InfoHub Logo

وسى ۋاقىتقا دەيىن ءوزىمدى، ويىمدى وزگەرتۋگە سەپتىگىن تيگىزەتىن كوپتەگەن موتيۆاسيالىق كىتاپتاردى وقىعان بولاتىنمىن. ولاردىڭ ءارقايسىسى سانامدى جاڭعىرتىپ، از دا بولسا  ومىرگە باسقاشا كوزقاراسپەن قاراۋدى ۇيرەتتى. الايدا، جۋىردا عانا قولىما تۇسكەن «تۇيسىگىڭمەن ويلاي ءبىل» اتتى كىتاپتىڭ وي-سانامدى دامىتۋعا قوسقان ۇلەسى ولاردان دا اسىپ ءتۇستى. قازاقشاعا مىرزاگەلدى كەمەل اۋدارعان كانادالىق بەلگىلى جازۋشى دجون كەحونىڭ بۇل كىتابى-  نولدەن باستاپ ءوزىن-وزى جەتىلدىرۋدى ماقسات ەتكەن ءاربىر ادام ءۇشىن تاپتىرماس تۋىندى. سەبەبى، مۇندا بويىڭىزداعى كەمشىلىكتەردەن ارىلىپ، تابىسقا كەنەلۋدىڭ، ارمانىڭىزعا جەتۋدىڭ وڭاي ءارى ءتيىمدى ادىس-تاسىلدەرى بەرىلگەن.  ەڭ باستىسى- اۆتور كەيبىرەۋلەر سياقتى قۇر «ادەمى» سوزدەرمەن  اقىل ايتپايدى، ءوزىنىڭ جانە اينالاسىنداعىلاردىڭ  تابىسقا جەتۋ جولىنداعى ەرەكشە ءارى جۇزەگە اسقان تاجىريبەلەرىمەن بولىسەدى. ول بارلىق يگىلىكتەر مەن ساتتىلىكتەردىڭ باستاۋى ميدىڭ كۇشىن دۇرىس پايدالانۋدا دەپ سانايدى. 
تابىس پەن باقىتقا جەتۋ قاعيداتتارىن قامتيتىن اتالمىش كىتاپ 19 بولىمنەن  تۇرادى. «شىنايى ومىرگە وزگە كوزقاراس» اتتى العاشقى بولىمىندە ومىرگە باسقاشا كوزقاراسپەن قاراۋ جايلى، ال ەكىنشى «سانا»بولىمىندە  وي-سانامىزدىڭ ومىرىمىزگە اسەرى تۋرالى ايتىلعان. ودان كەيىنگى بولىمدەر -«كوزگە ەلەستەتۋ، نەمەسە ويشا كورۋدە»  كوزگە ەلەستەتۋدىڭ قالاعان ماقساتقا جەتۋدەگى  كومەگى، «ويدى قالىپتاستىرۋدا» سانامىزعا جاقسى ويلاردى ۇيالاتۋ تۋرالى ءسوز قوزعايدى. كەلەسى «سەندىرۋ» ،«ءتۇسىنۋ» بولىمدەرىندە ءوزىمىزدى ساتتىلىككە سەندىرە بىلۋگە، ال «تۇيسىكتە» سىرتقى جاعدايدى وزگەرتۋ ءۇشىن الدىمەن ىشكى جان دۇنيەمىزدى وزگەرتۋگە ۇندەيدى. اۆتور «ىشكى داۋىستا» ءبىزدى تۋرا جولعا باستايتىن ەڭ سەنىمدى سەرىگىمىز-ىشكى داۋىستىڭ قۇدىرەتى، «ءتۇس كورۋدە» ءتۇستىڭ ومىرىمىزگە اسەرىن ءسوز ەتەدى. «شىنايى ءومىر» بولىمىندە ءومىردىڭ كەز كەلگەن كەلەڭسىزدىكتەرىنە مي كۇشى ارقىلى قارسى تۇرۋ، كەلەسى «زەيىن قويۋ جانە ويلاۋ» بولىمىندە دۇرىس ويلاي ءبىلۋ، ميىمىزدى بەلگىلى ءبىر يدەياعا   نازار اۋدارتۋ جولدارىن  تۇسىندىرەدى. «كوزقاراستار جانە ولاردىڭ قالىپتاسۋىندا» كەز كەلگەن جاڭا كوزقاراستىڭ قالىپتاسىپ، گۇلدەنۋى ءۇشىن ۋاقىت جانە وعان كوڭىل ءبولۋدىڭ، «ءوز-وزىڭىزدى باعالاۋدا» ءوزىمىزدى جاقسى كورىپ، دۇرىس باعالاي ءبىلۋدىڭ ماڭىزى جونىندە ايتىپ وتەدى. «شىعارماشىلىق يكەمدىلىك» بولىمىندە–  ءساتتى ءومىر ءسۇرۋ ءۇشىن قاجەتتى بىلىكتىلىك-  شىعارماشىلىق يكەمدىلىك، ال «پروبلەما جوق، تەك قانا مۇمكىندىكتەر» بولىمىندە پروبلەمالار بىزگە بەرىلگەن  مۇمكىندىكتەر ەكەنىنە نازار اۋدارتادى. «ءوزىڭىزدى ەمدەڭىز»، «تابىسكەر ادامنىڭ ساناسى» بولىمدەرىندە تابىستى ادامنىڭ ساناسىن قالىپتاستىرۋ ءۇشىن قاجەتتى تاسىلدەردى اتاپ كورسەتسە،، سوڭعى «ءبىزدىڭ قارىم-قاتىناستارىمىز»، «بار كۇش-جىگەرىڭىزبەن جاتتىعىڭىز» بولىمدەرىندە اينالامىزبەن ورنىقتى قارىم-قاتىناس ورناتۋدىڭ، ءۇزىلىسسىز دامۋ جولىنداعى تۇراقتى تۇردەگى تاجىريبەنىڭ پايداسىن ءسوز ەتەدى. 
بەلگىلى فيلانتروپ ءوز كىتابىن «بۇل كىتاپ سىزگە قاجەتتى قاسيەتتەردى دامىتاتىن ادىستەردى قامتيدى، سونىمەن قاتار، ءسىز ءوز بويىڭىزداعى الەۋەتتەن وتە كوپ الا الاسىز. ءبىراق، ول ءۇشىن تەك قانا كىتاپتى وقۋ جەتكىلىكسىز. ءسىز وزىڭىزبەن جۇمىس جاساۋىڭىز كەرەك. ءسىزدى مۇمكىندىكتەرگە تولى، قىزىق ءومىر كۇتىپ تۇر. ءسىزدىڭ قيالىڭىزداعى ارماندارىڭىز – ءبارى ءوز قولىڭىزدا. بارلىعى دايىن، ءسىزدى كۇتىپ تۇر. ال، ءسىز دايىنسىز با؟» دەپ قورىتىندىلايدى. 
دامۋدىڭ داڭعىل جولىنا باستايتىن «تۇيسىگىڭمەن ويلاي ءبىل» كىتابى ارقىلى وزىمدەگى ساتسىزدىكتەردىڭ سەبەبىن ءتۇسىنىپ قانا قويماي،  ارمانىمدى شىندىققا اينالدىرۋدىڭ امال-تاسىلدەرىمەن  تانىس بولدىم. ەرەكشە ەرىك-جىگەر بەرەتىن بۇل كىتاپتىڭ سىزدەرگە دە پايداسى تيەرىنە سەنىمدىمىن. وقىڭىز، ويلانىڭىز، وزگەرىڭىز!
   

   

---