شىققالى ۆولوست سايلاۋ قىرىق جىل ءوتتى،
سول سايلاۋ، بايقاساڭىز، تۇپكە جەتتى.
باي بولىپ، مىرزا اتانىپ، مال بىتكەندەر،
تالاسىپ ۆولوستىققا اقشا توكتى.
ەلىرىپ بىرەۋ شىقتى بي بولام دەپ،
كەيبىرى بي تۇسەتىن ءۇي بولام دەپ.
جەلىكپەي ۇشىنشىلەر نەگە تۇرسىن:
«قالايشا انالاردان مەن قالام دەپ.
ەلىرتەر مومىنداردى «سەن دە اتتان» دەپ
«مالىڭنىڭ ارقاسىندا ءبىر شاتتان» دەپ.
قاراشى، بۇل قىرسىققا نەقىلارسىڭ،
بيشارا اۋرەلەنەر قۇر جاتقان تەك.
فالەنشە اۋىلنايلىققا ىلايىق دەپ
ىنتىماق يە قىلسا دا قىلايىق دەپ.
ءبىر سوردى بايگە اتىنداي الىپ كەلەر
ءھاممامىز سەرتتە ماحكام تۇرايىق دەپ،
«ءبىر اتادان قالدىم» دەپ شىعار بىرەۋ:
«سىزدەرمەنەن بىرگە - دەپ، - ءبىزدىڭ تىلەۋ».
جولىن السا، ءماز بولىپ ول كەتەدى،
بەرمەسە، قامىققانداي كوڭىلى جۇدەۋ.
سايلاۋ باسى تورەگە مشش، مىن. اقشا
«جانىندا ورىن جوق پا ەكەن ونان باسقا؟»،
ستراجنيك پەن پيسىرلەر ءسۇيىنشى الادى
بەرمەي تاعى بولمايدى ءھام ءتىلماشقا.
ۆولوست بولار مال شاشىپ شىعىندانىپ،
سايلاۋ وتەر وسىلاي تىنىمدانىپ.
ابدەن بولىپ العان سوڭ راسحودىڭ،
بىتىرەدى حالىقتان جىلىن دا الىپ.
كەدەي سورلى شولاعىن ارىقتاتار،
تۇك فايدا جوق، ۇيىنە بارىپ جاتار.
«فالەنشەمەن تاباقتاس بولدىم مەن» دەپ،
قاتىنىنا ماقتانىپ وسىنى ايتار.
مۇنىمەن مال شاشىلىپ ار كەتەدى،
كۇشتى السىرەپ، ناشاردان ءحال كەتەدى.
وتىرىكتى راسقا شىعارام دەپ
جالعان ىسكە انت بەرىپ جان كەتەدى.
ناحاقتان بىرىنە-بىرى بالە سالىپ،
بىلمەسە ۇرلىق، بىلسە ەگەر بارىمتا الىپ.
توبەلەس، جانجال، كەرىس اڭگىمەگە
قۇمار-اق بولىپ كەتتى ءبىزدىڭ حالىق.
تۇرادى تورەلەرى كەكىرەيىپ،
پەريەۆودچيك ونان جامان شەكىرەيىپ.
كوپ زارار ءبىزدىڭ قازاق كورسەداعى
دەمەيدى، مۇنداي ىشتەن بەكىنەيىك.
مال شاشىپ الەكتەنىپ تالاسادى،
«مەن كوپ، سەن ازسىڭ» دەپ ساناسادى.
ەس كەتىپ ءولىپ تالىپ ۆولوست بولىپ،
سونان سوڭ حالقىمەنەن جاراسادى.
ۇيىنە ات-تونىمەن بارىپ ءتۇسىپ،
ريزالىق ايتىسار تاعام جەسىپ.
مىسالى توقىلداقتىڭ تاۋبەسىندەي
كەتەدى ءبىر جىلدان سوڭ ۇمىتىسىپ.
قۇل كەتتى حان ورنىنا تاققا ءمىنىپ،
جۇرت كەتتى جاماندىقتى جاتقا ءبىلىپ.
ھاكيملەر حاراميدان بولعاننان سوڭ،
ۇرى-قارى كەتپەي ءقايتسىن اتقا ءمىنىپ.
يا ءپىرىم-اۋ، ءدال اسى ىستەن نە فايدا بار؟
كوبەيەر كۇن-كۇن سايىن ءفىتنالار.
كوز كوردى ءبىر پاراسىن قۋلاق ەستىپ،
كىسى ءولىپ، سوتتى بولىپ ءبىرى ايدالار.
اعادان ءىنى ايرىلدى، اتادان ۇل،
اعايىن ارزاندادى قىمباتتاپ پۇل.
ساتىلدى عازيز ۇجدان از اقشاعا
ءعالاماتى ناداندىقتىڭ ەمەس پە بۇل؟
وزىنە ءوزى حالىق جانى اشىماي
مال شاشار بولامىن دەپ ۆولوستنوي.
جۇمساسا قانداي جاقسى بولار ەدى،
نا پولزۋ وبرازوۆانيا نارودنوي.
بەرۋدەن كەزدەي جەرگە كولدەي اقشا
قۇمارى كەلە جاتىر ءبىر باسىلماي.
كىسىدەي اراق ىشكەن اۋرەلەنىپ،
يا ءپىرىم-اۋ، كەتكەنى مە حالىق وسىلاي؟
قازاعىم، بۇل عادەتتى تاستالىق تا،
حالىقتى تۋرا جولعا باستالىقتا.
ۆولوست، بيلىك، اۋىلنايلىق، ۆىبورنىيلىق،
قيمايتۇعىن سونشاما پاديشاھلىق پا؟

---