InfoHub Logo

وڭەزدەنگەن ساڭىراۋقۇلاق، نەمەسە قاراپايىم تىلمەن ايتقاندا وڭەز - الەمدە ەڭ كوپ تارالعان ساڭىراۋقۇلاقتىڭ ءتۇرى. وعان دىم بولسا جەتكىلىكتى. سوندىقتان ءسىزدىڭ ءۇيىڭىز بەن پاتەرىڭىزدەگى بىرنەشە قۇبىردان سۋ اقسا نەمەسە قۇبىر تەسىلىپ، سۋ تامشىلاپ تۇرسا، بۇل وڭەزدىڭ پايدا بولۋىنا وتە ىڭعايلى جاعداي جاسايدى. وڭەزدىڭ كەيبىر تۇرلەرى تۇرعىن جايعا عانا ەمەس، سونىمەن قاتار ادامنىڭ دەنساۋلىعىنا دا زياندى.

مىنا از عانا بەلگىلەرگە نازار اۋدارىڭىز: ولاردىڭ ءارقايسىسىنان بايقاساڭىز، ءسىزدىڭ ۇيگە دە وڭەز پايدا بولدى دەپ دابىل قاعۋعا بولادى.

سۋ تامشىلاپ تۇرسا...

قۇبىرلاردان سۋدىڭ تامشىلاپ تۇرۋ ماسەلەسى ءتىپتى جاڭا سالىنعان ۇيلەردە دە كەزدەسىپ جاتادى. ءۇيىڭىزدى ءجىتى باقىلاڭىز: قابىرعاعا نەمەسە توبەدەن سۋ تامشىلاپ تۇرعانىن بايقادىڭىز با؟ بايقاساڭىز، وندا ءسىزدىڭ ءۇيىڭىزدىڭ ءبىر بۇرىشىندا مىندەتتى تۇردە ساڭىراۋقۇلاق ءوسىپ تۇرۋى مۇمكىن.

ءيىس

وڭەزدىڭ قولايسىز، كوگەرگەن دىم ءيسى وتە جىلدام تارالادى. بارلىق بولمەلەردى ارالاپ شىعىپ، وڭەزدىڭ نەگىزگى وشاق كوزىن تابۋعا بولادى. ەشتەڭە كورمەي تۇرسىز با؟ ەندەشە، ءتۇسقاعازدى قوپارۋعا تۋرا كەلەدى. كەيبىر كەزدە ساڭىراۋقۇلاق قابىرعانىڭ ىشىندە دە ءوسىپ شىعۋى مۇمكىن.  

بۋلانعان تەرەزە

تەرەزەنىڭ بۋلانۋى دىمنىڭ ارتۋىنان پايدا بولادى. كوپ ادامدار تەرەزەنىڭ ۇنەمى بۋلانىپ تۇرعانىنا ۇيرەنىپ كەتەدى دە، نازار اۋدارمايدى. بۇل بەكەر. مۇنداي جاعداي ۇيدە ساڭىراۋقۇلاقتىڭ پايدا بولعانىن بىلدىرەدى.

كوزدىڭ قىشىپ دۋىلداۋى جانە تاماقتىڭ ءىسىنۋى

قىستا مۇنداي جاعدايدى جەڭىل سۋق ءتيىپ قالۋى دەپ قابىلداۋعا بولادى. دەگەنمەن، كوزدىڭ قىزارۋى، تاماقتىڭ ءىسىنۋى مۇرىننىڭ شىرىشتى قابىعىنىڭ اۋىرۋىمەن استاسسا ويلانىڭىز. مۇنىڭ سەبەبى ساڭىراۋقۇلاقتان پايدا بولعان اللەرگيا بولۋى مۇمكىن.

تىنىس الۋ ورگاندارىنىڭ اۋرۋلارى

وسىنداي جاعدايلار اۋىر جوتەلگە، كەۋدەدە سىرىل پايدا بولۋىنا الىپ كەلۋى مۇمكىن. ساڭىراۋقۇلاقتاردىڭ كەيبىر تۇرلەرى ادامدى لوقسۋعا دەيىن جەتكىزەدى، بۇل جاعداي ادامنىڭ استمامەن اۋىرۋىنا اكەلىپ سوقتىرادى.

كەۋدەنىڭ شاعىپ اۋىرۋى

كەۋدەنىڭ شاعىپ اۋىرۋى – ساڭىراۋقۇلاقتان پايدا بولاتىن اللەرگيانىڭ باستى سەبەبى. سۋىق ءتيىپ اۋىرعاننان ەمدەلىپ بولساڭىز، كەۋدەڭىز ءالى شاعىپ اۋىرىپ جۇرسە ءۇيىڭىزدى قاراپ شىعىڭىز. سەبەبى، بۇل ساڭىراۋقۇلاق كەسەلى بولۋى مۇمكىن.

ءقاۋىپتىڭ قايتىپ كەلۋى

وڭەزدى تازالاپ بولعاننان كەيىن ءۇيدى ۇنەمى تەكسەرىپ وتىرۋ كەرەك. وڭەز اس ۇيدەگى قول جۋعىشتىڭ استىندا پايدا بولۋى ىقتيمال.

ارنايى مامانداردى شاقىرۋعا بولا ما؟

جوعارىدا كەلتىرىلگەن اقپاراتتاردان كەيىن وڭەز اۋىر اللەرگيالىق رەاكسيالارعا الىپ كەلەتىنىن تۇسىندىك. ەگەر ول رەاكسيالار ءسىزدىڭ بويىڭىزدا پايدا بولسا، ارنايى ماماندانعان قىزمەت ءتۇرىن شاقىرۋعا بولادى. ويتكەنى، ءوزىڭىزدىڭ دەنساۋلىعىڭىزدى ءقاۋىپتى جاعدايعا قالدىرۋعا بولمايدى. ەگەر دەنساۋلىعىزدا اقاۋ بولماسا، وندا ساڭىراۋقۇلاقتان ءوز كۇشىڭىزبەن قۇتىلۋعا مۇمكىندىك بار.

وڭەزدى ءوزىڭىز قالاي جەڭە الاسىز؟

وڭەزدى قورعانۋ قۇرالدارىنىڭ كومەگىنسىز تازالاۋعا بولمايدى. رەسپيراتور، كوزىلدىرىك، قولعاپ – وسىلار جەتكىلىكتى. وڭەزدى جۋاتىن ەرتىندىنى دايىنداۋ قاراپايىم: حلوردى سۋعا 1:3 مولشەردە ەرىتىپ، سودان كەيىن قاتتى ششەتكامەن ۇقىپتاپ تازالاڭىز. تازالانعان جەردى تازا سۋمەن تاعى ءبىر جۋىپ شىعىڭىز دا فەنمەن ۇقىپتاپ كەپتىرىڭىز.

---