InfoHub Logo

پاۆلودار قالاسىنىڭ 32 مەكتەبىندە حيميا، فيزيكا، بيولوگيا جانە ينفورماتيكا پاندەرى ساباقتارىندا پيلوتتىق رەجىمدە اعىلشىن ءتىلى ەنگىزىلۋدە.

بۇل تۋرالى №42 جالپى ورتا ءبىلىم بەرۋ مەكتەبىنىڭ 8-سىنىبىندا كوپ تىلدە وقىتۋ بويىنشا وتكەن اشىق ساباق كەزىندە قالالىق ءبىلىم بەرۋ ءبولىمى ادىستەمەلىك كابينەتتىڭ مەڭگەرۋشىسى شولپان نۇراحمەتوۆا ءمالىم ەتتى دەپ حابارلايدى pavlodarnews.kz.

 «مۇندا 2-سىنىپتان باستاپ ساباق اعىلشىن تىلىندە جۇرگىزىلەدى»، - دەيدى شولپان نۇراحمەتوۆا. «اتا-انالاردىڭ وزدەرى ءپاندى شەت تىلىندە جۇرگىزۋ جونىندە ءوتىنىش جازعان بولاتىن. سەبەبى، ولاردىڭ كوبى بولاشاقتا بالالاردىڭ تاڭدايتىن ماماندىقتارىن اعىلشىن تىلىمەن بايلانىستىرادى».

№ 42 مەكتەپتە بيولوگيا ءپانىنىڭ ءمۇعالىمى ەۆگەنيا يۆانوۆا جەتى جىلدان بەرى اعىلشىن تىلىندە ساباق بەرىپ كەلەدى. ءبىلىم بەرۋ ءبولىمى ۇسىنعان اقپاراتقا سۇيەنسەك، قالا بويىنشا 32 مەكتەپتە بىلىكتىلىگىن ارتتىرۋ كۋرستارىنان وتكەن 94 ءمۇعالىم 2655 وقۋشىعا اعىلشىن تىلىنەن ساباق بەرەدى. № 25، № 36 مەكتەپتەردە 9-سىنىپتار ءۇشىن ينفورماتيكا، فيزيكا، حيميا جانە بيولوگيا بويىنشا 9-سىنىپتارعا جانە  № 42، 25، 99، 4، 17 مەكتەپتەردە 8-سىنىپتار ءۇشىن بيولوگيا ءپانى بويىنشا اعىلشىن تىلىندە وقۋلىقتار ساتىپ الىنعان. قازىرگى تاڭدا جاراتىلىستانۋ-ماتەماتيكا باعىتىنداعى 146 ۇستاز 2017 جىلدىڭ ءساۋىر ايىنان باستاپ جەلتوقسانعا دەيىن 10 ايلىق كۋرستان وتۋدە. وسىنىڭ ناتيجەسىندە 2017-2018 جىلى اعىلشىن تىلىندە ءبىلىم الاتىن سىنىپتاردىڭ سانى ارتپاق. الداعى ۋاقىتتا كوپ تىلدە ءبىلىم بەرەتىن  مەكتەپتەر جەلىسىن كەڭەيتۋ جوسپارلانعان. بيىل ۆ1 سەرتيفيكاتىن العان سەگىز ءمۇعالىمنىڭ بىرەۋى - بيولوگيا، ەكەۋى - ينفورماتيكا، تورتەۋى - فيزيكا جانە بىرەۋى حيميا پانىنەن ساباق بەرە الادى. «وقۋشىلار ۇنەمى وبلىستىق، رەسپۋبليكالىق جانە قاشىقتىقتاعى ينتەرنەت وليمپيادالارعا قاتىسادى. FLEX حالىقارالىق كونكۋرسىنىڭ جەڭىمپازى اتانعان 11-سىنىپ بىتىرگەن شىڭعىس كوشكۋمبايەۆ ءبىر جىل اقش-تا ءبىلىم الىپ كەلدى. بيىلعى جىلى دا ەكى تۋردان وتكەن وقۋشىلار بايقاۋدىڭ ناتيجەسىن كۇتىپ وتىر»، - دەيدى № 42 مەكتەپتىڭ اعىلشىن ءتىلى ءپانى ءمۇعالىمى اننا شكرەت. 

---