InfoHub Logo

تاقىرىپ: قوش، سۇيىكتى الىپپە!

ماقساتى:
1. وقۋشىلاردىڭ ساۋات اشۋ ءپانىن وقۋ بارىسىندا العان بىلىمدەرىن كورسەتۋگە كومەكتەسۋ.
2. مانەرلەپ ولەڭ، قارا سوزدەردى ايتۋعا، ۇيرەنگەن ءبىلىم، بىلىك داعدىلارىن ارى قاراي جەتىلدىرۋگە جاعداي تۋعىزۋ.
3. وقۋعا، ءبىلىم الۋعا، قورشاعان ورتانى ايالاۋعا، دوستىق قارىم - قاتىناس ورناتۋعا تاربيەلەۋ.
كورنەكىلىكتەر: "الىپپە" ماكەتى، ى. التىنسارين پورترەتى، "بالالار شىعارماشىلىعى"، "ەڭ العاشقى ساباق، ەڭ العاشقى ۇستاز، ەڭ العاشقى باعا…" اتتى سۋرەت كورمەلەرى (فوتو، سۋرەتتەر، بالالاردىڭ "الىپپە" تۋرالى ويلارى)، شارلار، لەنتالار، جالاۋشالار، جۇمساق ويىنشىقتار، ارىپتەر، سيفرلار 1 - 10، تەحنيكالىق وقىتۋ قۇرالدارى، «التىن كىلت»، گۇلدەر.
ءادىس - تاسىلدەرى: "بولجاۋ"، "ەسسە".
گيمن. وقۋشىلار كىرەدى.
قۇرىلىمى: پەردە جابىق تۇرادى. ساحنادا "ەرتە، ەرتە، ەرتەدە…" اۋەنى وينالادى.

جۇرگىزۋشى: ال، قانەكي، بالالار، اتا - انالار، قۇرمەتتى قوناقتار! جايعاسىپ وتىرىڭىزدار! "الىپپە".
(مۋزىكا. ساحنادا بۋراتينو مەن مالۆينا بيلەيدى. پەردە اشىلادى).
جۇرگىزۋشى: بالالار، بۇلار كىمدەر؟ بىلەسىڭدەر مە؟
كورەرمەندەر: بۋ - را - تي - نو، مال - ۆي - نا.
(ارتەمون "الىپپە" كىتابىن تىستەپ الىپ جۇگىرىپ كەلەدى).
مالۆينا: ارتەمون، بۇل نە؟ نە كوتەرىپ ءجۇرسىڭ؟ بۇل كىتاپتى قايدان الدىڭ؟
بۋراتينو: قانداي ادەمى كىتاپ؟ سۇراۋسىز العان سياقتىسىڭ عوي ءوزى.
ارتەمون ۇرەدى.
مالۆينا: بۋراتينو، بۇل كىتاپتى مىندەتتى تۇردە يەسىنە اپارىپ بەرۋ كەرەك!
بۋراتينو: ءيا، دۇرىس ايتاسىڭ. كەتتىك!
(ساحنا جابىلادى).
جۇرگىزۋشى: ءسويتىپ ءبىزدىڭ كەيىپكەرلەرىمىز جولعا شىقتى.
(ساحنادا كوڭىلسىز، مۇڭايىپ وتىرعان بالالار. ءبىرى ويىنشىق ويناپ، ءبىرى جەرگە قاراپ، ت. س. س. مالۆينا، بۋراتينو، ارتەمون كەلەدى).
مالۆينا: بالالار، مىنا زات سەندەردىكى مە؟
وقۋشىلار: الاقاي، كىتابىمىز تابىلدى!
بۋراتينو: بۇل قانداي كىتاپ؟

1 - وقۋشى: بۇل سيقىرلى كىتاپ.
2 - وقۋشى: جاقسى كىتاپ الىپپە،
ۇيرەتەدى ارىپكە.
قۋىرشاقپەن قوشتاستىم،
الىپپەمەن دوستاستىم.
ا - دان باستاپ ءارىپتى،
تەرىپ ماعان تانىتتى.
3 - وقۋشى: ۇيرەتتى ءبىزدى الىپپە،
42 دەربەس ارىپكە.
ءسوز، سويلەم قۇراپ ارىپتەن،
لايىق بولدى دارىپكە.
مالۆينا، بۋراتينو: الىپپە! جاقسى ەكەن.

4 - وقۋشى: كەلىڭدەر، قوناق بولىڭدار. بۇگىن ءبىز شەكسىز قۋانىشتىمىز. ويتكەنى، العاش حات تانىتىپ، ساۋاتىمىزدى اشقان سۇيىكتى "الىپپە" – مەن قوشتاسقالى وتىرمىز.
5 - وقۋشى: بار كىتاپقا باس بولعان،
الىپپە – عىلىم اناسى.
الىپپەدەن باستالعان،
دانالىقتىڭ داناسى.
حور: "الىپپە".
بۋراتينو: بالالار، مەن دە سەندەر سياقتى وقىپ ۇيرەنگىم كەلەدى.
6 - وقۋشى: بۋراتينو، قورىقپا، ءبىز ساعان ۇيرەتەمىز. مىنە، سەن اڭساعان ارىپتەر دە كەلدى.
وقىماق بوپ ارىپتەردى،
اشىپ ەدىم "الىپپەنى".
بۇل دوستارىم قىزىق نەتكەن،
ءارىپ بىتكەن زىتىپ كەتكەن.

7 - وقۋشى: الماتىعا "ا" بەكىپتى،
"ءا" – ءنى اسەت اكەتىپتى.
8 - وقۋشى: "ب" بولاشاقتىڭ قالاسىنا،
تۇنەپ قاپتى، ناناسىڭ با؟
9 - وقۋشى: گۋريەۆپەن "گ" تانىستى،
بەتكە الىپتى "ع" عارىشتى.
10 - وقۋشى: سارارقانىڭ دالاسىندا
"د" تاپ بولدى بوراسىنعا.
11 - وقۋشى: جامبىلدا ءجۇر "ج" جايراڭداپ،
زايسان بارعان "ز" سايراڭداپ.
12 - وقۋشى: "ت" – نىڭ ءوزى تاڭداپ بارعان،
مەكەنى ەكەن تالدىقورعان.

13 - وقۋشى: "قايدا؟" – دەسەڭ قالعان ءارىپ،
ولار دا اۋىل، اۋدان بارىپ،
ەڭبەك ەتىپ جاتىر ەكەن،
ءارىپ بىتكەن باتىر ەكەن.
مالۆينا: ءبىز سەندەرگە جۇمباقتار جاسىرايىق. شەشۋىن تابا الاسىڭدار ما؟
1. ءتىلى بەتىندە،
ءسوز شەتىندە. (ساعات)
2. شارلاپ كەلىپ دالانى،
ۇيىمە ءۇيىن سالادى. (قارلىعاش)
3. ماڭ، ماڭ، ماڭ باسقان،
شۋدالارىن شاڭ باسقان،
بۇل قاي جانۋار؟ (تۇيە)
14 - وقۋشى: ءبىزدىڭ اتا - انالارىمىز دا وتە تاپقىر.
بۋراتينو: ولاي بولسا، ۇلجامالدىڭ ماماسى، مىنا جاڭىلتپاشتى ايتىپ كورىڭىزشى.

15 - وقۋشى: ايتا - ايتا جاق تالدى،
قايتا - قايتا جاتتالدى.
قايتا - قايتا جاق تالدى،
ايتا - ايتا جاتتالدى.
16 - وقۋشى: قاشتىم قاتتى - اق،
ۇشتى قالپاق.
بالاق ساتپاق،
اياق باتپاق.