قازاقستاننىڭ جوو-دا ۆيرۋسولوگ ماماندار دايارلانادى
ءال-فارابي اتىنداعى قازاق ۇلتتىق ۋنيۆەرسيتەتى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىمەن (بقپعزي) بىرلەسە وتىرىپ، ۆيرۋسولوگ مامانداردى دايارلايتىن بولادى.
ۇلتتىق جوعارى وقۋ ورنىنىڭ رەكتورى ج.تۇيمەبايەۆ پەن بيولوگيالىق قاۋىپسىزدىك پروبلەمالارى عزي باس ديرەكتورى ك. زاكاريا ءتيىستى كەلىسىمگە قول قويدى. ءقازىر قازۇۋ عىلىمي-زەرتتەۋ ينستيتۋتىمەن بىرلەسىپ، ۆيرۋسولوگيا سالاسىندا جاڭا ءبىلىم بەرۋ باعدارلاماسىن ازىرلەدى.
«العاش رەت ءال-فارابي اتىنداعى قازاق ۇلتتىق ۋنيۆەرسيتەتى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىمەن بىرلەسىپ، ۆيرۋسولوگ مامانداردى دايارلايتىن بولادى. اتالعان باعىتتا بۇرىن-سوڭدى باكالاۆرياتتىڭ ۇقساس ءبىلىم بەرۋ باعدارلامالارى بويىنشا وقىعان جوعارى وقۋ ورىندارىنىڭ تۇلەكتەرى وقي الادى. ولار قازۇۋ بيولوگيا جانە بيوتەحنولوگيا فاكۋلتەتىنىڭ بازاسىندا ءارى بقپعزي BSL-2 جانە BSL-3 زەرتحانالارىندا ءبىلىم الاتىن بولادى. ۆيرۋسولوگتاردى دايارلاۋ كەزىندە ستۋدەنتتەردىڭ تەوريالىق قانا ەمەس، پراكتيكالىق ءبىلىم الۋىنا باستى نازار اۋدارىلادى. جەتەكشى ۆيرۋسولوگتار زەرتتەۋ مەن دياگنوستيكانى قالاي جۇرگىزۋ قاجەت، ۆيرۋستىڭ جاڭا تۇرلەرىن قالاي انىقتاۋ كەرەكتىگىن كورسەتىپ، ءوز تاجىريبەلەرىمەن بولىسەدى. سونداي-اق ءبىلىم الۋشىلار مولەكۋليارلىق بيولوگيا، بيوحيميا، ميكروبيولوگيا ادىستەرىن مەڭگەرەدى»، — دەدى ءبىلىم جانە عىلىم ۆيسە-مينيسترى قۋانىش ەرعالييەۆ.
پراكتيكالىق ساباقتار باسىم بولعاندىقتان، ستۋدەنتتەر بقپعزي بازاسىندا تاجىريبە جانە تاعىلىمدامادان وتەدى. ينستيتۋت عالىمدارى، سونىڭ ىشىندە كوروناۆيرۋسقا قارسى ۆاكسينا جاساعان عالىمدار ۆيرۋسولوگيا، بيولوگيا جانە بيوتەحنولوگيا سالاسىندا پراكتيكالىق ساباقتار مەن سەمينارلار وتكىزەدى. وقۋدى ۇزدىك اياقتاعان تۇلەكتەر ودان ءارى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنا جۇمىسقا ورنالاسۋى مۇمكىن.
الداعى ۋاقىتتا عىلىمي-زەرتتەۋ ينستيتۋتى بازاسىندا دوكتورلىق جۇمىستاردى قورعاۋ جونىندەگى ديسسەرتاسيالىق كەڭەس قۇرىلاتىن بولادى. عىلىمي-زەرتتەۋ جۇمىستارىن جۇرگىزۋ كەزىندە ادىستەمەلىك-كونسۋلتاسيالىق كومەك كورسەتۋ ءۇشىن شەتەلدىك عالىمداردى تارتۋ كوزدەلىپ وتىر.
بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى ماماندارىنىڭ بيولوگيالىق قاۋىپسىزدىك، بيوتەحنولوگيا، ۆيرۋسولوگيا، ميكروبيولوگيا، يممۋنولوگيا سالاسىندا مول تاجىريبەسى بار ەكەنىن اتاپ وتكەن ءجون. ينستيتۋت عالىمدارى پرەپاراتتاردىڭ 60-تان استام اتاۋىن، ونىڭ ىشىندە 30 ۆاكسينا، 16 تەست-جۇيە جانە 15-تەن استام ءتۇرلى بيوپرەپاراتتاردى ازىرلەپ، ەنگىزدى. سوڭعى 10 جىلدا ينستيتۋت اسا ءقاۋىپتى ينفەكسيالارعا قارسى ۆاكسينالاردى، ونىڭ ىشىندە وتاندىق QazVac ۆاكسيناسىن دايىنداۋ تەحنولوگياسىن جاسادى.
You Might Also Like
-
كامشات زاۆود ديرەكتورىنىڭ قابىلداۋ بولمەسىندە ۇزاق وتىردى. ىشتە ءوتىپ جاتقان جينالىس وعان ۇشى-قيىرسىز، ءتىپتى بۇگىن بىتپەيتىندەي كورىندى. جازۋ ماشينكاسىن تىنىمسىز تىقىلداتقان حاتشى قىزدىڭ كوزىن الا ب...
