قوي، باسقا بىرەۋ شىعار
ءبىر كۇنى ۇزاق ءجۇرىپ كومانديروۆكادان كەلدىم. ايەلىم ەسىكتى اشتى دا:
— ءسۇيىنشى، تايلان، — دەپ كۇلە تۇرىپ قالدى. — يە؟
— جوق، اكەل ءسۇيىنشىمدى. ايتپەسە، ايتپايمىن.
— جارايدى، قالاعانىڭدى ال.
— ساعىنتاي باسقا قىزمەتكە اۋىستى، — دەدى جولداسىم.
— راس پا؟ — دەپپىن مەن قۋانعاندىعىمنان. ساعىنتاي ءبىزدىڭ كوڭىلدەس جولداستارىمىزدىڭ ءبىرى. مەن كومانديروۆكاعا جۇرەر كەزدە ونى وبلىستىڭ ءبىر جاۋاپتى قىزمەتىنە اۋىستىرادى دەگەن ءسوز بولعان.
— بۇل قىزمەتكە اۋىستىرسا، ايتا جۇرەتىندەي ەتىپ توي جاسايمىن، — دەپ كۇلىپ ەدى ساعىنتاي. تويىن قويشى ونىڭ. ساعىنتاي سياقتى جاس جىگىتتىڭ وسكەنىنە، ۇلكەن قىزمەتكە جوعارىلاعانىنا نەگە قۋانبايىن. الدىم دا تەلەفون سوقتىم.
— Ay، ساعىنتايمىسىڭ؟ امانسىڭ با، ەي؟ ال قىزمەت ورنىڭ قۇتتى بولسىن.
ار جاقتان قۇلاعىما توساڭداۋ پاڭ داۋىس ەستىلدى.
— بۇل كىم بولار ەكەن؟
مەن قىسىلىڭقىراپ قالدىم. ساعىنتاي قوڭىر داۋىستى، شاپشاڭ سويلەيتىن جىگىت بولاتىن.
— بۇل قايدان؟
— قايدا زۆونيت ەتىپ تۇرعانىڭدى بىلمەسەڭ، نەگە زۆونيت ەتەسىڭ، — دەدى جاڭاعى داۋىس ايىرىقشا ءبىر سالقىن لەپپەن.
— مەن قاتەلەسىپ كەتتىم عوي دەيمىن-اۋ وسى؟ ماعان ساعىنتاي كەرەك ەدى. ساعىنتاي وكىمبايەۆ.
— يە، مەن وكىمبايەۆ، — دەدى تەلەفونداعى جىگىت. سودان كەيىن ار جاعىنداعى بىرەۋلەرگە سويلەپ كەتتى. مەن اڭىرىپ قالدىم.
— ءيا، وكىمبايەۆ تىڭداپ تۇر. نە ايتايىن دەپ ەدىڭىز؟ — تەلەفوننان قاعاز سىبدىرى ەستىلدى.
— اۋ، سەن ساعىنتايمىسىڭ؟
— يە، بۇل كىم ەدى؟
— تانىماي قالدىڭ با؟ تايلان عوي. جاڭا ورنىڭ قۇتتى بولسىن.
ودان ءۇن جوق.
— اللو، اللو. ساعىنتاي...
— يە، تايلان، تىڭداپ تۇرمىن. نە شارۋاڭ بار ەدى؟
— كومانديروۆكادان كەپ تۇرعانىم وسى. سەنى قۇتتىقتايىن دەپ... — دەپ كۇمىلجىدىم. سودان كەيىن تاعى دا «وسى راس ساعىنتاي ما؟» دەپ تۇيتكىلدەنىپ قالدىم.
— ال، سەن راس ساعىنتايسىڭ با وسى، الدە ويناپ تۇرعان باسقا بىرەۋ مە؟
— تايلان، — دەدى تەلەفونداعى پاڭ داۋىس. — ويىن-ويىن عوي. ال قىزمەت بابىندا «سەن، سەن» دەپ دىكەكتەۋىڭدى قوياتىن بول بۇدان بىلاي.
— ءاي، قويشى. سەنىڭ وسى ءبىر قۋلىعىڭ-اي.
— راس ايتامىن. سوڭى بولسىن مۇنىڭ.
مەن بىردەمە دەيىن دەپ ويلانا بەرىپ ەدىم، ساعىنتاي ترۋبكانى تاستاپ جىبەردى. تەلەفون «تۇك - تۇك» دەپ ءوز انىنە باسىپ كەتتى.
اپىر-اۋ، بۇل كادۋىلگى مەن بىلەتىن ساعىنتاي ما؟ قوي، باسقا بىرەۋ شىعار...
You Might Also Like
-
ءبىز ءبىر جىلى كوكتەمدە دەمالىس الىپ، سۇيىكتى قالامىز الماتىعا كەلدىك. قالانىڭ تاۋ جاق شەتىنەن جالعا العان ءۇيىمىز دە قولايلى بولىپ شىقتى.
-
بۇل — كولحوز شوپانى كوشەرباي قارتتىڭ قالادا تۇراتىن ۇلكەن بالاسىنا قوناقتاپ قايتقان بەتى ەدى. اتتانار كۇننىڭ قاربالاس — دۋمانىمەن ءجۇرىپ، ۆوكزال باسىنا دا پوەزد قوزعالار ساتتە عانا كەلىپ...
