InfoHub Logo

بەسەكباي شۋ وڭىرىنە قاقپان سالادى ەكەن. ءبىر كۇنى قاقپانىنا ارلان قاسقىر تۇسەدى. وسى كەزدە بەسەكبايعا ءبىر توسىن وي ساپ ەتە قالادى. ول قاسقىردىڭ اۋزىن تۇمشالاپ بۋىپ، قاپقا سالادى دا، اۋزىن سودان كەيىن بارىپ بوساتادى.

وسى وڭىردە ەلگە بەلگىلى ءبىر ساراڭ باي تۇرىپتى. بىردە بەسەك باي دا وسى ۇيدە ءبىر ءتۇن اش جاتىپتى. سوعان زىعىردانى قايناپ جۇرگەن بەسەكباي سول بايدىڭ ۇيىنە قاراي جول تارتادى.

ول باي ۇيىنە ءىڭىر قاراڭعىسى تۇسە كەلەدى.

— مىناۋ ارقالاعان قابىڭنىڭ ىشىندەگى بۇلقىنىپ جاتقان نە نارسە، بەسەكباي، — دەيدى باي تاڭىرقاپ.

— بۇل — قۇدايدىڭ كوك قوشقارى. قولىما ىلىكپەي جۇرگەنىنە ون جىل بولىپ ەدى. بۇگىن ءساتى تۇسكەنى، قۇداي جارىلقاپ. ەندى مەن دە ءوزىڭ سياقتى ءبىر باييتىن بولدىم، — دەيدى بەسەك باي قۋانىش بەلگىسىن سەزدىرىپ.

— مۇنىڭ سونشالىقتى نە قاسيەتى بار ەكەن؟ — دەپ سۇرايدى باي ودان ەنتەلەي ءتۇسىپ.

— مۇنىڭ قاسيەتىن ايتپاڭىز، بايەكە، — دەيدى بەسەكباي، — بۇدان قاشقان ساۋلىق تۇگەلدەي ەگىز تۋادى. ءبىر قويدان جىل سايىن ەكى قوي ءورىپ جاتقاندا، مەن بايىماعاندا كىم باييدى؟

— سەن ءبىر ولجاڭدى بايلا ماعان. جەردەن تاۋىپ الدىم دەمەسپىن. قازىق باۋىڭا ءبىر بەستى ال، — دەپ جارماسادى باي.

بەسەكباي قينالىپ بارىپ، زورعا كونەدى.

— جارايدى، ەندەشە. دەگەنىڭ بولسىن! ءبىراق مۇنى ەل جاتقاننان كەيىن بارىپ قوراعا جىبەرىڭىز دە، توسەككە كەلىپ، بۇركەنىپ جاتا قالىڭىز. بۇل بارلىق قويىڭىزدى ءبىر تۇندە قاشىرىپ بىتەدى.

— جانۋار-اي، ءا، — دەپ تاڭىرقايدى باي.

سونىمەن بەسەكباي باي بەرگەن بەستىگە ءمىنىپ، ايالداماي ءجۇرىپ كەتەدى. قولىندا بارىن مىسە تۇتپايتىن باي، ەل جاتقاننان كەيىن قاپتاعى «قۇدايدىڭ كوك قوشقارىن» قورانىڭ ىشىنە جىبەرەدىدە، ءوزى ۇيىنە كەلىپ جاتىپ الادى. قورانىڭ ءىشى استان-كەستەڭ بولىپ، اۋىل يتتەرى ازان-قازان شۋلايدى.

ەرتەڭىنە تۇرسا، قورانىڭ ءىشى قىپ-قىزىل الا قان. ساۋلىقتاردى قاسقىر باۋىزداپ كەتكەن. «قۇدايدىڭ كوك قوشقارىنىڭ» وسىنشالىق كەرەمەتىن كورگەن باي تالىقسىپ قۇلاپ تۇسەدى.

---