InfoHub Logo

"سوقىرتەكە" ويىنىندا ءبىرىنىڭ كوزىن ءبىرى تاڭىپ، ءبىرىن-بىرى قۋىپ وينايدى عوي. الايدا، ءبىزدىڭ قالالىق ەلەكتر ستانسيامىز كەيدە كۇن ارا، كەيدە كۇن سايىن وسى "ويىندى" كوزدى تاڭباي-اق باقىرايتىپ قويىپ وينايتىندى شىعاردى.

بۇلاردىڭ بۇل "ويىندى" باستاۋىنىڭ ءوزى قىزىق. كەيدە الدىڭا اس الا بەرگەندە، كەيدە قولىڭا كىتاپ ۇستاعاندا - اق "ويناي" سالادى. كۇتپەگەن جەردەن "سوقىرتەكە" ويىنىن باستاپ جىبەرىپ، ەلەكتر ستانسياسىنداعى:

"سوقىرتەكە"، سوق - سوق،
قاراڭعىدا كوزىم جوق،
ءتيىپ كەتسە ءسوزىم جوق!
شەكەلەرگە شەكەلەر،
كەسەلەرگە كەسەلەر،
شاقىر-شۇقىر سوق - سوق!" —
دەپ تۇرعانداي بولادى.

اسىرەسە، بۇل سياقتى "سوقىرتەكە" ويىندارى كلۋبتاردا، جينالىستار ۇستىندە ءجيى-جيى بولىپ تۇراتىندى شىعاردى. ءتىپتى ەلەكتر ستانسياسىنداعى ءبىر ايدىڭ ۇشتەن ءبىرىن عانا جارىقپەن الداۋسىراتىپ، قالعان ۋاقىتىن "سوقىرتەكەمەن" شىعارىپ سالۋدى ادەتكە اينالدىردى.

كەيدە ەلەكتر ستانسياسى لامپوچكالاردىڭ ىشىنە يرەك-يرەك "قىزىل ينەلەر" سالىپ قويىپ، كەيدە سونۋگە اينالعان شوقتىڭ بولماشى ساۋلەسى سەكىلدى جىلتىراقپەن ءىلىندىرىپ قوياتىندى دا تاۋىپ الدى. بۇل سياقتى "قىزىل ينەلەر" مەن، "شوق ساۋلەسى" تۇرعاندا "جانبادى" دەپ ايتىپ كور... تۇك تە دالەل جوق سياقتى. سوندىقتان دا ۇيرەنگەن ءۇيىڭنىڭ ەسىگى مەن ءتورىن سيپالاپ تاۋىپ، تۇرتكىلەپ جۇرەتىن بولىپ الاسىڭ.

"سوقىرتەكەنىڭ" كەسىرىنەن ىسكەن شەكەلەر، سىنعان بۇيىمدار، توقىلماي قالعان ورنەكتەر، توقتاپ قالعان ەڭبەكتەر، تۇرىپ قالعان ءوندىرىس ورىندارى، ولاردان كەلگەن ءجۇز مىڭداعان سومدىق زياندار ەسەپ ەمەس. تەك ايدىڭ باسىندا ءبىر رەت، ورتاسى مەن اياعىندا ءبىر رەت جىلتىراسا بولدى، ولار "ويىنىڭ ويناپ" وتىرا بەرەتىن بولىپ الدى.

— بۇلارىڭ قالاي؟ — دەگەندەرگە:

— جانىپ كەتتى، تايىپ كەتتى، سىم ءۇزىلدى، موتورى بۇزىلدى، مىرت بولدى، شىرت بولدى... — دەگەن دالەلدەردى قارداي بوراتادى دا، ىسكەن شەكەنىڭ، توقتاعان ساباقتىڭ، سۇرىنگەن اياقتىڭ "قىزىعىنا" قاراپ، "تاماشاسىنا" باتىپ وتىرعانى.

باسقاسىن قويىپ، ءبىر-اق فاكتىگە توقتايىق. وسى وتكەن تۇندە قالالىق مادەنيەت ۇيىندە سەلو كوركەمونەرشىلەرىنىڭ وبلىستىق بايقاۋىنا جينالعانداردىڭ قورىتىندى كونسەرتى بولىپ جاتتى. ەلەكتر ستانسياسىنداعى وسى كونسەرتتىڭ ۇستىندە دە "سوقىرتەكەسىن" ۇمىتپادى، جارقىراپ تۇرعان جارىقتى لىپ ەتكىزدى دە، سوندىرە سالدى. سالىپ تۇرعان ءان دە، تارتىلعان گارمون دا توقتادى، قاپەلىمدە "سوقىرتەكە" باستالدى.

اسىرەسە، وسىنداي "ويىندى" جانى سۇيەتىن تەنتەكتەر قابىلداي ءتۇستى. بىرەۋى ىسقىرىپ، بىرەۋى قىشقىرىپ، بىرەۋى تۇمسىعىن سوقتىرىپ الىپ، پىسقىرىپ جاتىر... قانشا كورگەن تاماشا، قىزىق پەن ساۋىقتىڭ ارتى ايقاي-شۋ، تارتىپسىزدىككە اينالدى دا كەتتى.

وسىنداي بولارىن الدىن الا ەسكەرمەگەن كلۋبتىڭ جايباراقات باستىقتارى "سوقىرتەكە، سوق - سوقتىڭ" ورتاسىندا سەڭدەي قاعىستى. ولاي جۇگىردى، بىلاي جۇگىردى، ەڭ ارعىسى كەروسيندى جىلتىراق تا تابىلمادى. جىلت ەتكەن شىرپىنىڭ جارىعىنا جالت ەتكەن كوزدەر جابىلا تالاستى. اقىرىندا قىزۋ باستالعان كوڭىلدى كونسەرت، سوقتىعىسۋ - قاقتىعىسۋمەن، ەسىككە تالاسقانداردىڭ ايقايىمەن تارادى.

"سوقىرتەكە" تەك وسى كونسەرتتىڭ اينالاسىندا بولسا دا وقاسى بولماس ەدى، جوق، ولاي ەمەس، قالانىڭ بارلىق وقۋ ورىندارىندا، مىڭداعان وقۋشىلاردىڭ جاتاقحانالارىندا، باسپاحانالاردا، ءوندىرىس ورىندارىندا دا بولىپ جاتىر.

زىرىلداعان ستانوكتاردىڭ توقتاۋى، اشىلعان كىتاپتاردىڭ جابىلۋىن، ءجۇرىپ تۇرعان ماشينالاردىڭ كىلت توقتاۋى، كوشەلەردىڭ قاراڭعىلانۋى — وسىنىڭ ءبارى زيان. ءبىراق وسى زياندى ەسەپتەپ، وعان سانالىلىقپەن قاراپ وتىرعان ەلەكتر ستانسياسىنىڭ قىزمەتكەرلەرى جوق. ولاي دەيتىنىمىز قولداعى بار مۇمكىندىكتى تولىق پايداعا اسىرا الماي، كوپتىڭ وسكەلەڭ تىلەگىنە ساي قىزمەت ەتە الماي، ەڭكەيگەن كارى، ەڭبەكتەگەن بالاعا دەيىن "سوقىرتەكە" ويناتۋمەن وتىر. بىزدىڭشە مۇنان بىلاي:

سوقىرتەكە بولماسىن،
اياق-تاباق سىنباسىن.
شەكەلەر مەن شەكەلەر
بىر-بىرىنە ۇرماسىن.
"قاراڭعىدا كوزىم جوق،
ءتيىپ كەتسە ءسوزىم جوق "، —
بولىپ ەشكىم تۇرماسىن!

بۇل بولاتىن، ءارى ورىندى تىلەك. وعان سەنىم مول. ق. قالاسىنىڭ باسشىلارى وسىنى دا ويلاسىن.

---