InfoHub Logo

استانادا تۇركى اكادەمياسى حالىقارالىق ۇيىمىندا (TWESCO) «ورتاق تۇركى تاريحى» وقۋلىعىنىڭ سوڭعى جوباسىن تالقىلاۋعا ارنالعان ساراپشىلار جيىنىنىڭ قورىتىندى وتىرىسى ءوتتى.

ايتا كەتەيىك،  ورتا مەكتەپتەرگە ارنالعان ەجەلگى داۋىردەن XV عاسىرعا دەيىنگى ارالىقتى قامتيتىن وقۋلىقتى TWESCO ازىرلەدى.

جۇمىس توبىنىڭ قورىتىندىسى بويىنشا ارنايى حاتتاما قابىلداندى. ول قۇجاتقا سايكەس، وقۋلىق جوباسى 2018 جىلدىڭ ناۋرىز ايىندا قىرعىزستاندا وتەدى دەپ جوسپارلانعان تۇركى كەڭەسى مەملەكەت باسشىلارىنىڭ VI سامميتىنە ۇسىنىلاتىن بولادى.

«ءبىز بۇگىن تۇركى كەڭەسىنىڭ اياسىندا ۇلكەن ىرگەلى ءىستى اياقتاپ وتىرمىز. وزدەرىڭىز بىلەسىزدەر، 2013 جىلى تۇركى كەڭەسىندە مۇشە مەملەكەتتەرگە ورتاق تاريح وقۋلىعىن ەنگىزۋ جونىندە شەشىم بولعان جانە ول تۇركى اكادەمياسىنا بەرىلگەن ەدى. 2014 جىلى العاشقى باعدارلاما جاسالىپ،  2015 جىلى وسى باعدارلاما  استانادا وتكەن ءبىلىم مينيسترلەرىنىڭ جيىنىندا ماقۇلدانعان. سونىڭ اياسىندا ارنايى وقۋلىق دايىندالىپ، مۇشە مەملەكەتتەرگە جىبەرىلدى. بۇگىن سونىڭ سوڭعى نۇسقاسىنا قول جەتكىزىپ وتىرمىز. ءۇش كۇن بويى ازەربايجان، تۇركيا، قىرعىزستان مەن قازاقستاننىڭ ماماندارى، مينيسترلىك وكىلدەرى بىرگە جۇمىس ىستەدى. ولار ءاربىر سويلەمدى، پاراگرافتى تالقىلادى، ورتاق كوزقاراسپەن ورتاق وقۋلىق دايىن بولدى. وسى حاباردى كۇتىپ وتىرعان بارشا جۇرتشىلىققا بۇگىنگى جۇمىسىمىز قۇتتى بولسىن دەيمىن»، - دەدى اكادەميا باسشىسى دارحان ءقىدىرالى.

اتاپ ايتقاندا، بۇل جيىنعا تۇركى كەڭەسىنە مۇشە مەملەكەتتەردەن، ياعني قازاقستان، ازەربايجان، تۇركيا مەن قىرعىزستاننىڭ ءبىلىم جانە عىلىم مينيسترلىكتەرىنىڭ وكىلدەرى، تۇركى كەڭەسى مەن تۇركى اكادەمياسىنىڭ ساراپشىلارى، تاريحشى عالىمدار تارتىلدى. وسى جيىنعا قاتىسۋشىلار «ورتاق تۇركى تاريحى» وقۋلىعىنىڭ سوڭعى جوباسىن ماقۇلدادى. ورتا مەكتەپتەردىڭ 8ء-شى سىنىپ وقۋشىلارىنا ارنالعان وقۋلىق ەجەلگى داۋىردەن XV عاسىرعا دەيىنگى ارالىقتى قامتيدى جانە ول 7 بولىمنەن تۇرادى.

ارنايى جۇمىس توبىنا كىرگەن ساراپشىلار اكادەميادا 3 كۇن بويى (25-27 قىركۇيەك) اتالعان وقۋلىقتىڭ جوباسىن جان-جاقتى تالقىلاپ، قاجەتتى تۇزەتۋلەر ەنگىزۋ ارقىلى مازمۇنىن تولىقتىردى. تالقىلاۋعا قاتىسقان ماماندار تۇركىتىلدەس ەلدەر ءبىلىم مينيسترلەرىنىڭ IV جيىنىندا قابىلدانعان شەشىمدەردى نەگىزگە الدى.

---