InfoHub Logo

ءبىر مالشىنىڭ ۇيىنە ءۇش جولاۋشى قونىپتى. جولاۋشىلاردىڭ بىرەۋى «پىسىق» اتانعىسى كەلىپ جۇرەتىن جاس جىگىت ەكەن. ونىڭ كەمپىر-شالدىڭ بويجەتكەن قىزىنا كوزى ءتۇسىپ قالادى. كىرىپ-شىعىپ ءجۇرىپ قىزبەن تانىسىپ، باسىنىڭ بوس ەكەنىن ۇعىسادى دا، ماقساتىن بىلدىرەدى. جىگىتتىڭ داربازالىعىن سەزگەن سۇڭعىلا قىز ونى ەسەك دامەلى قىپ قويادى.

قوناقتارعا تاباق تارتىلىپ، سورپا قۇيىلعان كەزدە قىز مايىن قالعىپ وتىرىپ ءبىر شارا سورپانى جىگىتكە ۇسىنادى. مۇنى وزىنشە جورىعان جىگىت ەل جاتىپ كوزى ۇيقىعا كەتتى-اۋ دەگەن كەزدە بوزبالالىق ىستەگىسى كەلىپ قىزعا بارا جاتىپ، جولعا قۇرىلعان ەلەگەنگە سوعىلىپ داڭعىر ەتكىزىپتى دە شەگىنىپ، توسەگىنە جاتا قالىپتى. «ءىم، بالەم، قاقپانعا ءتۇستىڭ عوي» دەپ مىرس ەتكەن قىز باسىن جۇلىپ الىپ:

— شىق، ەي، مىنا يتكە جاتاردا مايلى سورپانى قۇيىپ-اق ەدىم، قاناعات قىلماعان ەكەن، — دەپ تالكەك ەتىپتى.

تاڭەرتەڭ ەرتە قىز تۇيە ساۋۋعا شىققاندا، تۇندەگى قورلىعىنا شىداماعان جىگىت ونىمەن قايتا ءبىر سويلەسپەككە ىلەسە شىعادى. قىز جىگىتتىڭ سويلەۋىنە وراي بەرمەي، قولىنا تۇيە ساۋاتىن مەسكەيدى بەرىپ، ءبىر اتاندى تۇرعىزىپ:

— ار جاق ەمشەگىنەن تەزىرەك ساۋىپ جىبەرىڭىز، ءيىسىنىپ كەتپەسىن، — دەيدى. تىلدەسۋدىڭ ورايى وسى دەپ بىلگەن جىگىت جۇگىرە باسىپ، ساۋۋعا قولىن اپارا بەرگەندە، اتان تەۋىپ قالىپ مەسكەي-پەسكەيىمەن اناداي جەرگە ۇشىرىپ تۇسىرەدى. ۇيدەگىلەر جاپىرىلا سىرتقا شىعىپ، جىعىلىپ جاتقان جىگىتتى كورىپ:

— نە بولدى؟ — دەگەندە، قىز:

— انا كىسى ءوزى قارا اتاندى ساۋامىن دەپ بارىپ... — دەپتى.

---