InfoHub Logo

ءبىر اڭشى ءمىنىپ جۇرگەن جەكەلىك اتىن از كۇن جايلاۋعا جىبەرىپ العىسى كەلىپ، باستىقتان كولىك سۇراپتى. بەرگىسى كەلمەگەن باستىق ماس بولعانسىپ، تىڭداماي كەتەدى ەكەن. ەكىنشى جولى دا ءسويتىپتى. مۇنى قۇتىلۋدىڭ جاقسى امالى دەپ بىلگەن ول ەندىگى جەردە اڭشىنى كورسە بولدى، ماس بولا قالادى ەكەن.

ارادا كوپ وتپەي باستىقتىڭ اكەسى ناۋقاستانىپ، ەل ىشىندەگى ەمسەكتەر بۇعىنىڭ قانى مەن ايۋدىڭ تابانى ەم بولاتىندىعىن ايتىپتى. مۇنى ەستىگەن اڭشى:

— اقساقالداردىڭ كوڭىلىن سۇراۋعا قولىم تيمەي ءجۇر ەدى، مەن دە بارايىن، — دەپ باستىقپەن ىلەسە شىعىپتى. ۇيدەن ۇزاي بەرە ماس بولىپ، باستىقتىڭ ۇيىنە تايا بەرە بەۋ دالاعا شابا جونەلىپتى.

— نە بولدى ساعان؟ — دەسە، ماندىتىپ جاۋاپ بەرمەي ءبىردىڭ اياعىن، ءبىردىڭ باسىن سويلەپ مىسىن قۇرتىپتى. ءسويتىپ، ابدەن سىلەسىن قاتىرىپ ءولدىم-تالدىم دەگەندە ۇيگە ءوزى كەپ ءتۇسىپ، ءبىر مىزعىپ الىپ تۇرەگەلگەن سوڭ بارىپ ءۇي ىشىندەگىلەردى جاڭا كورگەندەي قايتا امانداسىپ، ناۋقاستىڭ ءحالىن سۇراپ، دارىلىك زاتتارىن بەرىپتى. سوندا شالعا:

— قۇداۋاندا، «سىنىقتان وزگەنىڭ ءبارى جۇعادى» دەگەنى راس ەكەن، ۇيدەن شىققاندا ساپ-ساۋ ەدىم، جۇرە كەلە مىنا بالاڭىزدىڭ شالىعى ماعان جۇققانى، ماستىقتان ەندى ەسىمدە جيناپ وتىرمىن، — دەپتى. جەڭىلگەن باستىق اڭشىنى مال سويىپ قوناق قىپ، ءبىر اتقا قاعاز جازىپ بەرىپ، اتتاندىرىپتى.

 

---