تاۋەلسىزدىگىمىزدىڭ بەرگەن جەتىستىكتەرى
بيىل قازاقستان رەسپۋبليكاسىنىڭ تاۋەلسىزدىگىنە 29 جىل تولعالى وتىر. تاۋەلسىزدىكتىڭ ەلىمىزگە وڭايلىقپەن كەلمەگەنى بارىمىزگە ايان. تاۋەلسىزدىك جولىنداعى كۇرەستەردىڭ ءبىرى دە بىرەگەيى 1986 جىلعى جەلتوقسان كوتەرىلىسى. وسى ورايدا ءبىز اعا-اپكەلەرىمىزدىڭ ەلىم ءۇشىن دەپ سوققان جۇرەكتەرى مەن ەرلىكتەرىن ەشقاشان دا ۇمىتپاۋىمىز قاجەت. قازاق جاستارى بيلىك باسشىلارىنىڭ شەشىمىمەن كەلىسپەگەندىكتەن نارازىلىق ءبىلدىردى، قازاقستانداعى بيلىكتى قازاق باسقارۋى كەرەك دەپ كەڭەستىك بيلىككە اشىق قارسى شىقتى. الاڭدى ءوز قاندارىمەن جۋعان جانداردىڭ جانقيارلىق ەرلىگى ارقاسىندا جاۋجۇرەك باتىر ۇرپاعى ەكەنىمىزدى دالەلدەپ، بوستاندىقتا ءومىر ءسۇرۋ باقىتىنا يە بولدىق.
وسىلايشا كوپتەن كۇتتىرگەن تاۋەلسىزدىككە قولىمىز تەك حح عاسىردىڭ سوڭىندا عانا جەتتى. 1991 جىلى ەلىمىزدىڭ باسشىسى قازاقستان رەسپۋبليكاسىنىڭ تۇڭعىش پرەزيدەنتى بولىپ نۇرسۇلتان نازاربايەۆ سايلانىپ، ەلىمىزدىڭ شىنايى تاريحىنىڭ اقتاڭداق بەتتەرى اشىلدى، ەگەمەن ەل ازاماتتارىنىڭ قۇقىقتارىن ، مەملەكەت زاڭدارىن انىقتايتىن كونستيتۋسيا قابىلداندى. الەم ەلدەرى تىزىمىندە جاڭا مەملەكەتتىڭ اتى جازىلدى. قانشاما جىلدار بويىنا تاۋەلسىزدىكتى ارمانداپ كەلگەن اتا-بابالارىمىزدىڭ اسقاق ارمانى ورىندالدى.
وسى 29 جىلدىڭ ىشىندە قازاق ەلى كوپتەگەن جەتىستىكەرگە جەتتى. سولاردىڭ ىشىندە سوڭعى ون جىلدىقتى الىپ قارايتىن بولساق، تاريحىمىزدا كەلەسىدەي باستى جەتىستىكتەر ورىن العان ەكەن:
2010 جىلى قازاقستان ەۋروپانىڭ قاۋىپسىزدىك جانە ىنتىماقتاستىق ۇيىمىنا ءتوراعالىق ەتە باستادى. وسى جىلدىڭ جەلتوقسان ايىندا قازاقستاندا سامميت وتكىزىلدى.
2011 جىلى قازاقستاندا العاش رەت قىسقى ازيا ويىندارى ءوتتى. قازاقستاننىڭ نامىسىن قورعاعان سپورتشىلار 70 مەدال يەلەندى. ولاردىڭ 32ء-سى — التىن، 21ء-ى — كۇمىس جانە 18ء-ى — قولا.
2012 جىلدىڭ 22 قاراشاسىندا قازاقستان 2017 جىلى ەلدە الەمدىك كورمە وتكىزۋ قۇقىعىنا يە بولدى. حالىقارالىق كورمە بيۋروسى مۇشەلەرىنىڭ قاتىسۋىمەن استانا 103 داۋىس جينادى.
2013 جىل تۇڭعىش پرەزيدەنت جاريالاعان «2050 ستراتەگياسى - قالىپتاسقان مەملەكەتتىڭ جاڭا ساياسي باعىتى» اتتى جولداۋ بويىنشا جۇمىستاردىڭ قولعا الىنۋىمەن ەرەكشەلەندى. سونىمەن قاتار وسى جىلى قازاقستان تاريحىندا تۇڭعىش رەت جەرگىلىكتى بيلىك ورگاندارى باسشىلارىنىڭ سايلاۋى ءوتتى.
2014 جىلدىڭ تامىز ايىندا ۇكىمەتتە قايتا قۇرۋ جۇمىستارى ءوتتى: 17 مينيسترلىك پەن 9 اگەنتتىكتىڭ ورنىنا ەلدە 12 مينيسترلىك جانە شامامەن 30 كوميتەت قۇرىلدى. قارجى پوليسياسىنىڭ قىزمەتى مەملەكەتتىك قىزمەت جانە جەمقورلىققا قارسى كۇرەس ىستەرى جونىندەگى اگەنتتىككە بەرىلدى. بۇدان وزگە ەنەرگەتيكا، مادەنيەت جانە سپورت، ينۆەستيسيالار جانە دامۋ، ۇلتتىق ەكونوميكا مينيسترلىكتەرى قۇرىلدى.
2015 جىلدىڭ 27 شىلدەسىندە قازاقستان رەسپۋبليكاسى دۇنيەجۇزىلىك ساۋدا ۇيىمىنىڭ مۇشەسى اتاندى.
2016 جىلدىڭ 16 جەلتوقسانىندا قازاقستاننىڭ ءوز الدىنا ەگەمەندى ەل بولىپ جاريالانعانىنا 25 جىل تولدى. تاۋەلسىزدىكتىڭ 25 جىلدىعىنا ارنالعان دەكلاراسيا جازىلدى.
2017 جىلى قازاقستاندا EXPO-2017 كورمەسى ۇيىمداستىرىلدى. اتالعان كورمە 10 ماۋسىم مەن 10 قىركۇيەك ارالىعىندا استانادا ءوتتى. ونى تاماشالاۋعا الەمنىڭ تۇكپىر-تۇكپىرىنەن 3 ميلليون ادام كەلدى. ال كورمەنى وتكىزۋگە 115 مەملەكەت پەن 22 حالىقارالىق ۇيىم قاتىستى.
2018 جىلدىڭ 1 قاڭتارىنان باستاپ قازاقستان بۇۇ قاۋىپسىزدىك كەڭەسىنە ءتوراعالىق ەتتى. سونداي-اق استانانىڭ 20 جىلدىق مەرەيتويى تويلاندى. ۇلتتىق ۆاليۋتامىز-تەڭگەمىزدىڭ 25 جىلدىعى اتالىپ ءوتتى.
2019 جىل قازاقستان ءۇشىن توسىن وقيعالارعا تولى بولدى. 19 ناۋرىزدا قازاقستاننىڭ تۇڭعىش پرەزيدەنتى نۇرسۇلتان نازاربايەۆ وكىلەتتىگىن توقتاتتى. 9 ماۋسىمدا كەزەكتەن تىس سايلاۋ ءوتىپ، 70 پايىزدان استام داۋىس جيناعان قاسىم-جومارت توقايەۆ ەل پرەزيدەنتى بولىپ سايلاندى.
2020 جىل تەك ءبىزدىڭ ەلىمىز ءۇشىن ەمەس، بارلىق الەم ءۇشىن ۇلكەن سىناق بولدى. بارلىق الەمدى جايلاعان ىندەتتىڭ كەسىرىنەن ەلىمىزدىڭ ەكونوميكاسىنا، ساياساتىنا، تۇرعىنداردىڭ الەۋمەتتىك جاعدايىنا جانە تاعى دا باسقا ماسەلەلەرگە بايلانىستى قيىنشىلىقتار تۋىندادى. دەگەنمەن دە، تۇعىرى مىقتى ەلىمىز بۇل قيىنشىلىقتان دا امان وتەتىنە ءبىز سەنەمىز.
وسى 29 جىل ناتيجەسىندە قازاقستان رەسپۋبليكاسى تاۋەلسىز، ەڭسەسى بيىك، باسقا دامىعان مەملەكەتتەرمەن تەرەزەسى تەڭ، كەرەگەسى كەڭ ەگەمەندى مەملەكەت بولىپ قالىپتاستى. اتا-بابامىزدان قانمەن بەرىلگەن وجەتتىك، قايسارلىق سياقتى قاسيەتتەر ەلىم دەپ، جەرىم دەپ جۇرەكتەرى سوعاتىن بۇگىنگىنىڭ جاستارىنىڭ دا بويىنان تابىلا ءبىلۋى ءتيىس.
ۋ.م.دجولدىبايەۆا ءال-فارابي اتىنداعى ءقازۇۋ-نىڭ قازاقستان تاريحى كافەدراسىنىڭ دوسەنتى
ن.م.تاستەيەۆ ءال-فارابي اتىنداعى ءقازۇۋ-نىڭ گەوگرافيا جانە تابيعاتتى پايدالانۋ فاكۋلتەتىنىڭ 1-كۋرس ستۋدەنتى
You Might Also Like
-
ءتۇس اۋا بەرە قاباعى تۇنەرىڭكى قارا قوشقىل بۇلت ن. قالاسىنىڭ ءۇستىن قىمتاپ الدى دا ىلە جۇمساقتىق تانىتىپ جىلاپ جىبەردى. كوڭىلشەك بۇلتتىڭ كوز جاسىن سۇرتپەككە، مۇمكىن جۇباتپاققا نيەتتەنگەندەي باتىستان ...
