قۇرىم سارى ايعىر مەن سىنشىل شولاق قاسقىر
بۇرىندا ءبىر باي بولعان ەكەن. ول بايدىڭ جىلقىسىنا سان جەتپەيدى. ۇشان-تەڭىز كوپ بولىپتى. وسى جىلقىنىڭ باسى — ءبىر ايعىر ەكەن. بايدىڭ بارلىق جىلقىسى دا ءبىر، وسى ايعىرى دا ءبىر ەكەن. مۇنى قۇرىم سارى ايعىر دەپ اتايدى ەكەن. مۇنىڭ ءۇيىرىن ەش ۋاقىتتا جىلقىشى باقپايدى، قۇرىم سارى ايعىر ءوزى باعىپ، ءيىرىپ، قايىرىپ، ورگىزىپ، تۇرعىزىپ جۇرەدى ەكەن. قۇرىم سارى ايعىردىڭ ءۇيىرىن ۇرى الىپ، يا جۇتتان ءولىپ كورمەپتى. قۇرىم سارى ايعىر تۇلپار ەكەن. بۇدان تۋعان قۇلىنى دا تۇلپار بولادى ەكەن. قۇرىم سارى ايعىر ومىرىندە قاسقىرعا جىلقى العىزباپتى. قۇرىم سارى ايعىردىڭ بالاسى ءبارى دە تۇلپار بولىپ تۋادى ەكەن. مۇنى ءبىر سىنشىل شولاق قاسقىر ءبىلىپ، ىلعي وسى قۇرىم سارى ايعىردىڭ قۇلىنىن وسىرمەي جەلىدە تۇرعاندا جەپ كەتەتىن بولىپتى. ءتىپتى قۇرىم سارى ايعىردىڭ ۇرىعى دارىعان بيە، بايتالعا دا ءوش بولىپتى. «يت جۇيرىگىن ءبورى سۇيمەيدى» دەگەن. قۇرىم سارى ايعىردان تۇلپار تۋىپ، جۇيرىك كوبەيسە، قاسقىرعا جايسىز تيەتىنىن سىنشىل شولاق قاسقىر ەرتەدەن بىلگەن، بۇل قاسقىردىڭ سىرتتانى ەكەن.
سىنشىل شولاق قاسقىردىڭ وشىككەنىن ءبىلىپ، قۇرىم سارى ايعىر وعان جىلقى العىزباي ءجۇرىپتى. شولاق قاسقىر قانشا تورۋىلداپ شاپسا دا جانۋار قۇرىم سارى ايعىر كەۋدەلەسىپ جىلقىعا دارىتپاپتى.
قۇرىم سارى ايعىر وسىلاي سىنشىل شولاق قاسقىرعا جىلقى بەرمەي جۇرە بەرىپتى. ءبىر زامانداردا قۇرىم سارى ايعىردىڭ بالالارىنىڭ الدى قۇنان، دونەن، بەسكە شىعار بولدى. مۇنى كورگەندە سىنشىل شولاق قاسقىر وزىنە اجال وعى جەتكەندەي كوردى. جەيىن دەسە، قۇرىم سارى ايعىر العىزبادى. قۇرىم سارى ايعىر ولسە، باسقاسىن جەۋ وڭاي كورىندى. قۇرىم سارى ايعىردىڭ وزىنە سىنشىل شولاق قاسقىر تالاي رەت جەيىن دەپ شاپسا دا الا الماي ءجۇردى، جەكپە-جەككە تۇگىل جىلقى دا بەرمەيدى.
ءبىر جىلدارى قىس وتە قاتتى بولدى. مۇندايدا قاسقىردىڭ قۇتىرىپ كەتەتىنى قانداي. جەرىك ايى تۋعان سوڭ قۇتىرىنىپ قاسقىر اتاۋلى مالعا جەريدى. شولاق قاسقىردىڭ كوزىنەن وت ءۇزىلىپ، ۇنەمى اڭساعانى قۇرىم سارى ايعىر بولدى. ونى جەمەي جەرىگىن باسپايتىنداي كورەدى.
ءبىر قاتتى بوراندا سىنشىل شولاق قاسقىر ۇلىپ، كوپ قاسقىردى قاسىنا جيناپ الىپ، قۇرىم سارى ايعىردىڭ ۇيىرىنە كەلە-اق تيىسەدى. قۇرىم سارى ايعىر جالعىز ءوزى كوپ قاسقىرعا جىلقى بەرمەۋگە كوپ ۋاقىت تارتىسادى. اقىرىندا قويمايتىن بولعان سوڭ، جانۋار ءوزى قاشادى. نە كەرەك، سول سياقتى تۇلپاردى كوپ قاسقىر مۇزعا قاماپ جارىپ ولتىرەدى. بۇل سولاي جاتا تۇرسىن. ەندى باسقى جاعىنا كەلەيىك. قۇرىم سارى ايعىردىڭ قايىرۋىمەن عانا تۇرعان جىلقى ونىڭ ۇستىنە قاسقىردان ۇركىپ جەلىگىپ، دۇركىرەپ شاۋىپ جونەلەدى.
ەرتەڭىندە ىزدەپ كەلسە، جىلقى جوق، ىعىپ كەتكەن ەكەن. ءبىر جەردە قۇرىم سارى ايعىردىڭ ولىمتىگىن تاۋىپ الادى. بايعا حابار دا بارىپ قالدى. قۇرىم سارى ايعىردى جوقتاپ باي ۇنەمى جاتىپ الدى. ويناپ، كۇلمەدى. سوندا ءبىر سىنشى ايتتى دەيدى: «قۇرىم سارى ايعىر تۇلپار ەدى، ودان تۋعان قۇلىن دا تۇلپار ەدى، سونى ءبىلىپ قۇرىم سارى ايعىردى جەگەن سىنشىل شولاق قاسقىر. ەگەر شولاق قاسقىر ولمەسە، ول سەنىڭ جىلقىڭنىڭ تۇقىمىن قۇرتادى»، — دەپتى.
مۇنى ەستىگەن سوڭ باي قۇرىم سارى ايعىردىڭ بالاسىنان ءتورت اتتى باپتاپ قاتىرىپ، جاراتادى. اتتار ابدەن بابىنا كەلگەن سوڭ، قاسقىردى ىزدەپ شىعىپ، ءبىر جەردەن كوپ قاسقىردىڭ ءىزىن تابادى. ىزگە ءتۇسىپ قۋا-قۋا كەتىپ بارا جاتقان قاسقىرلاردىڭ ۇستىنەن شىعادى. ىشىندە سىنشىل شولاق قاسقىر دا بار ەدى. بۇل قۋا بەرەدى. ءبىر مەزگىلدە سىنشىل شولاق قاسقىر بۇرىلىپ، ارتىنا قارايدى. قاراسا ءبىر ات وقشاۋ الدىندا كەلە جاتىر ەكەن. شولاق قاسقىر قاسىنداعىلارعا بىلدىرەدى. «بۇل اتتىڭ ارتى الاسا، الدى جوعارى ەكەن. ورگە قاراي شابايىق»، — دەيدى. شولاق قاسقىر باستاپ بۇلار ورگە قاراي شابادى. ارى-بەرى جۇرگەن سوڭ الدى جوعارى ات ورگە شابا الماي قالىپ قويادى. مۇنىڭ الدىنا ەكىنشى ءبىر ات شىقتى. مۇنى دا سىنشىل شولاق قاسقىر قاراپ كورىپ: «بۇل اتتىڭ ارتى بيىك، الدى الاسا ەكەن، ويعا قاراي شابايىق»، — دەپ تومەن قاراي شابادى. الدى الاسا ات ىلديعا قاراي شابا الماي، بۇ دا قالىپ قويادى. مۇنىڭ الدىنا ءۇشىنشى ءبىر ات شىعادى. سىنشىل شولاق قاسقىر مۇنى دا قاراپ: «بۇل اتتىڭ كوزى شاعىر ەكەن»، — دەپ كۇننىڭ استىنا قاراي شابادى. كۇننىڭ استىنا قاراي شاپقان سوڭ، كوزى كۇنگە شاعىلىپ بۇل ات تا شابا الماي قالىپ قويادى. مۇنىڭ الدىنا ەڭ اقىرعى ءتورتىنشى ات شىعادى. شولاق قاسقىر قاراپ: «بۇل اتتىڭ ون ەكى مۇشەسىندە ءمىن جوق ەكەن»، — دەيدى. جۇيرىك ات ءبىر قالسا اياعىنان قالادى، دەپ نەشە ءتۇرلى تاۋ-تاسقا سالىپ جورتا بەرەدى. اقىرىندا وسى اتپەن سىنشىل شولاق قاسقىردى قۋىپ جەتىپ ۇرىپ الادى. ءسويتىپ، قۇرىم سارى ايعىردى جەگەن شولاق قاسقىردى ءولتىرىپ، دۇشپانىن مۇقاتىپ، مۇراتىنا جەتەدى.
You Might Also Like
-
بۇرىنعى زاماندا ءۇش اعايىندى كىسى بار ەكەن. ولاردىڭ ورتاسىندا جالعىز وگىزى بار ەكەن. ءبىر كۇنى وگىزى بۇنى-قانى بولىپ، توگىسىپتى.
-
قاي كەزدە ەكەنى بەلگىسىز، ءبىر قىرعاۋىل، ءبىر قاسقىر، ءبىر تۇلكى جانە ءبىر قويان تورتەۋى ءتوس سوعىستىرىپ، دوس بولىپتى. ولار وزدەرىنىڭ اراسىندا اتاعى شىققان اقىلدى قوياننىڭ بولعاندىعىن زور مارتەبە كورىپ، م...
