مەرەكەدە قۇتتىقتاپ قايت اناڭدى
تابيعات جاساعان جاراتىلىسىنىڭ ءار تىنىمسىز بۇلكىلى پەرزەنتىنە دەگەن تەك قانا كەشىرىم مەن مەيىرىمنەن تۇراتىن ءبىر ۇلكەن جۇرەك بار. ول – انانىڭ جۇرەگى.
سول ۇلكەن جۇرەكتەن تارايتىن كۇن ساۋلەسىنەن دە قۇدىرەتتى، كۇن ساۋلەسىنەن دە ىستىق ءبىر تاۋسىلمايتىن جىلۋ بار. ول – انانىڭ پەرزەنتىنە دەگەن كوڭىلى.
كىشكەنتاي ءسابي تەك سوندا عانا ءوزىن ەش الاڭسىز، ەش ءقاۋىپسىز سەزىنە الاتىن، ەشقانداي شەبەردىڭ جاساپ شىققان بەسىگى تەڭ كەلە المايتىن ءبىر قورعانىش بەسىك بار. ول – ءسابي ءۇشىن اناسىنىڭ ايالى الاقانى مەن جىلى قۇشاعى.
دۇنيەدەگى بارلىق ءىلىم مەن ءبىلىم اتاۋلىنىڭ پەرزەنت ءۇشىن باستاۋىندا تۇرار ءبىر قاسيەتتى قاينار كوز بار. ول – انانىڭ پەرزەنتىنە ۇيرەتەتىن ءتالىمى.
بارلىق ەڭبەك ەتىپ جۇرگەن جانداردىڭ جاساپ جۇرگەن قىزمەتىنەن الار ساۋابى اسىپ تۇسپەسە، كەم تۇسپەيتىن ءبىر ۇلى كۇش بار. ول – انانىڭ پەرزەنتىنە ەتكەن ەڭبەگى.
ەشقاشان تاۋسىلمايتىن، تۇگەسىلمەيتىن، ورتايمايتىن ءبىر عاجايىپ ۇلى سەزىم بار. ول – انانىڭ پەرزەنتىنە دەگەن ماحابباتى.
پەرزەنت اتاۋلىنىڭ جۇرەگىن قۋانىشقا تولتىرار ءبىر ۇلىق كۇن بار. ول – انانىڭ مەرەكەسى.
كوكتەم ايىنىڭ باستاپقى مەرەكەسىنىڭ ءبىرى – قىرمىزى گۇلدەي قۇلپىرعان قىز-كەلىنشەكتەر مەن انانىڭ مەرەكەسى.
مەرەكەدە قۇتتىقتاپ قايت اناڭدى
سەن ومىرگە كەلگەن سوناۋ شاقتاردا،
ءسابي ساۋلە ۇلاسقاندا اق تاڭعا.
مىنا الەمنىڭ پاديشاسى سەكىلدى
جورگەگىڭدە سەن نۇرلانىپ جاتقاندا،
ساعان مەيىرىم ارناعان جان كىم ەدى؟
تەك سەن ءۇشىن كۇن ويانىپ اسپاندا،
ءبىر سەن ءۇشىن جۇلدىز ساۋلە شاشقاندا.
ءسابي شاعىڭ كەلەشەككە ۇمتىلىپ،
اپىل-تاپىل سەن جۇگىرىپ باسقاندا،
قارسى الدىڭنان قۇشاق جايعان كىم ەدى؟
ءار ءتالىمى ءبىلىم بولىپ سىڭگەندە،
سول تالىممەن اينالانى بىلگەندە.
ارمان قۋىپ جاستىق، بالاڭ كوڭىلىڭ،
ۇيدەن شىعىپ، سان جولداردا جۇرگەندە،
ءبىر سەن ءۇشىن الاڭ بولعان كىم ەدى؟
مەيلى، جىلدار تۇسە بەرسىن اراعا،
ۋاقىت جىلجىپ ءوتسىن، مەيلى، سانادا.
ەسەيگەندە، ەرجەتكەندە ەندىگى
سونىڭ ءبارىن ۇمىتۋعا بولا ما؟
مىنە، ءوزىڭ دە ازامات بوپ قالدىڭ شىن،
جۇرەگىڭدە تاعى دا ءبىر ءان كۇلسىن.
مەرەكەدە قۇتتىقتاپ قايت اناڭدى،
بوبەك كۇنىڭ قايتادان ءبىر جاڭعىرسىن.
ءسابي شاعىڭ ءبىر ورىندا تۇرا ما،
جۇرەگىڭمەن الدىڭ ونى ۇعا الا.
سەنى ەسەيتىپ، ساعان ءومىر سىيلاعان،
ول – وسى ءبىر ۇلى انا.
قۇتتىقتاپ قايت، كۇلىمدەسىن بىرگە كۇن،
ەسكە ءتۇسسىن قايتا بوبەك كۇندەرىڭ.
قانداي سىيلىق جاسايمىن دەپ قامىقپا،
ەڭ ۇلكەن سىي – سەنىڭ ەسەن جۇرگەنىڭ.
You Might Also Like
-
شقو، وسكەمەن قالاسى ورالحان بوكەي اتىنداعى №44 ليسەيىنىڭ 8 سىنىپ وقۋشىسى: بەيبىت بوتاگوز بەيبىت قىزى جەتەكشىسى: قاجىبايەۆا جادىرا كەنجەحان قىزى
-
اقتوبەنىڭ قارعالى اۋدانىندا 17 مىڭنان استام ادام تۇرادى. ولاردىڭ 32 پايىزى وزگە ۇلت وكىلى. اۋدانداعى 17 مەكتەپتىڭ ۇشەۋى ورىس تىلىندە، وزگەسى ارالاس تىلدە ءبىلىم بەرەدى.
