InfoHub Logo

— اتا، اتا، اناڭ قارا! قارلىعا-اش!

اتاسىنىڭ جانىندا ساياجايدا جۇرگەن الدان جەردەن جەتى قويان تاپقانداي ءماز. داۋىسىنىڭ قاتتى شىعىپ كەتكەنىن دە بايقاماي قالعان. راسىندا، بۇل بيىل  جازعىتۇرىمعى كورگەن العاشقى قارلىعاشتارى ەدى.

— تىنىش، بالام، قاتتى داۋىستاما. شوشىتىپ، ۇركىتىپ الاسىڭ. كەل ودان دا قوزعالماي وتىرىپ، ولاردىڭ ارەكەتىن باقىلايىق،— دەپ ورمان قارت نەمەرەسىن قاسىنا شاقىرىپ، وزدەرى سۋعارىپ جۇرگەن تاقتانىڭ جيەگىندەگى كوكمايساعا جايعاستى.

العاشىندا الداننىڭ قاتتىراق شىققان ۇنىنەن جاسقانشاقتاپ، كەرى سەرپىلگەن قوس قارلىعاش سالدەن سوڭ قالىقتاي كەلىپ، بۇلاردىڭ الدىنداعى سۋعارىلىپ جاتقان تاقتاعا قايتا ورالدى.

— سۋ ىزدەپ جۇرگەن بولار؟ — سىبىرلاي سويلەگەن نەمەرەسى اتاسىنا سۇراۋلى كەيىپپەن قاراعان.

— تس-سس، اسىقپا، بالام. ءقازىر كورەمىز.

قالىقتاي كەلىپ تەكشەلەنگەن تاقتا ۇستىنە قونعان ولار الدىمەن تىپ-تيتتەي ءسۇيىر تۇمسىقتارىنا ءىلىپ جەردەن ءبىر-بىر تال ءشوپ قيىندىسىن الدى. ەكى-ۇش كۇن بۇرىن شابىلعان ءشوپتىڭ قۋراي باستاعان قالدىعى. تىستەگەن الگى شوپتەرىن ەندى بەتى دىمقىلدانعان توپىراققا ارى-بەرى ۇيكەپ العان قوس قارلىعاش جەردەن لىپ كوتەرىلىپ الدەقايدا اسىعا ۇشىپ كەتتى.

— سۋ ىزدەسە، باتپاقتا نەلەرى بار، اتا؟ قارلىعاش تا ءشوپ جەي مە؟— دەگەن الدان اڭ-تاڭ.

— ۇندەمە،— دەدى اتاسى ءالى دە بولسا، سىبىرلاي سويلەپ. — ولار جاقىن ماڭعا ۇيا سالعالى ءجۇر. ءقازىر تاعى ورالادى.

اتاسى ايتىپ بولعانشا زۋىلداي كەلىپ، تاقتا ۇستىنە قونعان قوس قارلىعاش تۋرا جاڭاعى ارەكەتتەرىن قايتالاي، تۇمسىقتارىنا ءبىر-بىر تال ءشوپتى ىلگەن بويدا تاعى دا ۇشا جونەلدى. وزدەرى تىم اسىعىس، جۇمىستارى قاۋىرت سەكىلدى.

— ءشوپتى قايتەدى؟ ونى نەگە باتپاققا باتىرىپ، بىلعاپ جاتىر؟

نەمەرەسىنىڭ ساۋالىنا ەرىكسىز مىرس ەتكەن اتاسى:

— قۇلىنىم-اۋ، بىلتىر اۋىلعا، ءسالىم اعايىڭنىڭ ۇيىنە بارعاندا قورا جاقتاۋىنا  سالىنعان قارلىعاشتىڭ ۇياسىن كورىپ ەدىڭ عوي، ەسىڭدە مە؟— دەدى.

— ارينە، ەسىمدە. تۇمسىقتارىن سوزا، اۋىزدارىن اشىپ، تاماق سۇراپ شيقىلداپ جاتقان بالاپاندارىن دا، ەنەلەرىنىڭ ولارعا قالاي تاماق اكەلىپ بەرەتىندەرىن دە كوردىك قوي.

— ەندەشە، مىنە، مىنا قوس قارلىعاش تا وزدەرىنە ءداپ سونداي ۇيا سالۋعا كىرىسىپ ءجۇر. جاڭاعى بالشىققا  شىلانعان شي شوپكە اتتىڭ قىلىن  نەمەسە ءجۇن-جۇرقا ارالاستىرىپ، ۇيا قابىرعاسىن قيۋلاستىرا قالاپ شىعادى. تۇپ-تۋرا كىرپىش قالاۋشى قۇرىلىسشىلارداي.

— بۇلاردىڭ بۇرىنعى ۇيلەرى قايدا مىقتى، بەرىك بولسا؟..— دەدى الدان تىنىمسىز قاربالاسقان قوس قارلىعاشقا كومەككە اسىققان سىڭايمەن.

— بايقايمىسىڭ، بۇلار بيىل عانا تابىسقان جۇپ  سەكىلدى. سەنىڭ ارمان اعايىڭ مەن گۇلىم جەڭەشەڭ سياقتى. ولار دا جاڭا وتاۋ قۇرىپ، جاڭا ءۇي سالىپ جاتقان جوق پا؟— دەپ، ورمان قارت نەمەرەسىنە تۇسىنىكتى بولۋ ءۇشىن ناقتى مىسالمەن سويلەۋگە تىرىسىپ باعۋدا.

— قارلىعاش تا ادام سەكىلدى بولعانى عوي سوندا؟..

— ارينە، بارلىق تىرشىلىك يەسى ادامعا ۇقساس تىرلىك كەشەدى. جانە ولار ادامداردان دەمەۋ كۇتەدى. ونىڭ ىشىندە، اسىرەسە، قارلىعاش ادامعا وتە جاقىن. وزدەرى مەن بالاپاندارىن جاۋلارىنان قورعاۋ ءۇشىن ۇيالارىن ادامدارعا جاقىن جەرگە، ۇيلەردىڭ ماڭدايشالارى مەن بۇرىشتارىنا سالادى. ەڭ جاناشىر قامقورشىلارىنىڭ ادام ەكەنىن جاقسى تۇيسىنەدى،— دەپ توقتاعان اتاسى كۇرەگىن الىپ، نەمەرەسىن جەتەكتەپ، ۇيگە قاراي بەت العان.— ءجۇر، قۇلىنىم، قارلىعاشتاردىڭ جۇمىستارىنا كەدەرگى بولمايىق. كەرەكتەرىن جاسقانباي، ەمىن-ەركىن تاسىپ السىن.

وسىلاي ىستەسە، قارلىعاشتارعا كومەگى كوبىرەك تيەرىن تۇسىنگەن الدان دا ورنىنان تۇرىپ،  تىنىمسىز قايشىلاسقان قوس قارلىعاشقا قىزىقتاي قاراعان كۇيى اتاسىنا ەردى.

---