سىزىقتى قىسقارتۋ
ءمۇعالىم سىنىپتاعى زەرەك، ءبىراق سونىمەن قاتار ءىشىتار وقۋشىدان: «سەن نەگە دوستارىڭا كورە الماۋشىلىق ەتەسىڭ، ولاردىڭ جاساعاندارىن بۇزىپ، توبەلەسەسىڭ دە جۇرەسىڭ؟» دەپ سۇرايدى. وقۋشى: «ويتكەنى ولاردىڭ مەنەن وزىپ كەتۋىن قالامايمىن. مەن عانا ۇزدىك، مەنىڭ جاساعاندارىم عانا ەڭ جاقسى بولعانىن قالايمىن» دەيدى. ءمۇعالىم ءسال ويلاندى دا، ورنىنان تۇرىپ، تاقتاعا ءبىر سىزىق سىزادى. الگى وقۋشىسىنا قاراپ: «مىنا سىزىقتى قالاي قىسقارتۋعا بولادى؟» دەپ سۇرايدى. وقۋشى ورنىنان اتىپ تۇرىپ: «سىزىقتىڭ جارتىسىن ءوشىرىپ تاستايمىن» دەپ جاۋاپ بەرەدى. ءمۇعالىم بۇل جاۋاپتى قابىل ەتپەيدى. وقۋشى ءبىراز ويلانىپ، سىزىقتىڭ ءبىر بولىگىن قولىمەن جاۋىپ: «مىنە قىسقاردى» دەدى. بۇل جاۋاپ تا قاتە بولاتىن. دۇرىس جاۋاپ الا المايتىندىعىن تۇسىنگەن ءمۇعالىم تاقتاعا اۋەلگىدەن دە ۇزىنىراق سىزىق سىزىپ: «ەندى قالاي بولدى؟» دەپ سۇرايدى. باسى سالبىراعان وقۋشى: «ەندى قىسقاردى» دەپ جاۋاپ بەردى. «بىلىكتىلىگىڭ مەن قابىلەتىڭدى ارتتىرىپ، ءوز سىزىعىڭدى ۇزارتۋىڭ، قارسىلاسىڭنىڭ سىزىعىن قىسقارتۋعا تىرىسۋدان الدە قايدا جاقسى» دەپ وقۋشىسىنا ءومىردىڭ بارلىق كەزەڭىندە كادەگە جارايتىن تاربيەلىك ساباق بەردى.
You Might Also Like
-
اۋە ساپارلارىنىڭ تىرشىلىگىمىزگە قوساتىن بولىمدى اسەرلەرىمەن قاتار كەيدە بولىمسىز اسەرلەرى دە كەزدەسىپ جاتادى. سولاردىڭ ءبىرى قۇلاق مازاسىزدىعى. اسىرەسە ۇشاقتىڭ قونۋى كەزىندە قۇلاق ىشىندەگى قىسىم وزگ...
