پروفەسسورلار مەن وقىتۋشىلاردىڭ جالاقىسى قانشاعا ارتتى – ءبىلىم مينيسترلىگى
ق ر ءبىلىم جانە عىلىم ۆيسە-مينيسترى ميراس داۋلەنوۆ مينيسترلىككە قاراستى جوعارى وقۋ ورىندارىندا پروفەسسور-وقىتۋشىلار قۇرامىنىڭ جالاقىسى قانشاعا ارتقانىن ايتىپ بەردى.
«ءمينيستردىڭ تاپسىرماسىمەن ق ر ءبىلىم جانە عىلىم مينيسترلىگىنە ۆەدومستۆولىق باعىنىشتى جوو پروفەسسورلارىنىڭ، دوسەنتتەرىنىڭ جانە وقىتۋشىلارىنىڭ جالاقىسىن ارتتىرۋ بويىنشا ۇلكەن جۇمىس جۇرگىزىلدى. ءقازىر جوعارى وقۋ ورىندارىنىڭ اكادەميالىق دەربەستىككە يە ەكەنىن جاقسى تۇسىنەمىز. سونىمەن بىرگە، ءبىلىم مينيسترلىگى اتالعان جوو-لاردىڭ جالعىز اكسيونەرى رەتىندە ولاردىڭ قارجىلىق ساياساتىنىڭ باعىتتارىن انىقتاي الادى. سوندىقتان دا جالاقىنى كوتەرۋ تۋرالى ماسەلە قويىلىپ وتىر. 2019 جىلى ۇلتتىق جوعارى وقۋ ورىندارىندا دا، مەملەكەتتىك جوعارى وقۋ ورىندارىندا دا جالاقى وسكەن. ال 2020 جىلى مەملەكەت باسشىسىنىڭ تاپسىرماسىمەن مەملەكەتتىك تاپسىرىس قۇنىنىڭ وسۋىنە بايلانىستى پروفەسسور-وقىتۋشىلار قۇرامىنىڭ جالاقىسى ءوستى»، – دەدى ميراس داۋلەنوۆ مينيسترلىك اپپاراتىنىڭ جينالىسىندا.
پروفەسسورلار بويىنشا ۇلتتىق جوعارى وقۋ ورىندارىندا جالاقى 29%-عا، مەملەكەتتىك جوعارى وقۋ ورىندارىندا – 19%-عا ءوستى. دوسەنتتەر بويىنشا ۇلتتىق جوو-لاردا جالاقى 31%-عا، مەملەكەتتىك جوو-لاردا – 11%-عا ارتتى. عىلىمي دارەجەسى جوق وقىتۋشىلار بويىنشا – ۇلتتىق جوو-لاردا 32%-عا جانە مەملەكەتتىك جوو-لاردا 18%-عا وسكەن.
ونىڭ ايتۋىنشا، ەكى جىل ىشىندەگى جالاقى كولەمى ق ر ءبىلىم جانە عىلىم مينيسترلىگىنە قاراستى جوو-لاردا پروفەسسور-وقىتۋشىلار قۇرامىنىڭ ەڭبەكاقىسىنىڭ ايتارلىقتاي وسكەنىن كورسەتەدى. بۇل جۇمىس ءارى قاراي دا جالعاسادى.
«ءبىز وقىتۋشىلاردىڭ حالىقارالىق دامۋىنا بىرتىندەپ كوشۋىمىز كەرەك جانە ولاردىڭ عىلىمي زەرتتەۋلەر جۇرگىزۋ قاجەتتىگىن ەسكەرۋىمىز كەرەك. بۇل جوو-لارداعى عىلىمدى دامىتۋ ءۇشىن وتە ماڭىزدى. ەكىنشى ماڭىزدى ماسەلە – بۇگىن تانىستىرىلىپ وتىرعان جالاقى مولشەرى. ولاردىڭ ناقتى ءوسۋى بۇگىندە سول پروفەسسوردىڭ، دوسەنتتىڭ نەمەسە وقىتۋشىنىڭ تولىق ستاۆكاسىنا بايلانىستى بولادى. سونىمەن بىرگە، پروفەسسور، وقىتۋشى جانە دوسەنت ستاۆكاسىنىڭ مولشەرى جوو-عا بايلانىستى وزگەرۋى مۇمكىن ەكەنىنە نازار اۋدارعىم كەلدى. وسىعان بايلانىستى ءبىزدىڭ جوو-لاردا ءبىرىڭعاي تاسىلدەر ازىرلەۋ قاجەت. تاجىريبەلى مامانداردى ىنتالاندىرۋ ءۇشىن وقىتۋشىلار جالاقىسىن ەش دارەجەسىز كوتەرۋ كەرەك جانە دارەجەسى بار نەمەسە جوق ماماندار اراسىنداعى الشاقتىقتى ازايتۋ قاجەت»، – دەدى ۆيسە-مينيستر.
You Might Also Like
-
قازاقستاندا سوڭعى جىلدارى پەداگوگيكالىق، اقپاراتتىق تەحنولوگيالار، شەتەل ءتىلى، قۇقىق سالالارى بويىنشا ءبىلىم بەرۋ باعدارلامالارىنا سۇرانىس وتە جوعارى بولىپ تۇر.
-
ۇلكەن ادەبي تالقىلاۋ ۇيىمداستىرىلدى. ءار ءتۇرلى جانرلار بويىنشا وتكەن بۇل تالقىلاۋ-ايتىسقا ادام وتە كوپ جينالدى، جيىلىس زالىندا ينە شانشار جەر قالمادى. الدىمەن تاريحي تاقىرىپقا جازىلعان شىعارما تالقى...
