InfoHub Logo

ايتۋلى قالام يەلەرى مەن تەاتر شەبەرلەرىنىڭ ءتىل تابىسقان ىنتىماق-بىرلىگى ۇلتتىق ونەردىڭ ىرگەلى تۋىندىلارىن جاساۋدا قاينار كوز، قۇنارلى ءوpic بولاتىندىعى ءار حالىقتىڭ ارعى-بەرگى رۋحاني تاريحىندا تالاي دالەلدەنىپ، تىنباي دامىپ كەلە جاتقان قۇبىلىس. مۇنداي ىرىس-يگىلىككە كەز-كەلگەن شىعارما كەپىلدىك الا بەرمەيدى. ونداعى شىمىرلاعان وي تۇنىعى تەرەڭىنە بويلاۋدى اڭسايدى. جانر تابيعاتىنا ءتان شيىرشىق اتقان قاقتىعىس بارىسىندا قالىپتاساتىن سانقيلى مىنەز-قۇلىقتىڭ قيعاش-قۋىس تۇكپىرلەرى، جان ءيىرىمى جۇرەك ءلۇپىلى بار. كەيىپكەردىڭ وي-ارمانىن، ونىڭ مۇرات تۇتقان مۇددەسىنىڭ قات-قابات قالتارىسىن تاۋىپ، سىر-سيپاتىن اشۋ ءاردايىم سۋرەتكەردىڭ زەردەلى بيىك پاراساتىن سارىلا ىزدەنگەن ەڭبەكتەرىن، قىراعى كوكىرەك كوزىن تىلەيدى. كلاسسيكالىق شىعارمالاردىڭ كوڭىلى سوققاننىڭ قۇر تاۋەكەلىنە، جەڭسىك قۇماردىڭ جايداق جامباسىنا، اۋەسقويدىڭ «ءالىم كەلمەيتىن نەسى بارىنا» كونە بەرمەيتىن سەبەبى دە سودان بولسا كەرەك.

ۇلتتىق تەاتر ونەرىنىڭ الىپپەسىنەن باستاپ، مەرزىمدى مەكتەبى ۇلگى ەتەر ۇستازى بولعان مۇحتار اۋەزوۆ دراماتۋرگياسىنا ىلەسە كەلگەن عابيت مۇسرەپوۆ شىعارمالارى دا ءار بۋىن، ءار كەزەڭ رەجيسسەر، اكتەر وكىلدەرىنىڭ بىلگىرى بايگە، جۇيرىگى جۇلدە الار تارازىسىنا اينالعانى ءمالىم. بۇل تۋىندىلار اسىرەسە ءومىرىن ساحنا ونەرىنە ارناعان جاس ۇرپاقتى قازاق ءتىلىنىڭ ءدامى مەن ءنارىن، حوش ءيىسى مەن ويۋ ورنەگىن، ايشىعى مەن استارىن، سالماعى مەن سازىن، اۋەنى مەن اجارىن تانۋعا تاربيەلەيدى. تەاتردىڭ باس رەجيسسەرى ءازىربايجان مامبەتوۆتىڭ «قوزى كورپەش — بايان سۇلۋعا» قايتا ورالۋى دا وسى مۇددەدەن تۋسا كەرەك. سونىمەن بىرگە بۇل سپەكتاكل ءا. مامبەتوۆتىڭ كەمەلدەنۋ جولىنداعى كەڭ قۇلاشىن، شابىت شالىمىن، وي ولكەسىنىڭ ورەسىن تاعى دا ءبىر تانىتقان شىن مانىندەگى تالانت تۋىندىسى بولىپ قالىپتاسقان. بۇگىنگى رەجيسسۋرا ونەرىنىڭ ۇزدىك ۇلگىلەرىنىڭ سىر-قۇپياسىنا قانىق ءازىربايجاننىڭ تىنباي ىزدەنۋ، تياناقتى ەڭبەكتەنۋ جولىندا تەاتردىڭ ۇلتتىق كەلبەتىن، تۆورچەستۆولىق ەڭسەسىن كوتەرۋدەگى تابىستارى ورتالىق باسپا ءسوز بەتتەرىندە، بايسالدى باسقوسۋلاردا، تالاي ايتىلىپ ءجۇر. وداقتاعى ماڭداي الدى رەجيسسەرلاردىڭ قاتارىندا كورىنىپ كەلە جاتقان ءازىربايجان مامبەتوۆتىڭ، كەيىنگى جىلدارى م. اۋەزوۆ تەاترىنىڭ ءوزى يىقتاس، ونەر وردالارىنان وزات شىعۋىنداعى ەڭبەگى زور. البەتتە، مۇنىڭ ءبارىن تاراتىپ تالداپ ايتۋ ونەر تاريحىن زەرتتەۋشىلەردىڭ سىباعاسىنداعى كەلەلى كەڭەستىڭ ءسوزى.

ءازىربايجان قاي ءداۋىر شىعارماسىنا بارماسىن ول ەڭ الدىمەن ءوز زامانىنىڭ وكىلى، بۇگىنگىنىڭ سىنشى-ساراپشىسى. وتكەننەن ۇيرەنەر قايسى، جيرەنەر قايسى؟ قويار ساۋالى دا، الار جاۋابى دا ناقتى. بۇل ساپاردا دا ادىلەت اتاۋلىعا كوز اشقالى كورشى قونباعان، مەيىرىم، اتالىق، ادامدىق پارىز دەگەننەن جۇرداي قارابايشىلدىقپەن ءومىرى وزگەنىڭ سىپىراسىن اڭدىپ، بوگدەنىڭ وتىنا جىلىنۋعا جارالعان مىسىق تىلەۋ ءمۇلايىم، ىشتەي زۇلىم، جۇلىڭعىرت جانتىقشىلدىقتىڭ كۇرە تامىرىن قازبالاي اشقان. مۇنداعى قاراباي سىرتتاي ەزۋ تارتار، ساراڭدىقتىڭ ساياز كۇيبەڭى ەمەس — مەرەز قاتىگەزدىكتىڭ حاس قاسىرەتى. مۇنداعى جانتىق قاعىلەز كۇلكى تۋعىزار قابىرشاق قۋلىقتىڭ ق ۇلى ەمەس — ءىزى-جىمى، جىم-جىلاس جالاڭاياق جاۋىزدىق قياپاتى. رەجيسسەردىڭ وي جەبەسىنىڭ ءدال تيگەن نىساناسى وسى.

كوز الدىمىزدا تىنىسبۋار بەلەس-بەلەس بەدەۋ قۇمدار... قازا-جالاعا كۋا جالاڭاش، جايداق جارتاستار... ەلىكتىڭ بەيكۇنا ەگىز لاعى... مۇڭى ءبىر، مەكەنى وقشاۋ ءازىز قوس انا بەينەسى — انت بەلگىسى قاندى ورامال، ىنتىزار جۇرەكتىڭ زار-زاپىرانىنىڭ استارىن اشار، ارمان اعىسىنداي باياۋ تولقىعان اۋەن سپەكتاكلدەگى رەجيسسەرلىق شەشىمنىڭ سىرت اجارى. وتەر وقيعانىڭ، وسىنداي مەكەن-مەزگىل نىشاندارى ءدال، ناقتىلى، شاشاۋ-شاشىراندىلىقتان اۋلاق.

وسى ءبىر قۇلازىعان تابيعات اياسىندا بۇكىل قاۋىمعا قارعىس ايتىپ قۇدايدىڭ ءوزى قولىنا تۇسسە قوتىر تايى ءۇشىن كوزىن ويىپ الۋعا دايار ىدىرىس نوعايبايەۆتىڭ قارابايى كەلەدى. تۇسىندە تالاۋدا، وڭىندە قاماۋدا، وڭەشتەن قايرىلعان ولەرمەن ۇرەيلى ءۇن. بۇكىل جارىق دۇنيەگە قاباق استىمەن ۇرلانا قاراۋى ەلدەن-ەرەك وگەي كورىنەدى.

ءتىرى جاننان تاپقان ادالى — جانتىق. ىسىنە دەمەۋشى، تۇسىنە جورۋشى وسى عانا. وزىنەن گورى جانتىققا سەنەدى. ءبىراق، ىدىرىستىڭ قارابايى جانتىققا جەتىسكەنىنەن سەنىپ جۇرگەن جوق. پارمەنى بار دا دارمەنى از. ءتىرى جانعا ءبىر ەرقارا كەرەكتىڭ عانا جەلەۋى. ساراڭدىق تەك دۇنيەقوڭىزدىق ەمەس ەكەن. «جەتپىس جىل جەتى جاپىراعىنا ءتىسى تيمەگەن قاراباي» ەلدى دە، جەردى دە، ەتباۋىر تۋعان بالاسىن دا قۇربان ەتۋگە بەل بۋعان. «ءشايناپ كورمەگەن قىزىعىن، ايداپ كورمەك». ەم قونباس، ينە شانشار ساڭلاۋسىز پاتولوگيا. ونىڭ جانىن جادىراتار قۇلاق كۇيى جىلقىنىڭ ءدۇبىرى. قارابايعا بالانىڭ كۇلگەنىنەن قۇلىننىڭ كىسىنەگەنى ارتىق. مىنە، قودار شاپتى، اسپانى الاقانداي جەرى تەبىنگىدەي سەندەلىپ قالعان قاراباي. بۇعان دۇنيەنىڭ ءتورت بۇرىشى اپشىسى قۋىرىلىپ بىتكەندەي. «مال تۇگەل قايتىپ كەلدىنىڭ» قۋانىشى ءبىر ءسات ءجۇزىن جىلىتتى دا «قايدان تۇگەل بولسىن» دەگەن كۇماندى وي تاعى دا قۋارتىپ سالا بەردى. «ءبىر تاي شىعىنىڭ جوق» دەگەن جانتىق حابارىنا جادىراپ، جانتورسىعىنا كونەتوز شەكپەنىن جاپتى. بۇل قارابايدىڭ جارىق دۇنيەگە كەلگەلى جاساعان ءبىر جومارتتىعى. ەندى جەرگە جاتا قالىپ تىڭ-تىڭداعانداعى قاراباي قۋانىشىندا شەك جوق. نە پايدا؟ تاعى قىرسىق اينالدى. بايان مەن قوزى تىلەگىن اڭعارعان قاراباي كەشە عانا اتا جاۋى بولعان ءوزىن تاقىرعا وتىرعىزىپ كەتكەن قودار جاعىنا تايقىپ شىعا كەلدى. تىرەك-تۇلدىرسىز جەتىم بالا قىز الۋمەن تىنسا ءبىر ءسارى. ەرتەڭ مۇنىڭ مالىنا يە بولىپ كەتەدى عوي. قاراباي ۇعىمىنشا قوداردىڭ ءجونى باسقا. ول سەنىڭ دۇنيەڭە كوز قىرىن سالمايدى دا. باياندى السا ءبىتىپ جاتىر، قايتا قالىڭمال كەلمەي مە. مۇندايدا قارابايعا انت تا، ار دا، ادىلەت تە، ادال نيەت تە اياقاستى. بۇلار قارابايدىڭ تۇسىنە كىرمەگەن تۇسىنىكتەر. «قارا ەمەن مايىسسا دا، قاراباي قايىسپايدى»— بۇل بەتبۇرىس قاتىگەزدىڭ قاتاڭ سەرتى. باقساق، بۇل تەك ءسوز عانا ەكەن. ءىستىڭ ارتى ناسىرعا شابارىن سەزگەندە، قاراكەڭ ساعىزداي سوزىلىپ، تۇبىتتەي ءتۇتىلىپ، قويا بەرەدى. ءوزىنe لايىق مۇندا دا باقاي قۋلىق بار. «ون ويلانىپ ءجۇز تولعانىپ، ءوز قولىن ءوزى كەسە الماعان» قاراباي بەسىكتەن بەلى شىققالى جاس شىقپاعان كوزىن سۇرتكەن بولادى. بۇل دا جۇرتتى سەندىرۋدىڭ جادىگوي جولى. قانشا جالعان بولسا دا مۇنداي جىلى ءسوز ايتۋ قارابايعا وڭايعا تۇسپەيدى. وسى ساتتە ءوز ءۇنى وزىنە جات ەستىلگەندەي قۋىستانا، اينالا باعىپ سويلەيدى. ات جالىنىن ۇستاپ اقساقال بولعالى اۋزىنان شىعىپ تۇرعان تۇڭعىش كوشەلى ءسوزى. ءسوز بولعاندا اتانىڭ ءسوزى، ونى دا ۇيرەتكەن جانتىق. تاس ارقالاپ، تاۋ قوپارعانداي ءسوز اياعىن زورعا ءبىتىردى. جۇرت ماقۇلداسىمەن، «ايتتىم ءبىتتى، كەستىم ءۇزىلدى» دەپ ءبىر-اق قايىرادى. ويتكەنى، جانتىقتان قارىز العان جىلى ءسوز تاۋسىلدى. ەندىگىسى قارابايدىڭ شورت كەسىپ، شولاق بايلاۋى عانا. اقىرى ەل-جۇرتتان بەزە قاشقان قاراباي، شىرقاۋ شىڭىنا جەتىپ شورت قيىلعان شىلبىرداي اعاش اتقا ءمىنىپ جىندانىپ تىنىش تاپتى.

ساليقالى ويشىل، سىندارلى ازامات، دۋلىعالى باتىر. مۇباراك ماۆر بەينەلەرىن جاساعان ىدىرىستىڭ قاراباي قاۋىزىنا ەنىپ وزىنشە تۇلەي، تىڭ سۇرلەۋ تابۋى اكتەردىڭ تالانت، تابيعاتىنىڭ بىزگە بەيماعلۇم تەڭىن شەشكەندەي بولدى. نوعايبايەۆتىڭ قارابايىندا ساراڭدىقتىڭ مازاعى ەمەس، ازابى بار، ساراڭدىق سەزىمنىڭ شىڭىراۋ، قۇردىم قازا قاسىرەتى بار. كوپتەن بەزگەننىڭ كومۋسىز قالار قارعىسى بار.

ءانۋار مولدابەكوۆتىڭ جانتىعى دا كوپتەن كوزى ۇيرەنگەننەن وزگەشە، ءورىم، ءورىس تاپقان. سىرتتاي قارابايدىڭ كولەڭكەسىندەي كورىنگەنمەن شىن مانىندە ونى اڭدىپ جۇرگەن اجالى سياقتى. سۇم-سۇمەيدىڭ جاۋىرىن اشقاندىعى كەيپىندە قارابايدىڭ جىلقىسىن ايداپ جانتەكەڭ اتالىپ بارا جاتقان ءوزىن ىزدەگەندەي سىڭاي بار. بۇل ءبىر ەمەس، وڭاشادا وسى جاۋىرىنمەن ءوزى تىلدەسەتىن ءتارىزدى. كارى ارقاردىڭ قاي جىرادا قالارىن اڭدىعان اۋرۋ قاسقىرداي ىشتەن تىنعان زىمياننىڭ قيمىلى دا سامارقاۋ. ارام ويلىلىعىنا ساي اقىل مەن جىگەر بەرسە قاراباي تۇگەل قالىڭ ەلدى قان قاقساتاتىن بۇلىك ۋ سويقاننىڭ ءوزى. بۇل مۇددە جاعىنان قارابايدىڭ جالعاسى. ءبىراق، ودان وزگەشە. قاراباي قارەكەڭ اتانعىسى كەلگەن جوق. مۇنىڭ جانتەكەڭ بولعىسى بار. ايلاسىنا اشىتقى بولارلىق از عانا اقىلىنىڭ ارقاسىندا ارام داۋلەتتىڭ تەگىن مالدىڭ، ساۋلەتىن كورمەك. ەلگە ورالماق، حالىق كوزىن تۇندىرماق. مۇندا مالقۇمارلىق پەن مانساپقورلىق ەگىز. جانتىق تاعىلەتتىلەر جانىڭىزدا اكەلەپ ءجۇرىپ، ەسەبىنەن ءومىرى جاڭىلمايدى. مۇندايلاردىڭ جىلاپ ءجۇرىپ زورلاعانىن، كولگىرسىپ ءجۇرىپ قورلاعانىن اڭعارماي دا قالاسىڭ. سىرت كوزگە قوزى مەن بايانعا قامقورشى، قارابايعا اقىلشى، قوداردىڭ سويىلىن سوعۋشى. ءبارىنىڭ اراسىندا سىناپتاي سۋسىپ جۇرگەندە ول ءوز ىشىندەگى ىسقىرعان جىلان، ىزعىعان شاياندى استە سەزدىرمەيدى. قوعامعا قارابايشىلدىقتان، جانتىقشىلدىق الدە قايدا ءقاۋىپتى. ويتكەنى، ول ءبىر عانا سەزىمنىڭ دۇنيەقوڭىزدىقتىڭ ق ۇلى ەمەس. جانتىق مىنەزى، جانتىق قىلىعى الدەقايدا ومىرشەڭ. ونىڭ فيلوسوفياسى «كەشەگى كۇن كەشە ءوتتى، بۇگىنگى كۇن باسقاشا» وسىعان ساي ارام پيعىلى وزگەرمەيدى. تەك ءايلا-تاسىلى عانا وزگەرەدى. جانتىق، ايتا بەرەتىن قۇبىلمالى كەسىرتكەنىڭ (حامەلەون) ءدال ءوزى. كوز الدىندا بەتەگەدەن بيىك، جۋساننان الاسا، سۇتتەن اق، سۋدان تازا، سەنەن ءبىر ەلى ءوزىنىڭ باسىمدىعىن سەزسە قىرىپ جىبەرۋگە دايار. قوزىنىڭ قازاسى، بايان قايعىسى وعان شىبىن شاققانداي اسەر ەتپەيدى. ويتكەنى، «و، كوزسىز كوبەلەك، ەسسىز اسەرلەر... تالاي تارتتىرارمىن گوي-گويدى» دەگەن ماقساتىنا جەتتى. ول وزىنەن باسقا ءتىرى جانعا تىلەرى وسى. جانتىق بىتكەننىڭ سەنىمىنە كىرىپ، جەگىدەي جەپ قولىنان كەلسە «گوي-گوي تارتقىزۋدان» باسقا مۇراتى بولماسا كەرەك. ءانۋار شەبەر ويىنىمەن جانتىقشىلدىقتىڭ قانىپەزەر قاتالدىعىندا، سۇرلەۋى جوعالعانمەن، سىلەمى كەزدەسەتىن وسىنداي كەسەپات قىلىقتىڭ بار بوياۋىن اشكەرەلەيدى. ادىلەت پەن زۇلىمدىق بۇگىن تۋعان جوق. ول ادام قوعامىمەن بىرگە جاساپ، بىرگە الىسىپ كەلەدى. ءانۋاردىڭ جانتىعى سول الىسار جاۋىڭ اراڭدا بولسا الاستاۋعا شاقىرادى.

كەيىنگى جىلدارى كينو ونەرىندە دە، تەاتر ساحناسىندا دا مادەنيەتىمىزدىڭ ءوسۋ بارىسىنا مول ۇلەس قوسىپ كەلە جاتقان تىنىسى كەڭ تالانت يەسى ءاسانالى ءاشىموۆتىڭ بەكەجاننان كەيىنگى كوپتى قۋانتقان تاعى ءبىر تابىسى قودار وبرازى. ءاسانالى قودارىندا ۇردا-جىق، دۇلەي مىنەزبەن قاتار اسقاق ادۋىندىق تا بار. العاشقى كورىنىستە ول جۇرەكتىڭ دەگەنى بولماسا، بىلەكتىڭ دەگەنىن بولدىرعان دالانىڭ كوكشۋلانى. ءبىراق، كۇش اتاسىن تانىماس، ايقاستا بەتى قايتىپ قاراباي الدىنا قايتا كەلدى. نان پىسكەن دەمى باسىلعان، اقىل ساباسىنا تۇسكەن. ەندى جول-جورانىڭ ىزىمەن بايلاۋلى قولىن بوساتتى. سونگەن ىزا بار، وپىق جەگەن وكىنىش بار. امال نە، بۇعان دا كوندى. جولعا جۇگىندى.

اقىرى كەلىپ جانتىقتىڭ تورىنا ورالدى. سوقىر سەنىم جەتەگىنە قودار جانتىقتىڭ قولشوقپارىنا اينالدى. جانتەكەڭ كومەكشى تاپتى. اندا-ساندا جىلت بەرگەن وجار مىنەزى، جانتىق وياتقان قىزعانىش سەزىمى كوزسىز كوبەلەكتى ورعا جىقتى. ءلاعنات قامىتىن كيىپ، جار استىندا قالدى. اكتەر ويىنىنىڭ باس جىبىنەن باستاپ، اقىرعى تۇيىنىنە دەيىن وبرازدىڭ ديالەكتيكالىق دامۋىندا زارەدەي جالعاندىق، جاساندىلىق جوق.

وسى تەاتردىڭ تۇڭعىش بايانى ش. جانداربەكوۆانىڭ ماقپالى دا كوڭىل تولقىتار كوپ بوياۋىمەن ەستە قالادى. اسىرەسە قوزىعا ەڭ العاش رەت بايان جايلى سىر اشارداعى سەزىكپەن سەزىم ارپالىسىن، انالىق ماحابباتتىڭ قيماس-قىزعانىش كۇيلەرىن اسقان تەبىرەنىسپەن بەرەدى.

ەكىنشى ماقپال ف. شاريپوۆانىڭ العاش كەلۋىندەگى مۇڭلى كەيپىنەن باستاپ، ءوز وشاعىنداعى جەتىم-جەسىرلىك ايانىشتى حالدەرى، قارعىس ساحناسىنداعى سىزداعان جۇرەك. ورتەنگەن باۋىردىڭ زار قايعىسى اۋىر اسەر قالدىرادى.

بالاپانىن قىزعىشتاي قورعاپ، از قۋانىشى ماڭگى قايعىعا اينالعان X. بوكەيەۆانىڭ كۇنكەيىنىڭ ءحالى دە جۇيەڭدى بوساتادى. اسىلىندا انالار بەينەسى بوياۋى بەرىك، بەدەرى ايقىن، جەكە-جەكە تۇلعا بوپ ەستە قالادى.

سپەكتاكل نەگىزىندە ورتا بۋىنمەن جاس بۋىننىڭ تىزە قوسقان ەڭبەگى، مۇنداي ءادىستىڭ تالىمدى-تاربيەلىك ءمانى زور. ءبىز كورگەن ءۇش باياننىڭ ءۇش ءتۇرلى جۇيەدەن تانىلۋى دا قۋانتاتىن جاعداي. جاستاردىڭ ءوز ۇنىمەن، ءوز بەتىن ىزدەنۋى وسەر ۇرپاقتىڭ ءقادىر تۇتار قاسيەتى.

نازىك ليريكالىق ارنادا داميتىن ب. جانعالييەۆانىڭ بايانىنداعى ءيبا-ىلتيفاتى مول ۇياڭ سابيلىك، ت. تاسىبەكوۆانىڭ بايانىنداعى دالا قىزىنىڭ ەركەكشورالىق اق جارقىندىعى، م. راحمانوۆانىڭ ەرتەڭ ءلاززاتتىڭ ءار مىنەزىمەن كورىنگەن بايانى، ونەردىڭ ۇلكەن جولىنا بەت بۇرعان ىزدەنىستىڭ العاشقى جەمىستەرى.

جاس قوزى ش. مەيراموۆكە وسىنشا ازۋلى شەبەرلەردىڭ ورتاسىنان نەگە جارىپ شىقپادىڭ دەپ وكپە ايتۋ ەرتەرەك. جاس اكتەردىڭ ىنتا-تالابىنا ساي قوزىنىڭ قازىرگى كورىنىسى بۇدان دا جاقسارا تۇسەر دەگەن ءۇمىت زور. قاشاندا باس كەيىپكەردىڭ جۇگى اۋىر، جاس اكتەردىڭ قوزىنىڭ ىشكى سەزىم- بوياۋلارىن بەرۋدەگى قۋاتى سابيلىككە سايا بەرەتىن جايلار اڭعارىلادى. بۇل جولى «قوزى ءالى ءسابي» دەگەندى جەلەۋ ەتكەن رەجيسسەردىڭ سوزىنە سەنە قويۋ قيىن. ماحاببات ءۇشىن كۇرەسە بىلگەن ادامنىڭ سابيلىكپەن شارۋاسى شامالى بولسا كەرەك. سوندىقتان جاس اكتەرگە رەجيسسەردىڭ ءالى دە قول ۇشىن بەرە تۇسكەنى ءجون.

شاعىن عانا رولدە ءبىر ءسات جىلى كۇلكى، ءوز ورتاسىنىڭ اق پەيىل مىنەزىن الا كەلگەن ر. تەلەۋبايەۆتىڭ ايدارى قىلىق قيمىلى، اڭقاۋ ادالدىعىمەن ەستە قالادى.

وقيعا اعىسىنداعى ەموسيالىق بوياۋدىڭ قالىڭداتا، بىردە ارقاڭدى ايازداي قارىپ، ەندى ءبىر ساتتە جۇرەگىڭدى قان جىلاتاتىن عازيزا جۇبانوۆانىڭ مۋزىكاسى شىعارما رۋحىن ءارۋاقتاندىرا تۇسكەن.

اسا ۇقىپتىلىقپەن جاسالعان كيىم پىشىمدەرى، (سۋرەتشى گ. يسمايلوۆا) سپەكتاكل اتموسفەراسىن دا، رەجيسسەر ويىن دا ءدال باسقان. سۋرەتشى الەكساندر كريۆاشەين ەڭبەكتەرىن تۆورچەستۆولىق تولعانىستىڭ جەمىسى دەپ تانيمىز.

سپەكتاكلدەگى حالىقتىق شايقاس كورىنىستەرى وتە اسەرلى، تازا تالعاممەن جاسالىنعان. ايقاي-شۋدان گورى، ارەكەت، ءادىس نانىمدى كورىنەدى.

اسىرەسە سپەكتاكلدىڭ فينالىنداعى قودارعا ايتىلاتىن ەكى انانىڭ قارعىسى تەك قانا وعان ەمەس بۇكىل قارابايشىلدىققا، جانتىقشىلىققا، الەمدەگى زۇلىمدىق، پاسىقتىق اتاۋلىعا قارسى انا اتىنان، ادىلەت اتىنان ايتىلعان قۇدىرەتتى ۇكىمدەي ەستىلەدى. وعان ءۇن قوسپاسقا، ىشتەي قايتالاماسقا حاقىڭ جوق. ويتكەنى ار، ادىلەت، ءارقايسىسىمىزدان سونى تالاپ ەتەدى. ۇلكەن تۋىندىنىڭ زامانمەن، ۋاقىتپەن تىلدەسۋى وسىلاي بولسا كەرەك.

قورىتا كەلگەندە ايتارىمىز اكادەميالىق م. اۋەزوۆ اتىنداعى دراما تەاترى ءوزىنىڭ ونەر شەجىرەسىنىڭ بەلەسكە سانار ءبىر بەتىن «قوزى كورپەش — بايان سۇلۋ» سپەكتاكلىمەن اشتى دەمەكپىز. وسىعان وراي كيەلى ونەر شاڭىراعىنىڭ تالانتتى كوللەكتيۆى حالقىمىزدىڭ سۇيىكتى عۇلاما جازۋشىسى عابيت مۇسىرەپوۆتىڭ جەتپىس جىلدىق مەرەكەسىنە ۇلكەن سىي تارتقانىنا كۋا بولىپ وتىرمىز.

1972

---