InfoHub Logo

ءبىر كەدەيدىڭ ءۇش بالاسىنىڭ ورتاسىندا مال دەگەندە ءبىر جالعىز وگىزى بولىپتى. وگىز وراسان ۇلكەن ەكەن. وگىزدى وتتاتۋ ءۇشىن ۇلكەنى — باسىنا، ورتانشىسى — بەلىنە، كەنجەسى قۇيىمشاعىنا ءمىنىپ، وتتانادى ەكەن. ءبىر كۇنى جايىلىمدا جۇرگەندە، وگىز وتتاماي قالىپتى. قۇيىمشاعىندا وتىرعان كەنجەسى:

— وگىز جاپالاماعالى بۇگىن ون كۇن بولدى، وسىنى ورتا بەلدەگى ورتانشىعا ايتا سالىڭىز، — دەپ، جانىنان ءوتىپ بارا جاتقان ءبىر جولاۋشىعا تاپسىرىپتى. جولاۋشى ۇزاق كۇن ءجۇرىپ، كەشكە قوناعا وگىزدىڭ بەلىندە وتىرعان ورتانشىعا جەتىپتى. جولاۋشى وعان كەنجەسىنىڭ سالەمىن ايتسا، ورتانشىسى:

— وسى وگىزدىڭ ءبۇيىرى ورتالانىپ، ءىشى قابىسىپ بارا جاتىر ما دەپ، ءوزىم دە كۇدىكتەنىپ وتىر ەدىم، وسىنى وگىزدىڭ باسىنداعى اعامىزعا، بارا قالساڭىز، جولدان ايتا كەتەرسىز، — دەپتى.

جولاۋشى تۇنىمەن ءجۇرىپ، تاڭ اتا وگىزدىڭ باسىنا جەتىپ، وگىزدىڭ باسىنداعى بالاعا:

— مەن وسى وگىزدى ورلەي، ات شالدىرماستان دامىلسىز ءبىر كۇن، ءبىر ءتۇن ءجۇرىپ كەلەمىن. قۇيىمشاقتاعى كەنجەنىڭ وگىز جاپالاماعالى ون كۇن بولدى دەپ، ورتانشىڭىز وگىزدىڭ ءبۇيىرى ورتالانىپ، ءىشى قابىسىپ بارا جاتقانىن بايقاپ وتىرمىن دەپ، ساعان سالەم ايتتى، — دەيدى.

سوندا وگىزدىڭ باسىنداعى بالا:

— ا، وگىز شولدەپ ءجۇر ەكەن دەپ، سۋ ىزدەپتى. مولشەرلى جەردەن وگىز قانارلىق مول سۋ تابا الماپتى. ەندى كەيىن كەتىپ بارا جاتقان ءبىر جولاۋشىعا وگىزدىڭ باسىنداعى بالا تاپسىرىپتى:

— وگىزدى سۋارۋعا كول ىزدەپ بارامىن، ورتاداعى ورتانشىعا ادەيى جولىعىپ ايتىڭىز، وگىزدى تەزدەتىپ تەبىنسىن، — دەپتى. جولاۋشى ءجۇرىپ وتىرىپ، شاڭقيعان تۇستە وگىزدىڭ بەلىندە وتىرعان ورتانشىعا كەلىپ، اعاسىنىڭ تاپسىرعانىن ايتىپتى. وندا ورتانشى بالا:

— ەندەشە ەرتە بارساڭىز، قۇيىمشاقتاعى كەنجەمىزگە ايتا سالىڭىز، قاۋزاپ، قامشىلاي ءتۇسسىن، — دەپتى. جولاۋشى كۇن ۇياسىنا كىرە وگىزدىڭ قۇيىمشاعىنداعى كەنجەسىنە جەتىپ، ورتانشىنىڭ تاپسىرعانىن ايتىپتى. سوندا باسىندا وتىرعان بالا وگىزدى ايدىن شالقار كولگە اكەپ سۋعارىپتى. وگىز ۇلكەن كولدى ءۇش-اق ۇرتتاپ، قانباي قالىپتى. ۇشەۋى وگىزدەن ءتۇسىپ تۇرعاندا، اسپاننان ءبىر اقيىق بۇركىت كەلىپ، وگىزدى ءىلىپ اكەتىپتى. وگىزدى العان بۇركىت اينالىپ ۇشىپ ءجۇرىپ، ءبىر بايتەرەككە قونسا، ول بايتەرەك ءبىر سەركەنىڭ ءمۇيىزى ەكەن. سەركە ءمۇيىزىن شايقاعاندا، سەركەنىڭ ساقالىندا كولەڭكەلەپ جاتقان ءبىر شالدىڭ كوزىنە وگىز ءتۇسىپ كەتىپتى. شال كوزىن ۋقالاپ كەمپىرىنە:

— كوزىمە ءبىر ءشوپ ءتۇسىپ كەتتى، ارىلتا قاراپ، الىپ تاستاشى، — دەسە، كەمپىرى ءارى قاراپ، بەرى قاراپ، تابا الماي، ادەيى ارىلتا ىزدەۋگە سارى اتقا مىنگىزىپ، قولىنا ساباۋ ۇستاتتى، سالت اتتى كىسى جىبەرىپتى. بۇل كىسى وگىزدى ءۇش كۇن قاراپ، ازەر تاۋىپ، كوزدىڭ كولىنە ءتۇسىپ، ارام ولگەن جەرىنەن توقىمعا سالىپ، سۇيرەتىپ، شىعارىپ تاستاپتى.

ەكى-ۇش جىلدان كەيىن وگىزدىڭ ولەكسەسىنە ءشوپ شىعىپ، سۇيەگى سولقىلداعان ساز بولىپتى. جاۋىرىن سۇيەكتىڭ جازىعىنا ەل جايلاپ، مال جايىلاتىن ءورىس بولىپتى. ءبىر كۇنى وتىرعان اۋىلىمەن، جايىلعان مالىمەن جاۋىرىندى ءبىر تۇلكى سۇيرەي الا جونەلىپتى. اۋىل ادامدارى بايگە اتپەن، قىران، تازىمەن جابىلا قۋىپ ءجۇرىپ، تۇلكىنى سوعىپ الىپتى. تۇلكىنىڭ تەرىسىن يلەپ، بايبىشە بالاسىنا تۇماق قىلىپ بەرسە، ءبىر قۇلاعىنا جەتىپ، ءبىر قۇلاعىنا جەتپەي قالىپتى.

— ايتىڭدار، بالالار، كىم ۇلكەن؟

---