناعا بەرگەن ءبىر سۇحباتىندا ۇزاق ءومىر ءسۇرۋدىڭ سىرىمەن بولىسەدى. ...
