سوڭعى قوڭىراۋ مەن اتتەستات تابىستاۋ شارالارى مەكتەپتە وتەدى

سوڭعى جاڭارتۋ

(وزگەرتىلگەن ۋاقىتى 2 اپتا بۇرىن)

15 ءساۋ. 2022 00:00
233

سوڭعى قوڭىراۋ مەن اتتەستات تابىستاۋ شارالارى مەكتەپتە وتەدى – ق ر بعم

ءبىلىم جانە عىلىم ءبىرىنشى ۆيسە-مينيسترى شولپان قارينوۆا سوڭعى قوڭىراۋ مەن اتتەستات تابىستاۋ شارالارى قالاي وتەتىنىن ءتۇسىندىردى.

«وقۋ جىلىنىڭ اياقتالۋى بويىنشا ءداستۇرلى تۇردە ەكى شارا وتكىزىلەدى، ولار – 25 مامىرداعى سوڭعى قوڭىراۋ جانە 11-سىنىپتىڭ قورىتىندى اتتەستاتتاۋىنان كەيىن جالپى ورتا ءبىلىم تۋرالى اتتەستاتتى سالتاناتتى تاپسىرۋ. ولار بارلىق وتكەن جىلدار سەكىلدى قاجەتتى مەرزىمدە وتەدى. بيىل سوڭعى قوڭىراۋ 25 مامىردا بولادى. ءار مەكتەپ بۇل شارانى ءوز قالاۋىنشا ۇيىمداستىرادى. سالتاناتتى اتتەستات تاپسىرۋ دا – بالالاردىڭ ومىرىندەگى العاشقى ماڭىزدى قۇجات الۋى، سوندىقتان بۇل شارا دا وتكىزىلەدى جانە وعان ءبىلىم بەرۋ ۇيىمى جاۋاپتى بولادى»، - دەدى ش. قارينوۆا سەناتتىڭ جالپى وتىرىسىنان كەيىن تىلشىلەرگە بەرگەن سۇحباتىندا.

ونىڭ ايتۋىنشا، ءبىلىم مينيسترلىگى مەكتەپ ءبىتىرۋ كەشىن وتكىزۋ تۋرالى ۇسىنىمدار ازىرلەپ جاتىر.

«مينيسترلىك وسىنداي ۇسىنىمدار ازىرلەپ جاتىر. وقۋ جىلىنىڭ اياقتالۋىنا ءالى ءبىر جارىم اي بار. ءبىز بۇل ۇسىنىمداردى دايىندايمىز، ارىپتەستەرىمىز بەن ب ا ق حاباردار بولاتىنداي جاريالايمىز. بۇل جاڭادان پايدا بولعان شارا ەمەس، جىل سايىن ءوتىپ كەلە جاتىر. وتكەن جىلدارى كارانتيندىك شەكتەۋ قاعيدالارى بولدى. ال بيىل اتتەستاتتى سالتاناتتى تاپسىرۋ مەكتەپ قابىرعاسىندا مىندەتتى تۇردە وتەدى. باسقا دا ۇسىنىمداردى تىزەمىز جانە جاريالايمىز»، - دەدى شولپان قارينوۆا.