InfoHub Logo

پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ورتا ءبىلىم بەرۋدى جاڭعىرتۋ جوباسى) راتيفيكاسيالاۋ تۋرالى» زاڭ جوباسىن ماقۇلدادى.

«زاڭ جوباسى ەلباسىنىڭ «ۇلت جوسپارى - 100 ناقتى قادام» باعدارلاماسىنىڭ 76-شى قادامىندا ورتا ءبىلىمدى دامىتۋ بويىنشا بەرىلگەن تاپسىرماعا سايكەس كەلەدى. جوبا بويىنشا جالپى شىعىن 75 ملن اقش دوللارىن قۇرايدى. تازا قارىز سوماسى - 67 ملن دوللار جانە دە سالىق تولەۋ ءۇشىن رەسپۋبليكالىق بيۋدجەتتەن 8 ملن دوللار قوسا قارجىلاندىرۋ قاراستىرىلعان. قارىزدى وتەۋ مەرزىمى - 17 جىل، ونىڭ ىشىندە 5،5 جىل جەڭىلدىك مەرزىمى. ياعني جوبانى جۇزەگە اسىرۋ بارىسىندا العاشقى بەس جارىم جىلعا تولەم جاساۋدان بوساتۋ قاراستىرىلعان. جالپى ۇسىنىلعان جوبانىڭ ماقساتى - ورتا ءبىلىم جۇيەسىنىڭ ساپاسىن كوتەرۋ،  ءبىلىم بەرۋدەگى قولجەتىمدىك پەن تەڭدىكتى ارتتىرۋ بولىپ تابىلادى»، - دەپ توقتالدى  ق ر ءبىلىم جانە عىلىم ءمينيسترى.

ق ر پارلامەنتى ماجىلىسىندە زاڭ جوباسىن قاراستىرۋ  بارىسىندا ءبىرقاتار ماڭىزدى ۇسىنىستار بەرىلدى. وسىعان بايلانىستى ءبىلىم مينيسترلىگى بەرىلگەن ۇسىنىستار بويىنشا شارالاردى قايتا قاراستىرىپ، دەپۋتاتتاردىڭ ۇسىنىستارىن ەسكەردى.

«اۋىل مەكتەپتەرىن مۋلتيمەديالىق جابدىقتاۋ، اتاپ ايتقاندا كومپيۋتەر، پروەكتور جانە ەكراننان جينالعان كومپلەكتتەر ەسكەرىلگەن. وعان شامامەن 16 ملرد (67%) تەڭگە بولىنەدى. بۇگىنگى كۇنى مەكتەپتەردىڭ 29 پايىزى ينتەراكتيۆتى جابدىقتارمەن قامتىلعان. جوبا اياسىندا مۋلتيمەديالىق كومپلەكتىلەردى 16 250-دەن 32 500-گە جەتكىزۋ ارقىلى 5 400 مەكتەپ وسى جابدىقتارمەن قامتاماسىز ەتىلەدى. ءبىلىم بەرۋدى سيفرلاندىرۋ كەزىندە بۇل وتە وزەكتى جانە ءتيىمدى بولىپ تابىلادى»، - دەپ ءتۇسىندىردى ە. ساعادييەۆ.

جولداۋدا كورسەتىلگەن پەداگوگيكالىق ءبىلىم بەرۋدى دامىتۋ بويىنشا تاپسىرمانى ورىنداۋ ماقساتىندا پەداگوگيكالىق كادرلاردى دايىندايتىن ۋنيۆەرسيتەتتەر ءۇشىن 47 ءبىلىم بەرۋ باعدارلاماسى ەنگىزىلەتىن بولادى. سونىمەن قاتار وسى ۋنيۆەرسيتەتتەردى ينتەراكتيۆتى جابدىقتارمەن قامتاماسىز ەتىلەدى. بۇعان 457 ملن تەڭگە جۇمسالادى (قارىزدىڭ 1،8 پايىزى) .

سونىمەن قاتار ءبىلىم سالاسىنىڭ پەداگوگيكالىق جانە باسقارۋ پوتەنسيالىن ارتتىرۋدا 200-دەن استام اۋىل مەكتەپتەرىنىڭ مۇعالىمدەرى مەن ديرەكتورلارىن اقپاراتتىق-كوممۋنيكاسيالىق تەحنولوگيالار بويىنشا ساۋاتتىلىق جانە مەنەدجمەنتكە مۋلتيمەديالىق رەسۋرستار ارقىلى وقىتامىز. وعان 5 ملرد تەڭگە (21%) قاراستىرىلعان. 

«كەلىسىمنىڭ تاعى ءبىر ماڭىزدى باعىتتارىنىڭ ءبىرى  - ينكليۋزيۆتى ءبىلىم بەرۋدى قولداۋ.  جوبادا ەرەكشە ءبىلىم قاجەتتىلىكتەرى بار بالالاردى كاسىبي-ماماندىققا دايارلاۋ بويىنشا ارنايى وقۋ باعدارلامالارىن ازىرلەۋ قاراستىرىلعان. ودان باسقا مەكتەپتەر جانىنان 9 ينكليۋزيۆتى رەسۋرستىق ورتالىق اشۋ، كوزى ناشار كورەتىن جانە دامۋى كەم بالالارعا ارنالعان جەتى جارىم مىڭ برايل وقۋلىعىن ساتىپ الۋ، ينكليۋزيۆتىك ءبىلىم بەرۋدەگى 1000 دەفەكتولوگ ماماندى ارنايى كۋرستاردا وقىتۋ قاراستىرىلعان. وعان 433 ملن تەڭگە بولىنەدى (1،8%)»، - دەپ ناقتىلادى مينيستر.

ونىڭ سوزىنە قاراعاندا، ۇلتتىق ءبىرىڭعاي تەستىلەۋدىڭ ستاندارتتارىن قايتا قاراستىرۋ وتە ماڭىزدى. جاڭارتىلعان ءبىلىم بەرۋ مازمۇنىنا كوشۋ شەڭبەرىندە ۆوۋد، ۇبت تاپسىرمالارىن دا وزگەرتۋ كەرەك. تاپسىرمالاردى اقپاراتتى ەستە ساقتاۋ قابىلەتىن باعالاۋعا ەمەس،  بالانىڭ فۋنكسيونالدىق ساۋاتتىلىعىن انىقتاۋعا، العان ءبىلىمىن قولدانا ءبىلۋىن تەكسەرۋگە باعىتتاپ قۇرۋ كاجەت بولىپ تۇر. سوندىقتان مۋلتيمەديا ەلەمەنتتەرى بار 230 مىڭنان استام  جاڭا تەست تاپسىرمالارى جاسالاتىن بولادى. وعان 1،2 ملرد تەڭگە بولىنەدى (قارىزدىڭ 5 پايىزى).

جوسپارلانعان شارالار اۋىل مەن قالا مەكتەپتەرىنىڭ اراسىنداعى وقۋ ۇلگەرىمىنىڭ الشاقتىعىن قىسقارتۋعا كومەكتەسەدى. سيفرلىق ءبىلىم بەرۋ رەسۋرستارىنا قولجەتىمدىلىكتى ارتتىرادى جانە سول ارقىلى ساپالى بىلىمگە جەتكىزەدى.

قازاقپارات

---