InfoHub Logo

كۇز. دۋال ۇستىنەن ال قارا كوك تولقىندى تەڭىزگە كوز تىگىپ تۇرمىز. اننان-مىننان كەمە جەلكەندەرى اعاراڭدايدى. باتقان كۇننىڭ جالقىنى التىن شاپاققا بوياعان شۆەسيانىڭ بيىك جاعالاۋلارى الىستان قاراۋىتادى. ارتىمىزداعى دۋالدىڭ تىك جارىنان جىرا باستالادى، وعان قۇلاشىن كەڭ جايىپ وسەتىن تاماشا اعاشتار وتىرعىزىلعان. ونىڭ سارعايعان جاپىراقتارىن جەل كوتەرىپ، ىزىنشە جەرگە توسەپ جاتىر. دۋالدىڭ باۋرايىنداعى اعاش شارباقتى قورشاۋدىڭ ىشىندە سۇرقاي ءۇي كوزگە شالىنادى. ونىڭ سىرتىندا ساقشى ءجۇر. شارباقتىڭ ار جاعى نەتكەن قاپاس، نەتكەن قاراڭعى! الايدا، عيماراتتىڭ ءوزى، ونىڭ تەرەزەلەرى تورلانعان كامەرالارى ءتىپتى سۇمدىق قاپاس دەسە قاپاس. وندا تۇتقىندار، ەجەلگى قىلمىسكەرلەر قامالعان.

باتقان كۇننىڭ ساۋلەسى كامەرانىڭ جالاڭاش قابىرعالارىنا ءتۇسىپ تۇر. كۇننىڭ زۇلىمدى دا، ىزگىنى دە الالاماي ساۋلەسىن تۇسىرە بەرەتىنىن قايتەرسىڭ! ءجۇزى جابىعىڭقى، ىزعارلى تۇتقىن وسىناۋ تۇك جىلۋى جوق كۇن ساۋلەسىنە كەكتەنە كوز تىگىپ، قادالا قالعان. كەنەت تەرەزە تورىنا الدەبىر قۇس كەلىپ قوندى. قۇس تا زۇلىمدى دا، ىزگىنى دە الالاماي ءان سالاتىنىن قايتەرسىڭ! ونىڭ ءانى قىسقا قايىرىمدى: «شيىق-شيىق!» بار بولعانى وسى عانا! الايدا، قۇستىڭ ءوزى ءازىر ەشقايدا ۇشىپ كەتەر ەمەس. ول، مىنە، قاناتىن قومداپ، قاعىپ، قاۋىرسىندارىن تازالاپ، سىلكىنىپ ايدارىن تىكىرەيتىپ اۋرە... اياعى كىسەندەۋلى قىلمىسكەردىڭ وعان قاراعان سايىن اشۋلى ءجۇزى بىرتە-بىرتە جۇمسارىپ، قايدان، قالاي كەلگەنىنەن وزگە تۇگىل ءوزى دە بەيحابار، قايداعى ءبىر جاڭا سەزىم جانىن جايلاندىرا ءتۇستى. بۇل سەزىم كۇن ساۋلەسى مەن انا جاقتا ەركىندىكتە، كوكتەمدە مەيلىنشە مول وسەتىن فيالكانىڭ حوش يىسىنە وتە ۇقساس! ءبىراق مىناۋ شە؟ اڭشى سىرنايىنىڭ كوڭىلدى، كۇشتى داۋسى ەستىلدى. قۇس ۇشىپ كەتتى، كۇن ساۋلەسى ءسونىپ بارادى، كامەراعا قايتا قاراڭعىلىق ءتۇستى. قىلمىسكەردىڭ جۇرەگى دە تاس قاراڭعى، ءبىراق قالاي بولعاندا دا وسى جۇرەكتەن كۇن ساۋلەسى جۇگىرىپ ءوتتى عوي، ونىڭ قۇستىڭ سايراۋىنا ءۇن قوسۋى وسىنىڭ اسەرى.

اڭشى سىرنايىنىڭ عاجاپ سازى شولاق قايرىلماي، شىرقاي، اۋەندەي بەرسە ەكەن! كەشكى جۇمساق اۋا تىم-تىرىس. تەڭىز اينا سىندى قيمىلسىز جاتىر.

اۋدارعان ق. قۇرمانعالييەۆ

---