InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتى – قازاقستانداعى كوپسالالى ءبىلىم بەرەتىن الدىڭعى قاتارلى وقۋ ورنى. العاشىندا قازاق مەملەكەتتىك ۋنيۆەرسيتەتى دەپ اتالدى. ول ركفسر حالىق اعارتۋ كوميسسارياتىنىڭ شەشىمىمەن 1934 جىلدىڭ 1 قاڭتارىندا قۇرىلدى.

قازاق ۇلتتىق ۋنيۆەرسيتەتى ءوزىنىڭ نەگىزىن  قالانعاننان باستاپ قازاقستانداعى ءبىلىم بەرۋ جۇيەسىنىڭ بەتكە ۇستار كوركى، ۋنيۆەرسيتەتتىك داستۇرلەردىڭ، كاسىبي بىلىكتى عىلىمي جانە پەداگوگيكالىق مەكتەپتەردىڭ باستاۋ - كوزى بولدى. ءال-فارابي اتىنداعى قازاق ۇلتتىق ۋنيۆەرسيتەتى الەمدىك ستاندارتتارعا ساي، ەلىمىزدەگى، ءتىپتى ورتا ازيا كەڭىستىگىندەگى ەڭ ءىرى ءارى قۋاتتى وقۋ ورنى بولىپ تابىلادى. سونىمەن بىرگە جىل سايىن وتكىزىلەتىن  QS World University Rankings رەيتىنگى بويىنشا تمد مەملەكەتتەرى ىشىنەن تەك م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنە جول بەرىپ، بيىلعى وقۋ جىلىندا 165 ورىنعا جايعاسىپ، الەمدىك ەڭ مىقتى 200 ۋنيۆەرسيتەتتىڭ قاتارىنا كىردى.

قازۇۋ عىلىمي ينفراقۇرىلىمىنىڭ نەگىزى – رەسپۋبليكاداعى ىرگەلى زەرتتەۋ باعدارلامالارى جالپى مولشەرىنىڭ 50% جۇرگىزىلەتىن 20 عىلىمي-زەرتتەۋ ينستيتۋتى مەن حالىقارالىق عىلىمي ورتالىق. ۋنيۆەرسيتەت جانىندا سونىمەن قاتار كوللەدج، بىلىكتىلىكتى كوتەرۋ ينستيتۋتى جانە تۇلەكتەرى قوسىمشا اسكەري ماماندىق الىپ شىعىپ، ق ر قارۋلى كۇشتەرى قاتارىندا، ىشكى ىستەر جانە ۇلتتىق قاۋىپسىزدىك ورگاندارىندا، كەدەن قىزمەتى مەكەمەلەرىندە قىزمەت ەتۋگە مۇمكىندىك بەرەتىن اسكەري كافەدرا جۇمىس ىستەيدى.

قازۇۋ 400-دەن استام شەتەلدىك ۋنيۆەرسيتەتتەرمەن ىنتىماقتاستىق تۋرالى كەلىسىم جاساعان. وسى نەگىزدە ماگيسترانت، دوكتورانتتارعا ەكى ادامنىڭ جەتەكشىلىك ەتۋ تاجىريبەسى كەڭىنەن ورىستەپ وتىر. ءبىر عىلىمي جەتەكشى قازاقستاننان بولسا، ەكىنشىسى – شەتەل جوو-داعى بەلگىلى عالىم. وسىنىڭ ءبارى دە قازۇۋ ستۋدەنتتەرى ءۇشىن حالىقارالىق دەڭگەيدە وقىپ، زەرتتەۋلەر جۇرگىزۋگە لايىقتى جول اشادى.

سونىمەن قاتار ۋنيۆەرسيتەت الەمدىك جەتەكشى ۋنيۆەرسيتەتتەرمەن قارىم-قاتىناس جاساي وتىرىپ، جىل سايىن ستۋدەنتتەرگە، جالپى ءبىلىم الۋشىلارعا شەت ەلدە ساپالى ءبىلىم الۋ ءۇشىن ءتيىمدى جاعدايلار جاساپ وتىر. جىل سايىن  تاجىريبيەدەن ءوتۋ سىندى شارالاردى دا ىسكە اسىرادى. بۇدان بولەك وقۋ ورنىندا قازاقستان تاريحىندا العاش رەت قوس ديپلومدى باعدارلاما بويىنشا جۇمىس جاساۋ مۇمكىندىگى قاراستىرىلدى. ياعني، ماگيستراتۋرادا ءبىلىم الۋشىلار وقۋدىڭ ءبىر جىلىن قازاقستاندا، ءبىر جىلىن شەت ەلدىك ۋنيۆەرسيتەتتە وقىپ، ەكى وقۋ ورنىنان دا ديپلوم الۋ مۇمكىندىگى جاسالعان.

ۋنيۆەرسيتەت ءبىلىم الۋشى تۇلعانىڭ جان-جاقتى دامۋىنا، ءوزىن-وزى كەمەلدەندىرۋىنە قاجەتتى جاعداي جاساۋ ءۇشىن بار كۇش-جىگەرىن سالىپ، ستۋدەنتتىڭ ءوزىن-وزى باسقارۋعا، كوشباسشىلىق قاسيەتتەردى تاربيەلەۋگە مول مۇمكىندىكتەر تۋدىرۋدا. 

ءال-فارابي اتىنداعى قازاق ۇلتتىق ۋنيۆەرسيتەتى، تاريح، ارحەولوگيا جانە ەتنولوگيا فاكۋلتەتىنىڭ 1 كۋرس ماگيسترانتى بايبۋكاشيەۆا ايدانا

---