InfoHub Logo

بايمەننىڭ شارشى توپتا ساپاق سياقتى توبە ءبيدى كوپتىڭ الدىندا سوگىپتى دەگەن ءسوز بار. ونىڭ ءمانىسى: بايمەن ءبىر توپ ادامدارىمەن جولاۋشىلاپ كەلە جاتىپ الدىنان اتىلعان مىلتىقتىڭ داۋىسىن ەسىتەدى. تەزىرەك ءجۇرىپ كەلسە ساپاق اۋىلىنىڭ ءبىر مەرگەنى كيىكتى اتىپ الىپ وتىرادى. بايمەندەر كەلۋىنە مەرگەن جىگىت كيىكتى بۇلاردىڭ قانجىعاسىنا بايلايدى. بايمەن:

— كيىگىڭ ارام، استىڭا باسىپ جاتىرسىڭ. ارام كيىگىڭدى ساپاققا اپارىپ بەر، سول جەسىن، — دەپ ىلگەرى ءجۇرىپ كەتەدى. مەرگەن جىگىت كيىكتى ساپاققا بەرىپ جاتىپ بايمەننىڭ ءسوزىن بيگە ايتادى. ساپاق مىرس ەتىپ كۇلىپ جىبەرەدى. اراداعى وسەكشىلەر بايمەنگە: «ساپاق سەنىڭ قىزىڭدى بالاعاتتاپتى» دەپ جەتكىزەدى. بايمەننىڭ كوپتىڭ الدىندا ساپاقتى سوگۋىنىڭ سەبەبى وسى ەكەن. وسەكشىنىڭ كەسىرىنەن اتاقتى ەكى بي وسىلايشا وكپەلەسىپ تاراسادى.

ارادا بىر-ەكى جىل ءوتىپ قۇلدىقتان بايمەن جەڭىلىپ حان قاسىنان سىرعا كوشىپ كەلە جاتقانىن ساپاق ەستىپ وتىر ەدى. تۇنىمەن كوشكەن كوش ساسكەلەتە بەلگىلى ءبىر قۇدىققا كەلىپ كولىكتەرىن تىنىقتىرىپ الۋ ءۇشىن توقتاسا، قۇدىقتىڭ باسىندا تۇيە سۋعارىپ ۇلكەن ءبىر قاريا تۇرادى. وعان بايمەن سىرتىنان كەلىپ سالەم بەرسە، قارياسى ساپاق بولىپ شىعادى. بايمەن بۇرىلىپ كەتە الماي، ساپاققا جاقىنداي ءتۇسىپ:

— اسسالامۋماعالەيكۋم، ساپەكە!، — دەيدى. كوزىن الاقانىمەن كولەگەيلەپ بايمەن ەكەنىن انىقتاپ الىپ ساپاق:

— ۋاعالەيكۋم ۋاسسالام!
بايمەن بي كوشتىڭ بە سىرعا سيىرىڭمەن،
باقشاقتان قۇلدىق شىقتى ما بۇيىرىڭنەن.
قورادا قاسقىر سوققان قارا ايعىر ەدىڭ-اۋ،
كەشە تۇستە دونەن قۋىپ شىقتى ما ۇيىرىڭنەن.
اقىرى زيان تاۋىپ جەر اۋدىڭ با،
تاكاپپار مىنەزىڭنىڭ سۇيىرىنەن.
قانشا مىقتى بولساڭ دا وسى سوققى،
ءوتىپ كەتكەن شىعار-اۋ سۇيەگىڭنەن! —
دەيدى. سوندا بايمەن اتىن باۋىرعا وسىپ-وسىپ جىبەرىپ:

— سۋ ىشپەسەڭ، ۋ ءىش! كەشە تۇستە قۇلدىقتان وق ءتيىپ وماقاسسام، بۇگىن سەنى سۋارامىن دەپ ساپاقتىڭ اجال وعىنا تاپ بولدىم. ەندى مەنىڭ دە ءومىرىم ۇزاققا بارماس، — دەپ، سىرعا كوشىمەن جۇرە بەرىپتى.

---