InfoHub Logo

پاۆلودار وبلىسىندا 144 ملن تەڭگە بيۋدجەت قاراجاتى جىمقىرىلدى

پاۆلودار وبلىسىندا «قۋاتتى وڭىرلەر – ەل دامۋىنىڭ درايۆەرى» باعدارلاماسى اياسىندا قونىس اۋدارۋشىلارعا بولىنگەن 144 ملن تەڭگە بيۋدجەت قاراجاتى تالان-تاراجعا تۇسكەنى انىقتالدى. بۇل ىسكە «ۋسپەن اۋدانى كارەرلىك ورتالىعى» فيليالىنىڭ قىزمەتكەرلەرى قاتىسقان.

تەرگەۋ دەرەكتەرىنە سۇيەنسەك، مەملەكەتتىك باعدارلاما بويىنشا قونىس اۋدارۋشىلارعا تۇرعىن ءۇي ساتىپ الۋ ءۇشىن ونىڭ قۇنىنىڭ جارتىسى كولەمىندە وتەماقى تولەنۋى ءتيىس بولعان. بۇل سوما 4 ملن تەڭگەدەن اسپاۋى كەرەك. الايدا ايىپتالۋشىلار ءۇي يەلەرىنە تومەن باعادا (4 ملن تگ) ءۇي ساتىپ الۋدى تالاپ ەتىپ، ال قۇجات جۇزىندە جوعارى باعانى (8 ملن تگ) كورسەتكەن. ەكى باعانىڭ ايىرماسىنا تەڭ قاراجات فيليال قىزمەتكەرلەرىنىڭ قالتاسىنا تۇسكەن.

الاياقتىق سحەمانىڭ ناتيجەسىندە مەملەكەتكە 144 ميلليون تەڭگە كولەمىندە زالال كەلگەنى انىقتالدى.

سوت ۇكىمىمەن ەكى ادام كىنالى دەپ تانىلىپ، بىرەۋى 5 جىلعا باس بوستاندىعىنان ايىرىلدى، ەكىنشىسىنىڭ 3 جىلعا باس بوستاندىعى شەكتەلدى. ۇكىم زاڭدى كۇشىنە ءالى ەنگەن جوق.