رەداكسياعا حات
قۇرمەتتى جولداس رەداكسيا! ساۋ-سالەمەت بولارسىز.
مەنىڭ سىزگە تومەندە قول قويىپ، ارىز جازۋ سەبەبىم مىناۋ!
مەن ءوزىم، شىنىمدى ايتايىن، ادەبيەتتى ونشا كوپ وقىمايمىن. ويتكەنى، بىرىنشىدەن، وعان قول تيمەيدى. ال ەكىنشىدەن، مەن بولسام ءقازىر لەسحوزدا جۇمىس ىستەيمىن. ياعني ادەبيەتپەن ەشقانداي بايلانىسىم جوق.
بۇگىن باعانا تۇسكى تاماقتان كەلە جاتسام، ءبىزدىڭ الگى سەكرەتار ايەل: «ءابدىعالي، سەنى جۋرنالعا جازىپ قويىپتى. ءما، مىنا اڭگىمەنى وقىشى» دەيدى. جۇرەگىم سۋ ەتە قالدى. ويپىرماي، نەگە جازادى، نە قىلمىسىم بار دەپ، وقي باستادىم. ءوزى سالا قۇلاش ۇزاق ماقالا اڭگىمە ەكەن. سوندا دا بولسا باس الماي وتىرىپ، وقىپ شىقتىم. سويتسەم، ءابدىعالي دەيتىن ماسكۇنەم بىرەۋ جايىندا ەكەن. تەك اتىنىڭ ۇقساستىعى بولماسا، باس - قاسىنىڭ ءبارى دە مەنىڭ باسىمنان كەشكەن ۋاقيعالار ەمەس. بۇل قايتىپ مەن تۋرالى بولادى دەپ، ءبىراز ويلانىپ وتىردىم دا، بىلە قويدىم. بىرىنشىدەن، بۇل ماقالا وچەركتىڭ اۆتورى ب. سارسەنوۆ جولداس «ن. اۋدانىنىڭ ورتالىعىنا بارىپ تۇسە قالدىم، مەزگىل كوز بايلانىپ قالاعان كەشكى ۋاقىت ەدى» دەپ جازادى. مۇنداعى ونىڭ ن. دەپ، جاسىرىپ وتىرعانى ول، ءسوز جوق، ءبىزدىڭ نارىن اۋدانى. ويتكەنى ءبىزدىڭ وبلىستا ن. ارپىمەن باستالاتىن باسقا اۋدان اتىمەن جوق. ونى مەن رايسوۆەتكە بارىپ، انىقتاپ ءبىلدىم.
ن. اۋدانى ءبىزدىڭ نارىن اۋدانى بولعان سوڭ ونداعى ماسكۇنەم ءابدىعالي ول، ارينە، مەنمىن. مەنەن باسقا ءابدىعالي دەيتىن مۇندا ەشكىم دە جوق.
سودان سوڭ، اۆتوبۋس ءبىزدىڭ اۋدانعا الماتىدان ىلعي دا كۇندە كوز بايلانا كەلەدى. ولاي بولسا، سىزدەردىڭ جازىپ وتىرعان ءابدىعاليلارىڭىز مەنەن باسقا ەشكىم دە ەمەس.
قىمباتتى جولداس رەداكسيا، ادەبيەتتى مەكتەپتە ءبىز دە وقىعانبىز. ونىڭ قۋلىق -سۇمدىعىنىڭ ءبىرازىن جاقسى بىلەمىز. ءسىز ءبىزدى ەشتەڭە بىلمەيدى، سەزبەيدى ەكەن دەپ ويلاماڭىز. ولاي ويلاساڭىز قاتەلەسەسىز. جازۋشىلاردىڭ وتىرىكتى شىنداي، اقساقتى تىڭداي قىلىپ، ويدان قوسىپ، بولماعاندى بولعانداي ەتىپ جازاتىن ادەتى بار. Miنe، سىزدەر دە سويتىپسىزدەر. مەنىڭ ماسكۇنەم ەكەنىمدى وبراز قىلىپ الىپسىزدار دا، وعان نەشە ءتۇرلى وتىرىكتى قيسىندىرىپ قوسىپ جازىپسىزدار. مىنە، بۇل ءۇشىن مەن سىزدەرگە نارازىمىن. سىزدەر ويلايتىن شىعارسىزدار؛ بىزگە قالاي قيسىندىرىپ جازساق تا بولا بەرەدى. اۋىلداعى وقىماعان قارا جۇمىسشى حالىق وعان كونە بەرەدى دەپ. جوق، جولداس رەداكسيا، ولاي ويلاساڭىزدار سىزدەر قاتەلەسەسىزدەر. ماقالادا مەنىڭ اتىمدى وزگەرتپەي تۋرا اتاعاننان كەيىن ءبۇيتىپ وتىرىك قوسىپ جازۋعا سىزدەرگە كىم پراۆا بەردى؟ الدىمەن مىنە وسىعان جاۋاپ بەرىڭىزدەرشى؟
سودان سوڭ ەكىنشى ايتارىم، ماعان كەزدەسەتىن كوكەن دەگەن ادام ول كىم؟ Meن بۇنداي ادامدى بىلمەيمىن عوي. جوق الدە سىزدەر كودەكتى كوكەن دەپ بۇرمالاپ وتىرسىزدار ما؟ ەگەر ول كوكەن بولماي، كودەك بولاتىن بولسا، مەن ونىمەن بىرىگىپ اراق ىشپەك، تۇگىل، مىنە، ەكى جىلداي بولىپ قالدى بەتىنە تۋرا قاراپ سويلەمەيمىن دە. بۇرناعى جىلى جايلاۋدا جۇماعۇلدىڭ ۇيىندەگى تويدا توبەلەسىپ قالعالى بەرى ول ەكەۋمىز يت پەن مىسىقتاي ارازبىز. بۇنى، جولداس رەداكسيا، جۇرتتىڭ بارلىعى بىلەدى.
سودان سوڭ ءۇشىنشى ايتارىم، سىزدەر الگى ماقالا ءپىليتوندارىڭىزدا مەنىڭ ايەلىمنىڭ وبرازىن دا دۇرىس كورسەتپەپسىزدەر. ونىڭ اتى ءجاميلا بولسا سىزدەر كۇلبالا دەپ بۇرمالاپ جازىپسىزدار. قيىسسا، قيىسپاي قالسىن - اۋ! سودان سوڭ، ايەلىمنىڭ ءتۇر-تۇسىن، كيىمىن دە بۇرمالاپ جازىپسىزدار. قاشاننان بەرى ول سىريعان سارى كەلىنشەك بولا قالدى؟ قاتپا قارانىڭ ناعىز ءوزى ەمەس پە؟ ونىڭ ارىق ەكەنىنە دەيىن جازىپسىزدار. سىزدەردىڭ نە ماقساتپەن بۇلاي دەپ جازىپ وتىرعاندارىڭىزدى مەن بىلمەيمىن. ال بار عوي، رەداكسيا جولداس، تاپ وسىلارىڭىز ۇيات - اق. بىرەۋدىڭ ايەلى ارىق بىرەۋدىكى سەمىز. وندا سىزدەردىڭ نە شارۋالارىڭىز بار؟ نەمەنە، سوندا مەن ايەلىمدى تاماق بەرمەي اشتان قاتىرىپ ءجۇر دەمەكسىزدەر مە؟
سودان سوڭ... سودان سوڭ ءتىپتى ايتا بەرسەم، بۇل وچەركتەرىڭىزدىڭ ىشىندە باسقا دا وتىرىكتەرى تولىپ جاتىر. مەن ونىڭ ءبارىنىڭ استىن قىزىل قارىنداشپەن باتتيتىپ - باتتيتىپ سىزىپ قويدىم. ءتيىستى جەردىڭ الدىندا دالەلدەپ بەرەم. مىسالى، سىزدەر مەنىڭ پورترەتىمدى «ساتپاق - ساتپاق سارى كيتەل كيگەن» دەپ سۋرەتتەپسىزدەر. ءسويتىپ وبرازىمدى مۇلدە بۇزىپ جازىپسىزدار. بىرىنشىدەن، مەن وبرازىمدى بۇزاتىنداي جاۋ ەمەسپىن. نەمەسە باي -قۇلاقتىڭ تۇقىمى ەمەسپىن. سوۆەت ادامىمىن. ەكىنشىدەن، مەن ءومىرى كيتەل كيىپ كورگەن جوقپىن. كيتەل كيسەم تاماعىم قىسىلىپ، ءولىپ كەتە جازدايمىن.
سودان سوڭ، اراققا ايەلىن جۇمسايدى دەپ جازىپسىزدار. مەن اراققا ايەلىمدى جۇمسامايمىن. بالامدى جۇمسايمىن. ول جوق بولىپ قالسا، كورشىلەرىمنىڭ بالاسىن جۇمسايمىن.
ءبىراق، ءسوز اراسىندا ايتا كەتەيىن، ازىق-تۇلىك دۇكەنىنە جاڭادان ساتۋشى بولىپ كەلگەن كۇلسىم دەيتىن ايەل وقۋشى بالالارعا تەمەكى، اراق ساتپايتىن زاڭ شىعارىپتى. ول قانداي زاڭ؟ قايدا جازىلعان زاڭ؟ مەنىڭشە، سوۆەت ساۋداسى كىمگە بولسا دا ەركىن بولۋعا ءتيىس. جولداس رەداكسيا، ەگەر سىزدەرگە سىناپ جازۋعا ماتەريال كەرەك بولسا، مىنە وسىنى نەگە جازبايسىزدار؟
حاتىمنىڭ سوڭىندا، قىمباتتى جولداس رەداكسيا، تومەندە قول قويىپ، وسى ارىزدى جازا وتىرىپ، قوياتىن سۇراقتارىم بار.
ءبىرىنشى سۇراعىم: ماقالانى جازۋشى ب. سارسەنوۆ دەگەن كىم ءوزى ول؟ ءبىز بۇرىن اتىن ەستىمەگەن قانداي جازۋشى؟ ءبىزدىڭ اۋدانعا ول قاشان كەلىپتى؟ ەگەر مۇمكىن بولسا، سىزدەر بالشەيبەكتىك شىندىقتى سۇيەتىن بولساڭىزدار، سارسەنوۆكە مەن جونىندە ماتەريال بەرۋشىنىڭ كىم ەكەنىن دە ايتۋلارىڭىزدى وتىنەم.
ەكىنشى سۇراعىم، ءبىزدىڭ اۋداندا اراق ىشەتىن ادام تەك مەن عانا ما ەكەم؟ ەگەر جازۋشى سارسەنوۆ جولداس، بىرەۋدىڭ ايتۋىمەن جازباي، ءوزى كەلىپ، زەرتتەپ، ءبىلىپ جازعان بولسا وندا مەنەن باسقا ماسكۇنەمدەردى نەگە قوسىپ جازبايدى؟ رايفونىڭ بۋحگالتەر! يۆانوۆ ءبىر كۇن ساۋ جۇرمەيدى. اراقتى بوشكەلەپ ىشەدى. سونى نەگە جازبايسىزدار؟ زاگوتسكوتتاعى مالباعاروۆتى كەز كەلگەن كوشەنىڭ بۇرىشىندا توقتاتىپ الىپ، قالتاسىن ءتىنتىپ قاراڭىزدارشى. نە شىعار ەكەن؟ جارتىلىق، اراق پەن جۇدىرىقتاي پياز شىعا كەلمەسە، مەن مۇرنىمدى كەسىپ بەرەيىن. ۇيىقتاعاندا ول اراقتى جاستىعىنىڭ استىنا قويىپ، جاستانىپ جاتىپ ۇيىقتايدى. ونسىز كوزى ىلىنبەيدى. مىنە سىزدەرگە ماتەريال كەرەك بولسا! سارسەنوۆ جولداس بالشەيبەكتىك ءباسپاسوزدىڭ تۋراشىل وكىلى بولسا، اۋەلى وسىنى نەگە جازبايدى؟
قۇرمەتتى جولداس رەداكسيا، وسى ارىزىمدى اياقسىز قالدىرماي، تەز ارادا تەكسەرىپ، قورتىندى شىعارۋلارىڭىزدى سۇرايمىن. ول قورتىندىنىڭ ءبىر داناسىن مەنىڭ وزىمە جىبەرسەڭىزدەر ەكەن.
قول قويۋشى ءابدىعالي سالمەنوۆ
You Might Also Like
-
توركىنى جاقىن قىز دامىل تاپپايدى. ءوزىڭ تۇراتىن قالانىڭ تاپ ىرگەسىندەگى دەمالىس ۇيىنە تىنىعۋ سوعان ۇقسايدى ەكەن. قانشاما الاڭسىز بولامىن دەگەنىمەن بولا المايسىڭ، ەكى كۇننىڭ بىرىندە سارى پورتفەلدى س...
