مەملەكەتتىك جوو-لار كوممەرسيالىق ەمەس اكسيونەرلىك ۇيىمعا وزگەرتىلەدى
مەملەكەتتىك جانە ۇلتتىق جوعارى وقۋ ورىندارىن مەملەكەت 100 پايىز قاتىساتىن كوممەرسيالىق ەمەس اكسيونەرلىك ۇيىمعا وزگەرتۋ ماسەلەسى قارالىپ وتىر. بۇل تۋرالى پارلامەنت ءماجىلىسىنىڭ جالپى وتىرىسىندا ق ر ءبىلىم جانە عىلىم ءمينيسترى ەرلان ساعادييەۆ ءمالىم ەتتى.
وقۋ ورىندارىنداعى باسقارۋشىلىق دەربەستىككە توقتالعان مينيستر، «جوو-نىڭ اكادەميالىق ەركىندىگىن ارتتىرۋ - ۋنيۆەرسيتەتتى باسقارۋ جۇيەسىنىڭ وزگەرۋىنە تىعىز بايلانىستى. ونىڭ وزگەرۋى - جۇمىسقا قابىلداۋ، ماماندىقتار جانە دايارلاۋ باعىتتارى بويىنشا ستۋدەنتتەر كونتينگەنتىن قالىپتاستىرۋ، جوو-لاردىڭ اكادەميالىق قۇرىلىمىن انىقتاۋ ماسەلەسىن دەربەس شەشۋگە جاعداي جاسايدى. بۇل ءۇشىن ءبىرقاتار شارالاردى اتقارۋ قاجەت. بىرىنشىدەن، جوو-نىڭ ۇيىمدىق-قۇقىقتىق فورماسىن وزگەرتۋ. ويتكەنى، مەملەكەتتىك جوو-لار مەملەكەتتىك مۇلىك تۋرالى زاڭمەن رەتتەلەدى. بۇل ولارعا قيىندىق تۋدىرادى. كەي جاعدايدا ولاردىڭ نەگىزگى ميسسياسى مەن ماقساتتارىنا قايشى كەلەدى. كوممەرسيالىق ەمەس فورماداعى جوو-لاردىڭ ارتىقشىلىعى - كورپوراتيۆتى باسقارۋ نورماسىن ساقتايدى جانە العان تابىستى وقۋ ورنىن دامىتۋعا جۇمساۋعا مۇمكىندىك بەرەدى. ول ءۇشىن، زاڭ جوباسىندا مەملەكەتتىك جانە ۇلتتىق جوو-لاردى مەملەكەت 100% قاتىساتىن كوممەرسيالىق ەمەس اكسيونەرلىك ۇيىمعا وزگەرتۋ بويىنشا نورمالار ەنگىزىلگەن. سونىمەن قاتار، كوممەرسيالىق ۇيىمدار رەتىندە قۇرىلعان جەكەمەنشىك وقۋ ورىندارىنا ارنالعان ترانسفورماسيالاۋ تەتىگى جەڭىلدەدى. ءبىراق، ول مىندەتتى ەمەس»، - دەدى.
وسىلايشا، رمك-دان كوممەرسيالىق ەمەس ۇيىمعا ءوتۋ كەزىندە ۋنيۆەرسيتەتتەر كاسىپكەرلىك كودەكس اياسىندا كەيبىر كوممەرسيالىق قىزمەت تۇرلەرىن جۇرگىزە المايدى. وسى ماسەلەنى شەشۋ ءۇشىن «ءبىلىم تۋرالى» زاڭعا ۋنيۆەرسيتەت قىزمەتى مەن قۇزىرەتىن رەگلامەنتتەيتىن جەكە باپ قوسۋ ۇسىنىلدى. اتالعان باپ زاڭ جوباسىنىڭ قاعيداسى جانە دەپۋتاتتار ۇسىنعان وزگەرىستەر بويىنشا دايىندالدى.
«باپتىڭ نورمالارى ۋنيۆەرسيتەتتەرگە كوممەرسيالىق قىزمەتتىڭ 13 ءتۇرىن اتقارۋعا مۇمكىندىك بەرەدى. سونىمەن قاتار، ۋنيۆەرسيتەتتەردىڭ باستى قۇزىرەتتەرىن انىقتاپ، ولارعا قوسىمشا قۇقىقتار بەرىلەدى. بۇل تۇرعىدا جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمىندا ەنداۋمەنت-فوند قۇرۋ؛ بيۋدجەتتەن تىس قارجى ەسەبىنەن عىلىمي - ءبىلىم بەرۋ قىزمەتىمەن اينالىساتىن زاڭدى تۇلعالاردى قۇرۋ؛ ستارتاپ كومپانيالار اشۋ؛ جارعىلىق قىزمەتتى ىسكە اسىرۋ ءۇشىن قوسىمشا ماتەريالدىق جانە قارجى كوزدەرىن تارتۋ؛ شەتەلدىك مەملەكەتتەردە فيليالدارىن قۇرۋ جانە باسقا دا قادامدار قاتىلعان»، - دەدى مينيستر.
بۇدان بولەك، ۇسىنىپ وتىرعان ۇيىمدىق-قۇقىقتىق فورما -كورپوراتيۆتى باسقارۋ پرينسيپتەرىن ەنگىزۋ دەگەندى بىلدىرەدى. كوپتەگەن ۇلتتىق جوو-لاردا بايقاۋ كەڭەستەرى بار. ياعني باسقارۋدىڭ القالى فورماسىنا كەزەڭ-كەزەڭمەن كوشىرىلۋدە. كورپوراتيۆتى باسقارۋ ورگاندارىن دامىتۋ جوو-نىڭ باسشىلارىن تاعايىنداۋ مەن بوساتۋدىڭ جاڭا تەتىگىن ەنگىزۋگە، ولاردىڭ قۇزىرەتىنىڭ مەرزىمىن انىقتاۋعا، قوعام الدىندا ەسەپ بەرۋ تاجىريبەسىن ەنگىزۋگە مۇمكىندىك بەرەدى. بيۋدجەتتىڭ اشىقتىعىن قامتاماسىز ەتەدى.
«مىسالى، ءقازىر جاڭا مەحانيزمدەر اياسىندا اشىق كونكۋرس ارقىلى 16 رەكتور سايلاندى. وسىلايشا، زاڭ جوباسى ۋنيۆەرسيتەتتىڭ ىشكى قۇرىلىمىن جاساۋ، قىزمەتكەرلەردى ىرىكتەۋ جانە ورنالاستىرۋ كريتەرييلەرى مەن پروسەدۋرالارىن دەربەس ازىرلەۋگە بايلانىستى قىزمەتتەردى ورىنداۋعا قۇقىق بەردى»، - دەدى ەرلان ساعادييەۆ.
تالقىلاۋدان كەيىن پالاتا دەپۋتاتتارى «ق ر كەيبىر زاڭنامالىق اكتىلەرىنە جوعارى وقۋ ورىندارىنىڭ اكادەميالىق جانە باقىلاۋ دەربەستىگىن كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
قازاقپارات
You Might Also Like
-
پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ورتا ءبىلىم بەرۋدى جاڭعىرتۋ جوبا...
