InfoHub Logo

قان قىسىمىنىڭ جوعارىلاۋى تۋرالى ءجيى ءسوز قوزعالعانىمەن، ونىڭ تومەندەۋى جونىندە از ايتىلادى. ويتكەنى قان قىسىمىنىڭ تومەندەۋى ەداۋىر سيرەكتەۋ كەزدەسەدى. دەگەنمەن بۇل دەرتتى دە نازاردان تىس قالدىرۋعا بولمايدى. قان قىسىمىنىڭ تومەندەۋىن مەديسينادا «گيپوتونيا» دەپ اتايدى. ەگەر ايەل ادامنىڭ قان قىسىمى قالىپتى نورما - 95/60-تان، ال ەر ادامداردا 100/95-تەن تومەندەسە، بۇل گيپوتونيا بولىپ ەسەپتەلەدى. قان قىسىمىنىڭ تومەندەۋ بەلگىلەرى بىرتىندەپ دامۋى دا، اياقاستى ۇستاما تۇرىندە ءبىلىنۋى دە مۇمكىن. وسىعان سايكەس مەديسينادا «ءجىتى ارتەريالىق گيپوتونيا» جانە «سوزىلمالى گيپوتونيا» بار. بۇل اۋرۋدىڭ قاۋىپتىلىگى مىنادا: ول باس ميىنىڭ قانمەن جەتكىلىكتى مولشەردە قامتاماسىز ەتىلمەۋىنە جانە وسىنىڭ سالدارىنان مي مەن ىشكى اعزالارعا وتتەگىنىڭ جەتىسپەۋشىلىگىنە سوقتىرادى. سوندىقتان بۇل سىرقات دەر كەزىندە ەمدەۋدى تالاپ ەتەدى. گيپوتونيا ەر ادامداردان گورى ايەلدەردە باسىم. ولاردىڭ 80 پايىزى - بىرىنشىلىك نەمەسە نەيروسيركۋلياتورلىق گيپوتونيا.

ونىڭ بەلگىلەرى: باستىڭ اۋىرلاۋى، تەز شارشاعىشتىق، باستىڭ اينالۋى. كەيدە كوڭىل-كۇيدىڭ تومەندىگى، اشۋشاڭدىك بايقالادى. سىرقات ادام ۇمىتشاق، بىردەڭەگە دەن قويۋدا قينالادى، ال اۋىر جاعدايلاردا تالىپ قالۋى مۇمكىن.

سەبەپتەرى

بۇل سىرقاتتىڭ سەبەپتەرى ءار ءتۇرلى. ولاردىڭ قاتارىندا ۆەگەتو-تامىر ديستونياسى، جۇرەك-قان تامىر جۇيەسىنىڭ سىرقاتتارى، اسقازان-ىشەك جولى اۋرۋلارى بار. سونداي-اق ىقتيمال سەبەپتەرىنە جۇرەك شاماسىزدىعىن، اتەروسكلەروزدى، اۆيمامينوزدى، ءتۇرلى ۋىتتانۋلاردى، سىرتقى وزگەرىستەرگە ورگانيزمنىڭ قورعانىش اسەرىن، اللەرگيالىق رەاكسيالاردى، دەنساۋلىقتاعى باسقا دا اقاۋلاردى جاتقىزۋعا بولادى. گيپوتونيا  قانداي دا ءبىر اۋرۋدىڭ قوسا-قاباتتاسقان بەلگىسى بولۋى مۇمكىن. بۇل جاعدايدا نەگىزگى سىرقاتتى ەمدەگەن سوڭ، گيپوتونيا دەپ اتالادى. ال نەيروسيركۋلياتورلىق گيپوتونيا سترەستەر، پسيحولوگيالىق اۋىرتپالىقتار، اقىل-ويدىڭ شارشاۋى، جۇيكەگە سالماق تۇسىرەتىن باسقا دا جاعىمسىز كۇبىلىستارمەن قاتار بايقالادى. بۇل جاعدايدا ول بىرىنشىلىك گيپوتونيا دەپ اتالادى.

ەمى

قۇرامىندا كوفەينى بار جالپى ىنتالاندىراتىن دارى-دارمەكتەر قولدانىلادى. سونىمەن قاتار كوپتەگەن دارىلىك وسىمدىكتەر دە جاقسى كومەكتەسەدى. مىسالى، ادامتامىر تۇندىرماسى. الايدا قانداي ءدارىنى بولماسىن، دارىگەرمەن كەڭەسە وتىرىپ قابىلداعان ءجون. ويتكەنى ءار ادامنىڭ اعزاسى، اۋرۋدىڭ تۋىنداۋ سەبەبى ءار ءتۇرلى، سوندىقتان ءبىر ءدارى اركىمگە ءارقالاي اسەر ەتۋى مۇمكىن. قان قىسىمىنىڭ تومەندەۋى ونىڭ جوعارىلاۋىمەن سالىستىرعاندا كوبىنە اۋىر زارداپتارعا الىپ كەلمەيدى. سوندىقتان ونى ەمدەيتىن دارىلەر دە كوپ ەمەس. گيپوتونياعا شالدىققان ادام وز-وزىنە كومەكتەسە ءبىلۋى ءلازىم. ياعني دەنەسىن ۇنەمى شيراتىپ، شىنىقتىرۋى كەرەك. جۇيەلى تۇردە جانە ءجيى قيمىلداعان ءجون. الايدا تامىرلارعا ارتىق سالماق تۇسىرۋگە بولمايدى. اسىرەسە جاياۋ ءجۇرۋ، ءجۇزۋ، ءتۇرلى ويىندار پايدالى. بۇل سىرقاتتارعا ىستىق جانە سالقىن سۋدى كەزەكتەستىرە سەبىلگە ءتۇسۋ، باسسەين، مونشا، ساۋنا، دەنەنى سىلاپ-سيپاۋ پايدالى. ءبىراق تەمپەراتۋرا كۇرت وزگەرگەندە ابايلاۋ كەرەك، الدىمەن دەنەنى ۇيرەتىپ العان ءجون. دەنى ساۋ ادامدارمەن سالىستىرعاندا قان قىسىمى تومەن ادامدارعا ۇيقىعا كوپ ۋاقىت ءبولۋ كەرەك - كەمىندە 10-12 ساعات ءۇزىلىسسىز ۇيىقتاۋ. كەيبىرەۋلەر گيپوتونيكتەردى ماۋباس، جالقاۋ دەپ ويلايدى. بۇل دۇرىس ەمەس. ۇزاق ۇيقى - ورگانيزمنىڭ قورعانىش رەاكسياسى، ول سىرقات ادامنىڭ ءوزىن جاقسى سەزىنۋى ءۇشىن اسا قاجەت.  قان قىسىمى تومەن ادامدارعا قويۋ شاي، كوفەنى قالاۋىنشا ىشۋگە بولادى. ءبىراق تۇزدى شەكتەگەن ءجون. باسى اينالىپ، قۇلاپ قالماۋ ءۇشىن تاڭەرتەڭ توسەكتەن شاپشاڭ تۇرىپ كەتۋگە بولمايدى. الدىمەن توسەكتە جاتىپ قيمىلداپ، قول-اياقتى شيراتىپ الىڭىز. ادەتتە گيپوتونيا ادامنىڭ قالىپتى ومىرىنە اسا كوپ زاردابىن تيگىزبەيدى، ءبىراق سىرقاتتىڭ جاعدايى ناشارلايتىن بولسا، مىندەتتى تۇردە دارىگەرگە كورىنىپ ارنايى ەم الۋى شارت.

ي. نۋسيپبايەۆا، دارىگەر تەراپيەۆت.

---