InfoHub Logo

قوستاناي وبلىسى اۋليەكول اۋدانى
№121 قۇسمۇرىن ورتا مەكتەبى
9-ا سىنىپ وقۋشىسى گيليازيتدينوۆا ناتاليا
جەتەكشىسى: قازاق ءتىلى مەن ادەبيەتى ءپانىنىڭ ءمۇعالىمى جانتىلەسوۆا مادينا حامزا قىزى

«ۇستازدىق ەتكەن جالىقپاس، ۇيرەتۋدەن بالاعا» دەپ اباي اتامىز ايتقانداي، ۇستاز ەڭبەگىنىڭ قىر-سىرى مول. بۇل  قيىن دا جاۋاپتى، شىعارماشىلىق ەڭبەك ەكەندىگىن بارشامىز مويىندايمىز. سوندىقتان مەن ءۇشىن ءمۇعالىم – ەڭ مارتەبەلى، قۇرمەتكە لايىق ماماندىق.

مەنىڭ تۇسىنىگىمدەگى  ءمۇعالىم – رۋحى تازا، وي – ءورىسى بيىك، ۇلتى مەن وتانىنىڭ بولاشاعى ءۇشىن تەر توگىپ، شىدامدىلىق پەن تا­باندىلىقتىڭ ۇلگىسىن كورسەتۋشى، جا­ڭا­شىلدىقتىڭ باستاۋشىسى، ءجۇ­رە­گى – جىلى، كوڭىلى – دارقان ادام.

بارلىق ۇلى ادامدار ءمۇعالىم الدىنان وتكەن، ءبىلىم العان، ۇلگى-ونەگە كورگەن. ولاردىڭ ءبارى ۇستاز الدىنا باس يگەن. ۇستازدار شاكىرتتەرگە تۋعان بالاسىنداي قاراپ، اقىل ايتىپ، ءبىلىم نارىمەن سۋسىنداتىپ، وڭى مەن سولىن تانىتادى. ءار بالانىڭ كوڭىلىن تاۋىپ، جاعدايىن جاساپ، قامقورلىق  كورسەتەدى. بالالار مۇعالىمىنە زور قۇرمەتپەن قاراپ، ءوزىنىڭ ىشكى سىرلارىمەن اشىق بولىسەدى. ۇستاز جەكە ۋاقىتىن اياماي، بارلىق ءبىلىمىن، جان-دۇنيەسىن، مەيىرىمىن وقۋشىلارعا بەرەدى. ءتىپتى ومىردەن ءوز ورنىن تابۋعا دا كومەكتەسەدى.

مەكتەپ قابىرعاسىندا ءبىز كوپتەگەن پاندەردى وقيمىز. مەن ءۇشىن ەڭ ماڭىزدى ءپان – قازاق ءتىلى. قازاق حالقى تالاي جىلدار بويى اڭساعان تاۋەلسىزدىگىنە قول جەتكىزگەنىنەن بەرى كوپتەگەن ارماندار ورىندالدى. سونىڭ جارقىن كورىنىسىنىڭ ءبىرى ءبىزدىڭ ەلدە مەملەكەتتىك ءتىل - قازاق ءتىلى.

مەن – گيليازيتدينوۆا ناتاليا، قاسيەتتى اۋليەكول اۋدانىنىڭ اتاقتى عالىم شوقان ءۋاليحانوۆتىڭ تۋعان جەرىنىڭ تۋماسىمىن. ۇلتىم تاتار بولسا دا، جۇرەگىم ۇنەمى «قازاق» دەپ سوعادى. مەن وقيتىن توعىزىنشى سىنىبىم كوپ ۇلتتى، ءبىراق ءبارىمىز وتە تاتۋمىز، ءارقاشان بىر-بىرىمىزگە قول ۇشىن سوزامىز.

مەملەكەتتىك ءتىلدى جاقسى دەڭگەيدە مەڭگەرۋىم قازاق تىلىنەن ساباق بەرەتىن ءمۇعالىمىم - مادينا حامزا قىزىنىڭ ەڭبەگى دەپ بىلەمىن. ول بىزگە قازاق ءتىلىن ءبىرىنشى سىنىپتان بەرىپ كەلە جاتىر. وقۋشىلارىنا ۇنەمى اقىل ايتىپ، ءجون سىلتەپ وتىرعان ۇستازىمىزدىڭ ءسوزى ءبىز ءۇشىن التىننان دا باعالى .  

مۇمكىن سوندىقتان مۇعالىمىمە ەلىكتەپ، سوعان قاتتى ۇقساعىم كەلىپ، مەن  كەلەشەكتە جوعارى وقۋ ورنىنا ءتۇسىپ، قازاق ءتىلى ءپانىنىڭ مامانى بولۋدى ارماندايمىن. جوعارى وقۋ ورنىن اياقتاپ، ءوز اۋىلىما ورالىپ، كىشكەنتاي بۇلدىرشىندەردى قازاقشا وقىتقىم كەلەدى. مۇراتىما قول جەتكىزۋ جولىندا وزىمە قازاق تىلىندە جەتىك سويلەۋ دەگەن ماقسات قويدىم. بوس ۋاقىتىمدا قازاقشا اندەردى شىرقاۋدى، ولەڭدەردى جاتقا ايتۋدى، ادەبي شىعارمالاردى وقۋدى ۇناتامىن. سۇيىكتى اقىن- جازۋشىلارىم -  مۇقاعالي ماقاتايەۆ، ساكەن سەيفۋللين، مۇحتار اۋەزوۆ، قالقامان سارين.

جازدا مەملەكەتتىك ءتىلدى جاقسى بىلەتىن،  ۇزدىك وقۋشىلارعا ارنالعان دەمالىس ورنىنا باردىم. بىرنەشە جىل بويى قازاق ءتىلى ءپانى بويىنشا رەسپۋبليكالىق وليمپيادا، بايقاۋ، سايىستارعا ۇنەمى قاتىسامىن. بيىلعى جىلدىڭ قىركۇيەك ايىندا قوستاناي قالاسىنا بارىپ، «مىڭ بالا» بايقاۋىنا قاتىستىم. جەڭىسكە جەتپەسەم دە، بايقاۋدان قاناتتانىپ كەلدىم. ويتكەنى جاڭا دوستارىممەن تانىسىپ، ولارمەن قازاق تىلىندە  سويلەسىپ، ەرەكشە سەزىمدەرگە بولەندىم. جەلتوقسان ايىندا اۋدان بويىنشا پاندىك وليمپيادانىڭ باس جۇلدە يەگەرى اتاندىم. وسىنداي جەتىستىكتەرىممەن مەملەكەتتىك ءتىلدىڭ وركەندەۋىنە شاعىن بولسا دا، ۇلەسىمدى قوستىم.

مەملەكەتتىك تىلىنە دەگەن قۇرمەتىم قازاق حالقىنا دەگەن قۇرمەتىم دەپ تۇسىنەمىن. قازاقستاندا تۇراتىن وزگە ۇلت وكىلدەرى قازاق حالقىنىڭ مادەنيەتىن، تاريحىن، ادەبيەتىن، ءتىلىن بىلۋگە مىندەتتى دەگەن سوزدەرمەن ويىمدى اياقتاعىم كەلەدى.

---