InfoHub Logo

قۇرىلىس تەندەرىندەگى الاياقتىق: جالعان قۇجاتپەن 70 ملرد تەڭگەنىڭ كەلىسىمىن جاساعاندار ۇستالدى،-دەپ حابارلايدى Infohub.kz ءتىلشىسى.

الماتى قالاسىندا قۇرىلىس سالاسىنا قاتىستى ءىرى تەندەرلىك الاياقتىق اشكەرەلەندى. قارجى مونيتورينگى اگەنتتىگىنىڭ مالىمەتىنشە، 2021 جىلدان بەرى ءبىر توپ ادام جالعان كومپانيالار ارقىلى مەملەكەتتىك قۇرىلىس تەندەرلەرىنە قاتىسىپ، ارناۋلى رەيتينگ جۇيەسىن جاساندى جولمەن كوتەرىپ كەلگەن. تەرگەۋ بارىسىندا ولاردىڭ وتىرىك مالىمەتتەر مەن قولدان جاسالعان قۇجاتتاردى پايدالانعانى انىقتالدى.

ۇيىمداستىرۋشىلار جالعان قۇجاتتار ءۇشىن 500 مىڭنان 1،5 ملن تەڭگەگە دەيىن سىياقى الىپ وتىرعان. توپتىڭ زاڭسىز ارەكەتتەرى ناتيجەسىندە جالپى سوماسى 70 ميلليارد تەڭگەگە جۋىق مەملەكەتتىك كەلىسىمشارتتارعا قول قويىلعان. الاياقتىقتان تۇسكەن تازا تابىس 664 ميلليون تەڭگەدەن اسىپ، وعان 11 اۆتوكولىك پەن 12 جىلجىمايتىن مۇلىك (5 ءۇي، 7 جەر تەلىمى) ساتىپ الىنعان.

قازىرگى تاڭدا ءتورت كۇدىكتى قاماۋعا الىنىپ، تەرگەۋ يزولياتورىنا جەتكىزىلدى. قىلمىستىق ءىس بويىنشا تەرگەۋ جالعاسۋدا. بۇل جاعداي مەملەكەتتىك ساتىپ الۋ جۇيەسىندەگى باقىلاۋ مەن اشىقتىقتىڭ ماڭىزىن تاعى ءبىر مارتە دالەلدەپ وتىر.