(ي. ا. كرىلوۆتان)

بوقتىقتا تالتاڭداپ،
جان-جاققا جالتاڭداپ،
ءبىر قارعا ءجۇر ەدى.
ءبىر جاتقان ىرىمشىك
كوزىنە تۇسەدى،
كوڭىلى وسەدى.
ىرىمشىكتى كورىنگەن
تىستەپ اپ ۇشادى.
ءبىر اعاشقا قوندى دا،
اسىقپاي جەمەك بولدى دا،
مازاتسىپ قارادى
وڭىنا، سولىنا.
اعاشقا قونىپ، قارانىپ،
قاناتىن، ءجۇنىن تارانىپ،
بولماقشى ەدى ءماز-مايرام
دەيتىن ەمەس قۋ قايدان،
جەم ىزدەگەن ءبىر تۇلكى
كەزدەي كەلدى سورىنا.
اعاشتان تومەن تۇسپەگەن،
ىرىمشىكتى تىستەگەن
قارعا ءتۇستى كوزىنە.
قۋ قۇمار اقىماققا
الداپ، ارباپ سوقپاققا
كەڭەسەدى وزىنە.
جۋاسىپ، جابىرقاپ،
تاڭ قالىپ، تاڭىرقاپ،
قارادى جۇزىنە.
قاراشى زالىمنىڭ،
بۇل جۇرتقا ءمالىمنىڭ
الداعان سوزىنە:
ەسەن-ساۋ ءجۇرسىز بە؟
اقىننىڭ تورەسى؟
كوپ جەردەن بەلگىلى
تەگىن قۇس ەمەسى.
ءجۇنىڭىز، ءۇنىڭىز،
مۇرنىڭىز، كوزىڭىز،
قۇلاققا كوپ تيگەن
ماقتالعان كەڭەسى.
باسىنان وزگەشە
ءبىتىپتى دەنەسى.
كوپ جەردەن، قالقام-اي،
قۇمارىم تارقاماي،
ءسىزدى ىزدەپ كەلىپ ەم.
ءسۇيىنسىن قۇلاعىم،
تارقاسىن قۇمارىم،
انىڭە ءبىر سالشى،
اسىق بوپ كەلىپ ەم.
ماقتاۋعا ەسىرىپ،
بارىنشا كوسىلىپ،
ىرعالىپ قارق ەتتى،
ىرىمشىك جەرگە سالپ ەتتى.
تاپ ەتتى، شاپ ەتتى،
اپ كەتتى قۋ تۇلكى.
انتۇرعان، سول تۇرعان
جەرىڭدە بول كۇلكى.

---