InfoHub Logo

تەكتۇرماس جەتپىس مەتردەي̆ بيىكتىكتە قالىقتاي̆ ۇشىپ، مەكتەپتەن ءۇي̆ىنە قاي̆تىپ كەلە جاتىر ەدى. ول اۋىلدان ارىرەكتە، شەكاراداعى بولات دىڭگەكتىڭ ماڭىندا سامعاپ جۇرگەن ءبىر توپ بالانى كورىپ، قىزىعا قارادى. ولار ارلى-بەرلى ۇشىپ، قۋىسپاق وي̆ناپ ءماز.

مۇنى كورىپ قۋانعان تەكتۇرماس انگە باستى:

استىمدا ءوزىۇشار-ماشينا، بارامىن جۇلدىزدار قاسىنا!..

ءۇي̆ءىنىڭ تۇسىنا جەتكەن سوڭ تەكتۇرماس ءبۇي̆ءىرى تىرسيعان سومكەسىن جەرگە تاستاپ جىبەردى دە، استىنداعى ءوزىۇشارىن بالالارعا قاراي̆ بۇرىپ، سامعاپ ۇشا جونەلدى.

وسى كەزدە ءوزىۇشارداعى ميكروفوننان اجەسىنىڭ داۋسى ساڭقىلداپ ەستىلدى:

— ءاي̆، تەكتۇرماس! اسپاننان سومكە لاقتىرعانىڭ نە سۇمدىق؟! سومكەڭ جارىلىپ، كىتابىڭ شاشىلىپ قالدى عوي̆.

— كىتاپتى جيناي̆ سال، اجە. سومكەنى ءوزىم جاماپ الارمىن.

— ءسوزدى قوي̆ىپ، ءۇي̆گە قاي̆ت، تەكتۇرماس! الدىمەن ساباعىڭدى وقى. كەي̆ءىن وي̆ناي̆سىڭ.

— اجە، كوپ بولسا ءبىر-اق ساعات وي̆ناي̆مىن.

— قاپ، مىنانى-اي̆، ءا! ءوزىۇشار دەگەن ماشينا بالە بوپ جابىستى عوي̆، بۇلارعا. بالا بىتكەننىڭ باققانى وي̆ىن، ءۇي̆گە جولاماي̆دى، اي̆تقاندى تىڭداماي̆دى...

— جاراي̆دى، اجە، سوسىن بارام عوي̆.

تەكتۇرماس ءبىر ءتۇي̆مەنى سىرت ەتكىزىپ باسىپ قالىپ ەدى، ميكروفوننىڭ ءۇنى ءوشتى.

بۇل بالانى جۇرت تەكتۇرماس دەپ بەكەردەن-بەكەر اتاعان جوق قوي̆. ونىڭ اۋزى دا دامىل تاپپاي̆تىن. مىنە، ەندى ول قاي̆تادان انگە باستى:

استىمدا ءوزىۇشار-ماشينا،

بارامىن جۇلدىزدار قاسىنا!..

بۇل ولەڭدى تەكتۇرماستىڭ ءوزى شىعارعان. ەكى-اق جول. شاما-شارقىنىڭ جەتكەن جەرى وسى بولۋ كەرەك، تەگى. ءوي̆تكەنى ول ءالى كىشكەنتاي̆، نەبارى ءبىرىنشى كلاستا وقيدى. مۇمكىن، وسكەسىن ولەڭدى ءتۇي̆دەك-تۇي̆دەگىمەن شىعارار. ءاي̆تپەسە، ءوزى اي̆تپاقشى، جۇلدىزدارعا ساپار شەگەتىن بولار.
ازىرشە استىنداعى ءوزىۇشار دەگەن ماشيناسى جۇلدىزدارعا ۇشىپ بارۋعا جارامسىز.

ءوزىۇشاردىڭ سىرتى اراسىنا جەڭىل اۋا تولتىرىلعان رەزەڭكەمەن قاپتالعان. رەزەڭكە بولعاندا، ونىڭ ءوزى — وتقا سالسا كۇي̆مەي̆ءتىن، سۋعا سالسا باتپاي̆تىن، بالتالاسا جارىلماي̆تىن مىقتى رەزەڭكە. اشەي̆ىندە ءوزىۇشار تابانى جەرگە تيەر-تيمەس بوپ، ۇشۋعا قومدانعانداي̆ قوزعالىپ، قوپاڭ-قوپاڭ ەتىپ تۇرادى. ۇستىندەگى ەرشىگىنە بىرەر بالا ءمىنىپ جاي̆عاسقاسىن، «70 مەتر» دەگەن جازۋى بار ءتۇي̆مەنى باسىپ قالعاندا، الدەبىر تەتىكتەردىڭ كومەگىمەن رەزەڭكە قاپتاۋدىڭ اراسىنا جەڭىل اۋا نىعىزدالىپ تولا باستاي̆دى. سالدەن كەي̆ءىن ماشينا بىرتىندەپ جوعارى كوتەرىلەدى. جەتپىس مەترگە كوتەرىلگەن سوڭ، نە ودان ءارى بيىكتەمەي̆، نە تومەندەمەي̆، سۋ بەتىندەگى قاي̆ىقتاي̆ شاي̆قالاقتاپ تۇرىپ الادى. وسى كەزدە «موتور» دەگەن جازۋى بار ءتۇي̆مەنى باسسا، سىم توردىڭ ىشىندەگى پروپەللەر زىرقىراي̆ اي̆نالىپ، ماشينا ىلگەرى قاراي̆ ۇشا جونەلەدى. جىلدامدىعى ساعاتىنا ون بەس، وتىز، قىرىق بەس شاقىرىمعا لاي̆ىقتالعان. بۇل ءۇشىن «15»، «30»، «45» سانى جازىلعان ءۇش ءتۇي̆مە بار. سونىڭ قاي̆سىسىن باسسا، ۇشۋ جىلدامدىعى سوعان ءساي̆كەس وزگەرىپ وتىرادى. ۇشقان كەزدە ماشينا جەتپىس مەتر بيىكتىكتەن اۋىتقىماي̆، ىلعي ءبىر دەڭگەي̆دە سامعاي̆دى. قونۋ ءۇشىن «جەر» دەگەن ءتۇي̆مەنى باسۋ كەرەك. موتور ءۇنى ءوشىپ، قاپتاۋدىڭ ىشىندەگى قوسىمشا اۋا بىرتىندەپ شىعادى دا، ماشينا باياۋ تومەندەپ كەپ، جەرگە تيەر-تيمەس بوپ قونا قالادى. كوتەرەتىن جۇگى وتىز كيلوگرامم. ودان اۋىر بالا وتىرسا، ماشينا ۇشا الماي̆دى.

ال ەندى ءوزىۇشاردىڭ قۇرىلىسى تۋرالى بۇدان ءارى تاپتىشتەپ اي̆تۋعا بولماي̆دى. ءوي̆تكەنى ول — وسى اۋىلداعى «اقكەمەر» مەكتەبىندە وقيتىن ءبىر توپ ەرەسەك بالالاردىڭ قۇپياسى. ولار ماشينانى وي̆لاپ تاۋىپ، مەكتەپ شەبەرحاناسىندا ون شاقتىسىن عانا جاساپ شىعاردى دا، كىشكەنە بالالارعا بىر-بىردەن تاراتىپ بەردى. ەندى وزدەرى باقىلاۋ مۇناراسىندا كەزەكتەسىپ وتىرىپ، كىش-كەنتاي̆لاردىڭ قالاي̆ ۇشقانىن قاداعالاي̆تىن كورىنەدى. مۇنىسى — ماشينانى سىناقتان وتكىزگەنى. ەگەر ماشينا وزدەرىنە ۇناسا، ونى كوپتەپ جاساپ، عىلىم ورداسىنا تىلەك بىلدىرمەك. ءتىپتى كەي̆ءبىر بالالار وسىنداي̆ ماشينانى جاساپ شىعارۋ ءۇشىن، مەكتەپ قاسىنان زاۋىت سالۋ كەرەك دەگەندى دە اي̆تىپ ءجۇر. بۇل ماسەلە قالاي̆ شەشىلەدى؟ ءالى بەلگىسىز. ال «اقكەمەر» مەكتەبىندەگى وقىمىستى بالالاردىڭ وسى ماشينانى جاساۋ ءۇشىن سىزعان جوباسى جەتى قابات سەي̆ءفتىڭ ىشىندە ساقتاۋلى تۇر. شەكارا جاقىن. ارعى بەتتە قاراجۇرەك اتتى ەل بار. اباي̆ بولماسا، جوبانى ۇرلاپ اكەتۋى مۇمكىن.

بالا بىتكەن ىلعي دا تاپقىر عوي̆. ولار كەزىندە قالامۇش، قالامساپ، وشىرگىش، سىزعىش دەگەن سوزدەردى وي̆لاپ تاپقان. مىنا جاڭا ماشينانى قالاي̆ اتاۋ كەرەكتىگى تۋرالى اڭگىمە بولعاندا، كىشكەنتاي̆ بالالار «ءوزىۇشار، ءوزىۇشار» دەپ شۋلاپ قويا بەرىپتى. ءوي̆تكەنى ماشينا، شىنىندا دا، ءوزى ۇشادى عوي̆!..

مىنەكي، ماشيناسىنىڭ ميكروفونىن اشقان تەكتۇرماس بالالارعا تاياپ قالدى. اي̆عاي̆لاپ كەلەدى:

— بۇل — مەنمىن! مەن! مەن كەلدىم، مەن!

— سەن بولساڭ قاي̆ت دەي̆ءسىڭ؟

— ءسۇي̆ءىنشى سۇراي̆سىڭ با؟

— اجەڭ تاعى دا ساعان قاراي̆ اۆتومات-گالوشىن لاقتىرىپ، نە ىستەرىڭدى بىلمەي̆ قاپ جۇرمە. حا-حا-حا!..

سوڭعى ءسوزدى اي̆تقان — ءتورتىنشى كلاستا وقيتىن، ءوزىۇشاردىڭ بىرەۋىنە يە بولۋ ءۇشىن ءجوندى تاماق ىشپەي̆ ارىقتاعان، ءسوي̆ءتىپ، سالماعى جيىرما توعىز كيلوگرامنان اسپاي̆ قوي̆عان، قۋ شولمەكتەي̆ اپپاز دەگەن بالا.

— ءاي̆، قۋ شولمەك! ماعان نەگە كۇلەسىڭ؟ — دەدى دە، تەكتۇرماس ەكپىندەي̆ ۇي̆تقىپ كەلە جاتقان بوي̆ى استىنداعى وزىۇشارىمەن اپپازدىڭ ماشيناسىن ءبۇي̆ىردەن كەپ سوقتى. سول-اق ەكەن، بىر-بىرىمەن سوعىلىسقان دوپ سياقتى ەكى ماشينا ەكى جاققا شورشىپ كەتتى، قيراعان جوق. رەزەڭكە قاپتاۋى مىقتى، قاي̆دان قيراسىن! سونداي̆-اق بۇل ماشينا اۋدارىلىپ-توڭكەرىلمەي̆ءدى دە. سەبەبى نەگىزگى سالماق ماشينانىڭ استىڭعى جاعىندا، ال جەڭىل اۋانىڭ كوبى رەزەڭكە قاپتاۋدىڭ ۇستىڭگى جاعىنا شوعىرلانعان. ونىڭ ۇستىنە ەرشىكتەگى بالا ءوزىن ماشيناعا ەكى يىقتان بەلدىكپەن تاڭىپ قويادى.

جالپى، باس كونسترۋكتور كىشكەنتاي̆ بالالاردىڭ تەنتەكتىگىن ەسكەرىپ، ءوزىۇشاردى اسا ۇقىپتىلىقپەن جاساعان.

— ءا، بالەم! ەندى كۇلەسىڭ بە؟ — دەپ ءماز بولدى اپپازدىڭ ماشيناسىن ءبۇي̆ىردەن سوققان تەكتۇرماس. — بۇل — مەنمىن، مەن! سەندەي̆ قۋ شولمەك ەمەسپىن.

وسىدان كەي̆ءىن ول ءوزىنىڭ ءوزىۇشارىن بالالاردىڭ ماشيناسىنا ءسۇزىستىرىپ، بىرەسە ءبۇي̆ىردەن، بىرەسە ارتىنان كەلىپ سوعىپ، الەك-شالەگىن شىعاردى.

— تەكتۇرماس، قوي̆ساڭشى-ەي̆! قيراماي̆تىن ماشينا جوق، جازىم ەتەسىڭ! ءاي̆، سەن كوپ قاعىنبا، باي̆قاۋسىزدا شەكارادان ءوتىپ كەتەرسىڭ. سوسىن ءوزىڭدى اتىپ تۇسىرەدى.

تەكتۇرماس مۇنداي̆ ءسوزدىڭ بىرىنە دە قۇلاق اسپاي̆، ءوز دەگەنىن ىستەي̆ بەردى. وسى كەزدە «زۋ-ۋ-ۋ-ۋ!..» ەتكەن دىبىس ەستىلدى.

— گالوش! گالوش!

— تەكتۇرماستىڭ اجەسىنىڭ گالوشى؟ — دەپ شۋلاستى بالالار. تەكتۇرماس اۆتومات-گالوشتان قۇتىلۋ ءۇشىن، ءوزىۇشارىن ەڭ شاپ-شاڭ جۇرىسكە قوسىپ، بەزە جونەلدى. ءسوي̆تسە، ول باي̆قاماي̆ شەكاراعا قاراي̆ ۇشقان ەكەن. انە، شەكارادان ءوتىپ تە كەتتى. سول مەزەت اجەي̆ء-دىڭ اۆتومات-گالوشى ونىڭ ماڭداي̆شاسىنا كەنەشە جابىسىپ تا ۇلگەردى. ىشىندەگى ءتۇي̆مەدەي̆ ماگنيتوفونعا جازىلعان اجەي̆ءدىڭ داۋسى ءبىر ءسوزىن ءجۇز قاي̆تالاپ، قاقساپ بارادى: «تەكتۇرماس، ءۇي̆گە قاي̆ت! تەكتۇرماس، ءۇي̆گە قاي̆ت! تەنتەكتىگىڭدى قوي̆! تەنتەكتىگىڭدى قوي̆!».

تەكتۇرماس شەكارادان ءجۇز قادامداي̆ ۇزاعاندا، ءوزىنىڭ قاتەلەسكەنىن سەزىپ، ءوزىۇشارىن بەرى قاراي̆ بۇرا بەرىپ ەدى. قاراجۇرەك ەلىندەگى تال-شىلىكتىڭ اراسىنان ۇشى تارام-تارام ءبىر جۋان تەمىر سوياۋلانىپ شىعا كەلدى دە، بىرتە-بىرتە ۇزارىپ، ءوزىۇشاردىڭ جولىن كەس-كەستەدى. ۇزىن تەمىردىڭ ۇشىنداعى تارام-تارام سىمدار قاسىنا تايانعان ماشينانى شىرماپ الدى دا، قاس قاققانشا اعاش اراسىنا ءسۇي̆رەپ اكەتتى. اۆتومات-گالوشتىڭ ءۇنى ءوشىپ، ءوزىۇشار زىم-زيا جوعالدى. ءسوي̆ءتىپ، تەكتۇرماس جاڭا ماشينانىڭ قۇپياسىن بىلۋگە قۇمارتقان قاراجۇرەك ەلىنىڭ تۇتقىنىنا اي̆نالدى.
قالعان بالالار نەمەرەسىنىڭ جاۋ قولىنا تۇسكەنىن اجەسىنە اي̆تۋعا اسىعىپ، اۋىلعا قاراي̆ سامعادى.

— اي̆تقاندارىمدى تىڭداماپ ەدى. اقىرى سازاي̆ىن تارتتى ما، بالەم! — دەدى اپپاز.

— سەن بىرەۋدى ءوي̆ءتىپ تابالاما!

— ۇپ-ۇلكەن بوپ الىپ، ۇيالساڭ ەتتى!

— شەكارا جاقىن، ءوزىڭ قولعا تۇسسەڭ قاي̆تەر ەڭ؟ — دەپ شۋ-شۋ ەتتى بالالار.

— تەكتۇرماستى جەپ قوي̆ماس، بارىنەن جامانى، قاراجۇرەك ەلى مىنا جاڭا ماشينانىڭ قۇپيا سىرىن ءبىلىپ الاتىن بولدى. اۆتومات-گالوشتىڭ ءبىر-اق داناسى جاسالعان ەدى. ودان تاعى اي̆رىلدىق. ەندى و جاق ءوزىۇشار مەن اۆتومات-گالوشتى تەز-تەز جاساپ شىعارادى دا، دۇنيە ءجۇزىنىڭ بارلىق ەلىنە ساتاتىن پاتەنتكە يە بولادى. ال ءبىزدىڭ وقىمىستى بالالار ءالى عىلىم ورداسىنا رۇقسات سۇراپ حات تا جازعان جوق. بۇل ماسەلە شەشىلگەنشە نە زامان. قاپ، عىلىمي جاڭالىقتان اي̆رىلىپ قالاتىن بولدىق-اۋ! — دەدى بەسىنشىدە وقيتىن قارا تورى قىز. ول دا تاماق ىشپەي̆ ادەي̆ءى ارىقتاپ، ءوزىۇشاردىڭ بىرەۋىنە يە بولعان ەدى. توعىزىنشى كلاستا وقيتىن اعاسى — ءوزىۇشار مەن اۆتومات-گالوشتى جاساعان بالالاردىڭ ءبىرى. قىز سونى ماقتانىش ەتەتىن.

— تەكتۇرماستىڭ اجەسىنە اۆتومات-گالوشتىڭ كەرەگى قانشا؟ — دەدى ءبىر التى جاسار بالا.

— اي̆تقانمەن، سەن تۇسىنەسىڭ بە ونى؟ — دەدى قارا تورى قىز.

— تەكتۇرماس اجەسىنىڭ ءتىلىن الماي̆، ءوزىۇشارعا ءمىنىپ كەتىپ قالا بەرگەن. ءۇي̆گە جەلكەلەپ اكەلەي̆ءىن دەسە، نەمەرەسى اسپاندا ۇشىپ ءجۇر، وعان نە ىستەي̆ الادى؟ سودان ول ءوزىۇشاردى جاساعان بالالارعا اي̆تىپتى. بالالار اۆتومات-گالوشتى جاساپ بەرە قوي̆ىپتى. اجەي̆ وڭ اياعىنا كيەتىن الگى گالوشتى شەشىپ الىپ لاقتىرسا بولدى، ول زۋىلداي̆ ۇشىپ، تەكتۇرماستىڭ ماشيناسىنا ارناي̆ى ورناتىلعان ءتۇي̆مەدەي̆ تەتىككە كەپ جابىسا كەتەدى ەكەن. سول كەزدە اجەي̆ءدىڭ گالوش ىشىندەگى ماگنيتوفونعا جازىلعان ءسوزى اسپاندى جاڭعىرىقتىرىپ سۇڭقىلداي̆ جونەلەدى. «تەكتۇرماستىڭ مۇرنىنا ماسا كەپ قوندى»، — دەپ كۇلەدى بالالار مۇنداي̆دا. اجەسىنىڭ داۋسى دامىلسىز قاقساپ مازاسىن السا، جۇرت وزىنە كۇلىپ، كەلەكە ەتسە، تەكتۇرماس قاي̆ءتۋشى ەدى؟ ءۇي̆ىنە قاي̆تۋدان باسقا امالى قالماي̆دى دا.

اۋىل ۇستىنە كەلگەن بالالار «جەر» دەگەن ءتۇي̆مەنى باستى دا، تەكتۇرماس ءۇي̆ءىنىڭ قاسىنا قاز-قاتار قونا-قونا قالىستى. ءسوي̆تسە، ءوزىۇشار مەن اۆتومات-گالوشتى جاساعان ەرەسەك بالالاردىڭ ءبىر توبى اجەي̆مەن اڭگىمەلەسىپ تۇر ەكەن. ءبارى جاي̆باراقات، جۇزدەرىندە اسىپ-ساسقان بەلگى جوق. مۇنىسى قالاي̆؟

— ءتۇسىم بە، ءوڭىم بە؟ — دەي̆ءدى اجەي̆ كۇلىمدەپ. — اراعا ەلشى جۇرمەي̆، مەكتەپ مۇناراسىندا وتىرىپ، قولعا تۇسكەن ماشينا مەن بالانى قالاي̆ قاي̆تاراسىڭدار؟ تۇسىنسەم بۇي̆ىرماسىن!

— اي̆تتىق قوي̆، ءوزىۇشاردا باقىلاۋ مۇناراسىنىڭ بۇي̆رىعىن ورىنداي̆تىن، تەك ءبىز عانا بىلەتىن تەتىكتەر بار دەپ. ءقازىر باس كونسترۋكتورىمىزدىڭ ءوزى باقىلاپ وتىر. ءساتتى كەزىندە ول بۇي̆رىقتى بەرىپ كەپ جىبەرەدى دە، نەمەرەڭىز ماشيناسىمەن بەرى قاراي̆ زاۋلاي̆دى. ون مينۋتقا شىداي̆ تۇرىڭىز، — دەدى اق سۇر ءجۇزدى ءبىر جىگىت.

— مەي̆ءلى عوي̆. تۇسىنەي̆ءىن، تۇسىنبەي̆ءىن، ونداي̆ ونەرلەرىڭ بولسا، قۇبا-قۇپ. قاراجۇرەك ەلىنەن بالام امان كەلسە بولدى دا، ءاي̆تەۋىر.

— ءبىز تاجىريبەمىزدى اياقتادىق، — دەدى جىگىت اجەي̆گە بارلاي̆، كۇلىمسىرەي̆ قاراپ. بۇگىن-ەرتەڭ ءوزىۇشاردى كوپتەپ جاساپ شىعارۋعا رۇقسات سۇراپ، عىلىم ورداسىنا حات جازامىز، پاتەنت الامىز. مىنا ۇساق بالالار سول باياعىسىنداي̆ ماشينالارىنا ءمىنىپ، اسپاندا سامعاپ جۇرە بەرەدى. ال... ال...

مۇنى ەستىگەن كىشكەنتاي̆لار «ۋر-ر-را، ۋر-ر-را!» دەپ اي̆عاي̆ سالىپ، قولدى-اياققا تۇرماي̆ سەكىرىپ، ماز-مەي̆رام بولىستى.

— ال... ال قالاي̆ اي̆تسام ەكەن؟ — دەپ اجەي̆گە سىناي̆ قارادى الگى جىگىت. — تەكتۇرماستىڭ ءتىلازار ەكەنى بەلگىلى. سوعان وراي̆ سىزگە ەلدەن الابوتەن اۆتومات-گالوش تا جاساپ بەردىك. سوندا دا... مىنە، كورمەي̆ءسىز بە؟ ءبىزدى قوي̆شى، بىزدىكى تاجىريبە عوي̆. شەكارادان وتكەنىن كورە تۇرا ادەي̆ءى بوگەمەدىك، قۇتقارىپ الاتىنىمىزعا سەندىك. ەڭ جامانى، ءسىزدىڭ زارەڭىزدى ۇشىرىپ... تەكتۇرماستىڭ ءوزى-ۇشارىن الىپ، باسقا بالاعا بەرەتىن شىعارمىز. سوندا مازاڭىز كەتپەي̆ءدى، سىزگە تىنىشىراق بولادى. وسىعان نە اي̆تاسىز؟..

— و نەسى-اي̆؟ مەنىڭ بالام كىمنەن كەم؟ ەشكىمنىڭ باسىن جارىپ، كوزىن شىعارعان جوق. وسى كۇنگىنىڭ بالاسى كوزىن اشا سالا اسپانعا قاراپ، جۇلدىزدارعا تالپىنىپ، جۇلىنىپ تۇرادى ەمەس پە؟! ەندەشە، مەنىڭ بالامدى قاناتىنان قاي̆رىلسىن، قۇربىسىنان اي̆رىلسىن دەي̆سىڭدەر مە؟ و نەسى-اي̆؟!

اق سۇر ءجۇزدى جىگىت اجەي̆ءدىڭ رەنجىگەنىن كورىپ ەزۋ تارتتى.

— وي̆پىرىم-اي̆، رەنجىمەڭىزشى، اجە.

اجەي̆ ونىڭ ءوزىن سىناپ تۇرعانىن اڭعاردى دا، جادىراپ:

— شىراعىم-اي̆، بالانىڭ ءبارى تەك تۇرماس قوي̆. وزدەرىڭ دە تەك تۇرساڭدار، مىناداي̆ ءوزى عاجاپ ماشينا جاسار ما ەدىڭدەر، اسپاندا سامعاپ جۇرگەن بالانى شاقىراتىن گالوش جاسار ما ەدىڭدەر. تەك تۇرسا، سۋ دا بورسيدى، لاي̆لانادى. جاتقان تاستى مۇك پەن قىنا باسادى. ەندەشە، مەنىڭ تەكتۇرماسىمدى جازعىرىپ قاي̆تەسىڭدەر؟ قاتار قۇربىلارىنان قالماسىن.

— دۇرىس. ءبىزدىڭ وي̆لاپ تاپقان ماشينامىزدىڭ پاي̆دالى ەكەنىن موي̆ىندادىڭىز عوي̆. بىزگە كەرەگى دە وسى ەدى، — دەدى اق سۇر ءجۇزدى جىگىت.

— ۇشادى نەمەرەڭىز، ۇشادى. انە، كەلە جاتىر! شەكاراداعى بولات دىڭگەكتەن بەرى استى. باقىلاۋ مۇناراسىنداعى بالالار ونى وپ-وڭاي̆ قۇتقارىپ الادى دەگەن جوق پا ەدىم جاڭا.

ءوزىۇشاردى جاساعان ەرەسەك بالالار دا، كىشكەنتاي̆لار دا، اجەي̆ دە اسپانعا قارادى.

مىنە، تەكتۇرماس اۋىلعا تاياپ قالدى. ءوزى كوڭىلدى-اق. ءان شىرقاپ كەلە جاتىر:

استىمدا ءوزىۇشار-ماشينا، بارامىن جۇلدىزدار قاسىنا!.

---