مەنىڭ ارمانىم
ارماندارىڭ ورىندالا بەرسىن البينا!
الماتى قالاسىنداعى «شامشىراق» عىلىم مەن ءبىلىمدى قولداۋ ورتالىعىنىڭ ۇيىمداستىرۋىمەن وتكەن "ءبىزدىڭ بولاشاق" اتتى جاس تالانتتار بايقاۋىنا قاشىقتان قاتىسىپ، «مەنىڭ ارمانىم» تاقىرىبىندا ءوز شىعارماشىلىعىمەن 1-ورىن جۇلدەگەرى اتانعان البينا شاكىرتىمنىڭ ارمانى - مەنىڭ كوڭىلىمدى بوساتىپ، كوزىمە جاس الدىردى.
شىن بالا كوڭىلمەن، بالا جۇرەگىمەن جازىلعان بۇل ەسسەنىڭ بولاشاقتا ورىندالۋىنا تىلەكتەس بولا وتىرىپ، كوپشىلىككە جولداعاندى ءجون كوردىم. سىزدەرگە دە ۇنايدى دەپ سەنەمىن.
«ن.تورەقۇلوۆ اتىنداعى №121 جوم» كمم-نىڭ قازاق ءتىلى مەن ادەبيەتى ءپانى ءمۇعالىمى تۋلتايەۆا پەرۋزا
مەنىڭ ارمانىم
ارمانسىز ادام بولمايدى. مەنىڭ دە ءوز ارمانىم بار. مەنىڭ ارمانىم اتا- انامنىڭ دەنى ساۋ، باقىتتى بولعانى. ولار امان بولسا، مەنىڭ كوپ ارماندارىم ورىندالادى دەپ سەنەمىن. اتا-انام،سىڭلىلەرىم،تۋىستارىم بارلىعىمىز ءبىر وتباسى بولىپ مەرەكەلەردە ۇلكەن داستارحان باسىندا باس قوسساق، مەن قاتتى قۋانامىن.
مەنىڭ كىشكەنتاي ءسىڭلىم دۇنيەگە كەلگەندە ۇيدەگىلەردىڭ بارلىعى قاتتى قۋاندى. مەن دە قۋانىشتى بولدىم. ءبىزدىڭ وتباسىندا ءتورتىنشى قىز بالا دۇنيەگە كەلگەندىكتەن، اپام ونىڭ ەسىمىن ۇلجان دەپ اتادى. سەبەبى، بۇل ەسىمنىڭ ماعىناسى قىز ارتىنان ۇل ەرسىن دەگەنى. ۇلى اباي اتامىزدىڭ اناسىنىڭ اتى ۇلجان بولعان ەكەن. اناسى وتە اقىلدى انا بولىپتى. سول سياقتى مەنىڭ دە سىڭلىلەرىم اقىلدى بولىپ وسسە ەكەن دەيمىن. مەن ءۇيدىڭ ۇلكەنىمىن. ساباقتان قولىم بوساعاندا سىڭلىلەرىمدى ويناتامىن، ولارعا قاراپ جۇرەمىن. اتا-انامىز بىزدەردى قاتتى جاقسى كورەدى. ارينە، اتا-انامىز ءۇشىن بىزدەر - ولاردىڭ كوز قۋانىشىمىز، ءبىراق، ءار وتباسىندا ۇل بالانىڭ ورنى قاشاندا بولەك بولاتىنىن مەن جاقسى بىلەمىن. سوندىقتان دا، مەنىڭ ەڭ ۇلكەن ارمانىم - ۇيگە تاعى دا كىشكەنتاي نارەستە كەلسە، ەندىگى نارەستە ۇل بالا بولسا ەكەن دەپ ارماندايمىن. انام ۇل بالانى دۇنيەگە اكەلسە، مەنىڭ ەڭ ۇلكەن ارمانىمنىڭ ءبىرى ورىندالار ەدى. مەن ونىڭ اتىن ءوزىم قويار ەدىم. كۇندە ساباقتان كەلگەن سوڭ، ويناماسام دا، انامنىڭ جانىنان كەتپەي، نارەستەگە قاراۋعا كومەكتەسىپ، بەسىگىن تەربەتىپ، ءالديىن ايتار ەدىم.
مەن ارمانىمنىڭ ورىندالۋىن اسىعا-اسىعا كۇتەمىن. مەنىڭ وسى جازعان ارمانىمدى وقىپ وتىرعان ءسىزدىڭ دە ارماندارىڭىز ورىندالا بەرسىن- دەپ ەسسەمدى اياقتايمىن.
«ن.تورەقۇلوۆ اتىنداعى №121 جوم» كمم-نىڭ
5 «ءا» سىنىپ وقۋشىسى سەرىكباي البينا
You Might Also Like
-
ەلباسى تاپسىرماسىنا سايكەس بيىلعى جىلدان باستاپ جاستاردىڭ ءبىرىنشى جۇمىسشى ماماندىعىن الۋىنا مۇمكىندىك بەرەتىن «بارشاعا ارنالعان تەگىن كاسىبي-تەحنيكالىق ءبىلىم» جاڭا جوباسى جۇزەگە ا...
-
ازاتتىقتىڭ باستاۋىندا تۇرعان الاش تۇلعالارىنىڭ يدەياسىن ۇلىقتاۋ ماقساتىندا دوستىق جالپى ورتا ءبىلىم بەرەتىن مەكتەبىندە وتكىزىلگەن ءىس-شارالاردىڭ ءبىرى «ازاتتىقتى –اڭساعان ا...
