ءشىل
ءشىل ورمانداعى قۇستاردىڭ ەڭ ۇساعىنىڭ ءبىرى. كىشكەنتاي عانا قوڭىر جاعال بالاپاندارىن ەرتىپ، قالىڭ ءشوپتىڭ اراسىندا كۇن ۇزاق شىبىن قۋۋمەن جۇرەدى. بالاپاندار شيقىلداپ، دىمقىل كوگالعا سۇڭگي جۇگىرىپ، دامىل كورمەيدى. بىتىراپ بارا جاتسا، انا ءشىل قوڭىر ايدارىن سىلكىپ، قورىلداپ دىبىس بەرەدى. ونىسى — بايقا، ءقاۋىپ بار دەگەنى.
يە، ءقاۋىپ دەگەنىڭىز اياق استىندا. وتە كوپ. ءشىلدىڭ قوڭىر بالاپاندارىنا ساۋىسقان دا قۇمار. ءشىل قايدا جايىلسا، ول دا سول ماڭايدا جۇرەدى. ورمان ۇرىسى الا قارعا دا اركەز نازارىن سالادى. قارشىعا مەن قىرعيى تاعى بار. بارلىعىنىڭ اينالدىراتىنى ءشىل. بالاپاندارىنىڭ بەيقامدىعى، باعۋسىز كەزى. قاپىلىستا ءىلىپ كەتسە، اراشالاۋعا شىلدە دارمەن جوق. ساقتىق ءۇشىن انا ءشىل بالاپاندارىن قاناتتانعانشا ورمان اراسىنداعى كوگال ىشىنەن شىعارمايدى.
كوگال — قاناتتىلاردان قورعاعانىمەن، اياقتىلاردان قورعاي المايدى. ورمان كەزگەن قۋ تۇلكىنىڭ مۇرنى سەزبەيتىن ءيىس جوق. جاۋىنىڭ جاقىنداپ قالعانىن مەكيەن ءشىل بىردەن سەزەدى دە بالاپاندارىن جاسىرىپ، ءوزى تۇلكىنىڭ الدىنا كولدەنەڭدەي قالادى. قاناتى سىنعان جارالى قۇس بولىپ كورىنەدى دە، تۇلكىنى سوڭىنان ەرتىپ، اۋلاققا الىپ كەتەدى. مۇندايدا ول قاۋىپتەن قورىقپاي، جاۋىنىڭ الدىندا تاياق تاستام جەردە جورعالاپ بارا جاتادى. تۇلكىنى ۇزاتىپ سالىپ، ءشىل ۇشا جونەلەدى. الدانىپ قالعان قۋ اڭىرىپ از تۇرادى دا، جونىنە كەتە بارادى.
ءشىل بالاپاندارىن ەرتىپ، داعدىلى تىرلىگىنە كىرىسىپ ەدى. قانات سۋىلىن ەستىپ، بۇعا قويدى. سەمسەردەي جارقىلداعان سۇر قارشىعا جايقاپ ءوتتى. ەكىنشى رەت زۋلاپ ۇشتى. الگىندە جوسىپ جۇرگەن كوپ بالاپان جەر جۇتقانداي جوق بولدى. قارشىعا اينالىپ كەلىپ، كولدەنەڭ بۇتاققا قونىپ وتىردى. ەڭ قىراعى دەگەن جىرتقىشتىڭ ءوزى اڭعارار ەمەس. بالاپاندار بولسا قول سوزىم جەردە عانا، ءشوپ اراسىندا بۇعىپ جاتقان. قوزعالسا باس سالۋعa اڭدىپ قارشىعا وتىر. مەكيەن ءشىل تارعىل قاۋىرسىندارىن كىرپىدەي تىكىرەيتىپ سونشالىق قاھارلى داۋىسپەن شاڭق ەتتى دە كوزدەرى وت بولىپ جانعان قاتەرلى جاۋىنا اتىلدى. اتىلعان بەتتە قارشىعانى توپشىمەن سوعىپ ءوتتى. انا ءشىلدىڭ قايراتىنا شىداماي، سۇر جىرتقىش بيىك قايىڭداردىڭ توبەسىنەن اسىپ جوعالدى. ءشىل بايعۇس جەرگە قۇلاپ ءتۇستى دە، توپشىلارى قالتىراپ كوپ جاتتى. سونان سوڭ ەسىن جيىپ، بالاپاندارىن شاقىرا باستادى.
قام-قارەكەتى كوپ جاز دا ءبىتىپ، سالقىن كۇز كەلدى. ورمان جاپىراقتارى ءتۇسىپ، جۇتاپ قالدى. جىل قۇستارى جىلى جاققا قايتا باستادى. ءشىل عانا بالاپاندارىمەن تۋعان جەردە قالدى.
You Might Also Like
-
ەرمەك پەن ەلدوس اۋلاعا شىقتى. وقۋدان كەلگەن بەتتەرى. ەكەۋى نەدەن باستاۋدى ويلاپ وتىر. بيدايلى دالانى قاق جارعان ۇلكەن جولدىڭ بويى ەرسىلى-قارسىلى جۇيتكىگەن ماشينالار. كوشەنى بويلاپ ۇلكەن جۇك ماشينا ...
-
جاكىش اياعىن ىقىلاسسىزداۋ باسىپ كەلەدى. وسىلاي قاراي جۇرسە، بەتىنەن وتى شىعادى. قۇلاعى قىپ-قىزىل بولىپ كەتەدى. اۋلاعا كىرە بەرىپ، موينىن سوزىپ قوراعا قارادى. رىسباي اتاي ءشوپ ءۇيىپ جاتىر ەكەن، جانىنا ...
