InfoHub Logo

ءوزىنىڭ شىعارماشىلىق شەبەرلىگىمەن تەرەڭدەي تانىسۋىما „ولگەندەر قايتىپ كەلمەيدى” ەڭبەگى ارقىلى كوزگە كورىنبەس كوپىر بولا بىلگەن  بەردىبەك سوقپاقبايەۆ مۇراسى ادەبيەت مايدانىنان ويىپ تۇرىپ ورىن العانى كىتاپسۇيەر قاۋىمعا دالەلدى دۇنيە. وسىناۋ كولەمدى رومان - ادام ءومىرىنىڭ وزگەرىسسىز تۇستارىن كوز الدىڭا كەلتىرىپ قانا قويماي، كوكەيىڭە توقىپ، ساناڭا ءتۇيىپ الار استارلى اقيقاتتى اسەرلى اڭگىمەلەي بىلۋىمەن دە باعالى.

شىعارما مازمۇنىنا قىسقاشا توقتالسام، ءۇش بولىمنەن تۇراتىن اتالمىش تۋىندى سوعىس جىلدارىمەن بەتپە-بەت كەلگەن ۇرپاقتىڭ ار مەن ازاپتى، مۇڭ مەن مازاقتى، بەيمازا تىرلىك پەن توزىعى شىققان، بىرلىگى تۇرالاعان تۇرمىس- تىرشىلىگىن بايانداۋدى ماقسات ەتەدى. سوقپاقبايەۆ ءوز قالامىنىڭ قارىمىن بۇل جولى دا جيناقى، باس-اياعى ءبىرىڭعاي ومىرشەڭ پروتوتيپ تاراپىنان باياندالاتىن ءبۇتىن ءبىر تاريحي كەزەڭ كورىنىسىن كوز الدىڭا كەلتىرۋگە جۇمساعان.

ءبىرىنشى بولىمدە ون التى جاسار ەركىن اتتى بوزبالانىڭ اناسى مەن اعاسىنىڭ، اسا مەيىرلى جەڭگەسىنىڭ جانىندا جاستىق داۋرەنىنىڭ جايما-شۋاق كۇندەرىنىڭ زۇلماتتى سوعىس كەزەڭىنە تاپ كەلىپ، مايدان دۇربەلەڭى مورالدىق ماسەلەلەردى قوزعاپ، كۇردەلى پروسەستەرگە ۇلاسۋىن بەينەلەيدى. كۇتپەگەن كۇيزەلىستى جىلدار-ادامداردى اجىراتتى، تاعدىرلاردى تۇبەگەيلى بۇزىپ، بارلىق ارمان-ماقساتتىڭ كۇل تالقانىن شىعاردى. بۇل تالقاندالۋدىڭ ىشىندە ەركىننىڭ تاۋداي ارمانى، تالاپتى تۇجىرىمدارى دا تاسالانىپ، ادەبيەتكە دەگەن – ادەمىلىككە دەگەن ۇمتىلىسى ۇلتتىق قاڭعىرۋدا قيراتىلىپ تاستالدى.

ەكىنشى، جانە ءۇشىنشى ءبولىم – كەيىپكەردىڭ جەكە ءومىرىنىڭ باسپالداقتارىن بۇرىنعىنى قايتا قاراۋ، سوعىستان كەيىنگى قايتا قالپىنا كەلتىرۋ قۇبىلىسى نەگىزىندە، جاڭاشا تۇسىنىك، سەزىم، ساتقىندىق، نامىس، جاڭاشىلدىق، پەندەشىلىك سىندى ءبىرىن-بىرى الماستىرىپ كەلەتىن ادامي اسپەكتىلەردى اشىپ كورسەتىپ، ادامدار اراسىنداعى قارىم-قاتىناستىڭ قالتارىستى تۇستارىن  تۇگەلدەي ءتۇيسىنۋدى ۇسىنادى.

سوڭعى جاعىندا جاستايىنان تۋعاندارىنان اجىراپ، جاۋىزدىق پەن جەك كورىنىشتى قاتار سەزىنىپ، ءومىردىڭ اق-قاراسىن ەرتە اجىراتا بىلگەن ەركىننىڭ شىعارماشىلىققا بەيىم بەينەسىنىڭ جازۋشىلىققا اياق باسۋى – ويى سەرگەك وقىرماندار ءۇشىن سەنىمدى ءسات.

ءدال وسى شىعارمانى وقۋ بارىسىندا، ءار زامان ادامدارىنىڭ باستان كەشكەن ءومىرى- تەك سول زامانا پسيحولوگياسىن سۋرەتتەيتىنى، ءار ادامنىڭ – بالالىق شاعىنىڭ دا ومىرلىك دەڭگەيدە ۇلكەن اسەرى بولۋى سول كەزەڭنىڭ سانادا ساقتالعان سالماعىن ءوشىرىپ، نەمەسە بىردەن جويىپ جىبەرە المايتىنىن ءتۇيسىندىم. بۇل رومان – قازاق سالتى مەن ساناسىن ۋلاعان جىلداردىڭ تراگەديالىق تۋىندىسى، ونى وقۋ- تاريحي كەزەڭدى ءتۇيسىنۋ، بابالار اماناتىن- ايالاۋ، باتىرلار ەرلىگىن- دارىپتەۋ، حالقىنا ادال قىزمەت قىلعان قايراتكەرلەرىمىزدى دارىپتەۋ ماقساتىن مەجەلەگەن. جانە ءاربىر قازاق مەنتاليتەتىن قۇرمەتتەيتىن تۇتىنۋشىلار ءۇشىن- ۇرپاق تاربيەسىنىڭ، ادامي قۇندىلىقتار قاعيداتىنىڭ رۋحتى قۇرالى!

---